މޯލްޑިވިއަން ޑިމޮކްރެޓިކް ޕާޓީގެ ވަގުތީ ޗެއާޕާސަންގެ މަގާމުގައި ހުންނެވި، އަބްދުލްޣަފޫރު މޫސާގެ އިތުބާރު ނެތްކަމުގެ މައްސަލަ އަނބުރާ ގެންގޮސް އެ ޕާޓީގެ އިސް ދެ މަގާމުން ވަކިކުރި ދެ ބޭފުޅުންގެ މަގާމު އަލުން އިއާދަކުރަން ނިންމައިފި އެވެ.
އެމްޑީޕީގެ އެތެރޭގައި އުފެދުނު ހިޔާލުތަފާތުވުންތަކުގެ ތެރެއިން، މަގާމުން ވަކިކުރީ އެ ޕާޓީގެ ޑެޕިއުޓީ ލީޑަރުގެ ނައިބުގެ (އިދާރީ) މަގާމުގައި ހުންނެވި އިބްރާހިމް ވަހީދު އާއި އެ ޕާޓީގެ ލީގަލް ޑިރެކްޓަރުގެ މަގާމުގައި ހުންނެވި އަހުމަދު މައުރޫފް އެވެ.
އެ ދެ ބޭފުޅުން މަގާމުން ވަކިކުރީ، ލޯކަލް ކައުންސިލް އިންތިހާބުން އެމްޑީޕީއަށް ލިބުނު ކާމިޔާބީ ފާހަގަކުރުމަށް އާޓިފިޝަލް ބީޗުގައި އޭޕްރިލް 6، ގައި ބޭއްވި ޖަލްސާގައި ވާހަކަދެއްކުމުގެ ފުރުސަތު ކުރީގެ ރައީސް މުހައްމަދު ނަޝީދުއަށް ނުދިނުމުން އުފެދުނު ނުތަނަވަސްކަމުގެ ތެރެެއިންނެވެ.
ނަމަވެސް އެ ހިޔާލުތަފާތުވުންތަކަށް ހައްލެއް ހޯދުމަށްޓަކައި އެމްޑީޕީގެ ލީޑަޝިޕްގައި ކުރެވުނު މަޝްވަރާތަކަށްފަހު، ޣަފޫރުގެ އިތުބާރު ނެތްކަމުގެ މައްސަލަ މިހާރު ނަގަން ނިންމާފައިވާކަން އަދަދު އަށް ވަނީ ކަށަވަރުވެފަ އެވެ.
އެ ހޫނުގަނޑު ތެރެެއިން މަގާމުން ވަކިކުރި، މައުރޫފް އާއި އިބުރޭގެ މަގާމު އަލުން އިއާދަކުރަން ނިންމާފައިވާކަން ވެސް މި ނޫހަށް ވަނީ ކަށަވަރުވެފަ އެވެ.
ޣަފޫރުގެ އިތުބާރު ނެތްކަމުގެ މައްސަލައިގައި ހޯމަ ދުވަހު އެމްޑީޕީ ގައުމީ މަޖިލީސް އެއްވަނީ
އެމްޑީޕީގެ ވަގުތީ ޗެއާޕާސަން އަބްދުލްޣަފޫރު މޫސާގެ އިތުބާރު ނެތްކަމުގެ މައްސަލައަށް ގޮތެއް ނިންމުމަށް، އެ ޕާޓީގެ ގައުމީ މަޖިލީހުގެ ޖަލްސާއެއް އަންނަ ހޯމަ ދުވަހަށް ތާވަލުކޮށްފިއެވެ. މި މައްސަލަ ހުށަހެޅީ، ޕާޓީގެ ޖަލްސާއެއްގައި ރައީސް ނަޝީދަށް ވާހަކަދެއްކެވުމުގެ ފުރުސަތު ނުދިނުމާ ގުޅިގެން އުފެދުނު ހިޔާލުތަފާތުވުންތަކުގެ ތެރެއިންނެވެ.
އެނގިފައިވާ ގޮތުގައި އެ ނިންމުންތައް ނިންމާނީ މިރޭ އޮންނަ އެ ޕާޓީގެ ގައުމީ މަޖިލީހުގެ ސިއްރު ބައްދަލުވުމުގަ އެވެ. އެ ބައްދަލުވުން ސިއްރުކޮށް ކުރިއަށް ގެންދިޔަ ނަމަވެސް، ބައްދަލުވުމުގައި ނިންމާ ކަންކަން، މިރޭ މީޑިއަތަކާ ހިއްސާ ކުރާނެ ކަމަށް މައުލޫމާތު ލިބިފައިވެ އެވެ.
އެމްޑީޕީގެ ވަގުތީ ޗެއާޕާސަންގެ މަގާމުގައި ހުންނެވި، ޣަފޫރުގެ އިތުބާރު ނެތްކަމުގެ މައްސަލައެއް ގައުމީ މަޖިލީހުގެ 55 މެންބަރުންގެ ސޮއިއާއެކު ހުށަހެޅީ މިދިޔަ ބުދަ ދުވަހު އެވެ. އެ މައްސަލަ އެމްޑީޕީގެ ގައުމީ މަޖިލީހަށް ހުށަހެޅީ ކުރީގެ ރައީސް، މުހައްމަދު ނަޝީދު އާއި އެ ޕާޓީގެ ކުރީގެ ޗެއާޕާސަން ފައްޔާޒް އިސްމާއިލް ލީޑު ކުރައްވާ ފެކްޝަނުންނެވެ.
އެ މައްސަލަ ހުށަހެޅުމަށް، ފައްޔާޒް އިސްމާއިލް އާއި ކުރީގެ ފިނޭންސް މިނިސްޓަރު، އިބްރާހިމް އަމީރު އާއި ކުރީގެ ޑިފެންސް މިނިސްޓަރު، މާރިޔާ ދީދީގެ އިތުރުން ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު، އަކްރަމް ކަމާލުއްދީން ސޮއިކުރައްވާފައިވެ އެވެ.
އެމްޑީޕީގެ ލީޑާޝިޕަށް އެކީގައި މަސައްކަތް ކުރެވޭނެ ގޮތެއް ހޯދިއްޖެ ކަމަށް ސޯލިހު އިއުލާނު ކުރައްވައިފި
އެމްޑީޕީގެ ލީޑާޝިޕްގެ ހުރިހާ ބޭފުޅުން އެކީގައި މަސައްކަތް ކުރެވޭނެ ގޮތެއް ހޯދިފައިވާ ކަމަށް ކުރީގެ ރައީސް އިބްރާހިމް މުހައްމަދު ސޯލިހު އިއުލާނު ކުރައްވައިފިއެވެ. އެމަނިކުފާނު ވިދާޅުވީ ޕާޓީގެ އަމާޒަކީ އެއްވެސް ލީޑަރަކު ބާކީނުކޮށް، އެންމެން ގުޅިގެން 2028 ވަނަ އަހަރުގެ ރިޔާސީ އިންތިހާބު ކާމިޔާބު ކުރުން ކަމަށެވެ.
އޭގެ އިތުރުން، މީގެ ކުރިން، ކުރީގެ ރައީސް، އިބްރާހިމް މުހައްމަދު ސޯލިހުގެ ފެކްޝަންއަށް ނިސްބަތްވެވަޑައިގެންނެވި، އައްޑޫ މީދޫ ދާއިރާގެ ކުރީގެ މެންބަރު، ރޮޒައިނާ އާދަމް އާއި އެކަމަނާގެ ފިރިކަލުން، ކިނބިދޫ ދާއިރާގެ ކުރީގެ މެންބަރު، މުހައްމަދު ނާޝިޒު ވެސް ޣަފޫރުގެ އިތުބާރު ނެތްކަމުގެ މައްސަލައިގައި ސޮއިކުރައްވާފައިވެ އެވެ.
އެނގިފައިވާ ގޮތުގައި އެމްޑީޕީގެ އެތެރޭގައި އުފެދިފައިވާ ހިޔާލުތަފާތުވުންތަކަށް ހައްލު ހޯދުމަށްޓަކައި އެ ޕާޓީގެ ލީޑަޝިޕްގައި ކުރެވުނު މަޝްވަރާތަކަށްފަހު، ހުރިހާ ފެކްޝަންތަކެއް އެކުގައި މަސައްކަތް ކުރެވޭނެ މަގެއް މިހާރު ވަނީ ހޯދައިފަ އެވެ. އެއީ، ފެކްޝަންތަކުގެ ލީޑަރުން ހިމެނޭ އިންތިގާލީ ކޮމިޓީއެއް އެކުލަވައިލައިގެން މަސައްކަތްތައް ކުރިއަށް ގެންދިޔުމެވެ.
