އިދިކޮޅު މޯލްޑިވިއަން ޑިމޮކްރެޓިކް ޕާޓީގެ ހުރިހާ ލީޑަރުން އެކުގައި މަސައްކަތް ކުރެވޭނެ ގޮތެއް ހޯއްދެވިއްޖެ ކަމަށް ކުރީގެ ރައީސް އިބްރާހިމް މުހައްމަދު ސޯލިހު އިއުލާނު ކުރައްވައިފި އެވެ.
"އިރާދަކުރެއްވިއްޔާ މިހާ ހިސާބަށް އާދެވުނު އިރުގައި އަޅުގަނޑުމެން މި ވަނީ މިކަމަށް ހައްލެއް ހޯދާފައި. އާންމު މެންބަރު އެ އެދޭ ގޮތަށް އަޅުގަނޑުމެން މުޅި ލީޑާޝިޕް އެކީގައި މަސައްކަތް ކުރެވޭނެ ގޮތްތަކެއް އިރާދަކުރެއްވިއްޔާ އަޅުގަނޑުމެންނަށް މިހިސާބަށް އާދެވުނުއިރު ހޯދިއްޖެ،" ސޯލިހު މިރޭ ވިދާޅުވި އެވެ.
ސޯލިހުގެ އުފަން ރަށް ޅ. ހިންނަވަރުގައި ވާހަކަ ދައްކަވަމުން އެމަނިކުފާނު ވިދާޅުވީ، ހުރިހާ ލީޑަރުން އެކުގައި މަސައްކަތް ކުރުމަށް އެއްބަސްވެވި އެކަމަށް މިހާރު ވެސް ވާހަކަ ދައްކަމުންދާ ކަމަށެވެ.
"އަޅުގަނޑުމެން އެމްޑީޕީ އިރާދަކުރެއްވިއްޔާ ކުރިއަށްދާނީ 2028 ވަނަ އަހަރުގެ އިންތިހާބު ކާމިޔާބު ކުރުމަށްޓަކައި ހަމަ އަޅުގަނޑުމެންގެ ލީޑާޝިޕް އިރާދަކުރެއްވިއްޔާ އެކީގައި އޮވެގެން. އެއްވެސް ލީޑަރު ބާކީވެނުވާ ކަހަލަ ގޮތަކަށް ހިސާބު ކުރެވިގެން،" ސޯލިހު ވިދާޅުވި އެވެ.
ސޯލިހު ވިދާޅުވީ އެމްޑީޕީގެ ހުރިހާ ލީޑަރުން ފާއިތުވި ދުވަސްތަކުގައި ވަރަށް ދިގުކޮށް މަޝްވަރާކޮށްފައިވާ ކަަމަށެވެ. އެ މަޝްވަރާތަކުގައި އެމަނިކުފާނު ވެސް ބައިވެރިވެވަޑައިގެންނެވި ކަމަށް ސޯލިހު ވިދާޅުވި އެވެ.
"މީގެ ދެ ދުވަސް ކުރިން މި ޖެހުނު މައްސަލައާއެކުގައި އަޅުގަނޑުމެން ހުރިހާ ލީޑަރުން، ޕާޓީގައި އިސްކޮށް މި ތިބި މީހުން މި ދެންނެވީ މަޝްވަރާކޮށް މިއަށް ހައްލެއް ހޯދުމުގެ މަސައްކަތް ކުރަމުން. އިއްޔެ ވެސް، ރޭގައި ވެސް، މިއަދު ވެސް އަޅުގަނޑު ވެސް ގިނަ ވަގުތު ހޭދަ ކުރީ އެކަމުގައި،" ސޯލިހު ވިދާޅުވި އެވެ.
އެބޭފުޅުންގެ އަމާޒަކީ ސުލްހައިގެ މަޝްވަރާތައް މާދަމާ ރޭގެ ނިޔަލަށް ނިންމާލުން ކަމަށް ވެސް ސޯލިހު ވިދާޅުވި އެވެ.
"އަޅުގަނޑުމެންގެ މި މަސައްކަތުގެ އަމާޒަކީ ލަސްވެގެން މާދަމާ ނޫނީވިއްޔާ މާދަމާ ރޭ މިކަމަށް ހައްލެއް ގެނެސް ޕާޓީގެ މެންބަރުން އެދޭ ގޮތަށް 2028 ވަނަ އަހަރުގެ ރިޔާސީ އިންތިހާބަށް އަމާޒު ހިފުން،" އެމަނިކުފާނު ވިދާޅުވި އެވެ.
ސޯލިހުގެ ފެކްޝަނުގެ އިތުރުން އެމްޑީޕީގައި ދެން ހިމެނެނީ ކުރީގެ ރައީސް މުހައްމަދު ނަޝީދާއި ކުރީގެ ޗެއާޕާސަން ފައްޔާޒް އިސްމާއިލް ލީޑު ކުރައްވާ ފެކްޝަނާއި ޕާޓީގެ ރައީސް އަބްދުﷲ ޝާހިދުގެ ފެކްޝަނެވެ.
ފެކްޝަންތަކުގެ މެދުގައި ޖެހިފައިވާ މައްސަލަގަނޑު އާންމުންނާ ހަމައަށް ތިލަވީ، ލޯކަލް ކައުންސިލްތަކުގެ އިންތިހާބުގައި ލިބުނު ކާމިޔާބީ ފާހަގަ ކުރަން ހޯމަ ދުވަހު ބޭއްވި ޖަލްސާގައި ވާހަކަ ދެއްކެވުމުގެ ފުރުސަތު ނަޝީދަށް ނުދިނުމުންނެވެ.
ނަޝީދު ބޭނުންވެވަޑައިގެންނެވީ އިންތިގާލީ ސަރުކާރެއް ހެދުމަށް އެމަނިކުފާނު ގެންގުޅުއްވާ ހިޔާލު ޖަލްސާގައި އިއުލާނު ކުރެއްވުމަށެވެ. އެކަމަކު ސޯލިހުގެ ފެކްޝަނުން އެކަމަށް ފުރުސަތު ނުދިނީ ކަމަށްވެ އެވެ.
އޭގެ ފަހުން، ޕާޓީގެ ވަގުތީ ޗެއާޕާސަން އަބްދުލްޣަފޫރު މޫސާ މަގާމުން ވަކި ކުރުމުގެ މަސައްކަތް ނަޝީދުގެ ފެކްޝަނުން ވަނީ ފަށައިފަ އެވެ.
