ވެރިކަން ކުރާ ޕީއެންސީގެ ޓިކެޓުގައި ހުޅުމާލެ ދެކުނު ދާއިރާގެ މަޖިލިސް ގޮނޑިއަށް ވާދަކުރި ޝާނީޒް ހާޝިމް (ޝާންކޮ) އެ ޕާޓީން ވަކިވެ އިދިކޮޅު އެމްޑީޕީއާ ގުޅުމުން ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ގައި އޭނާ އަދާކުރަމުންދިޔަ ވަޒީފާއިން ވަކިކޮށްފި އެވެ.
އެޗްޑީސީގެ ވަޒީފާގައި 10 އަހަރަށްވުރެ ގިނަ ދުވަހު މަސައްކަތް ކޮށްފައިވާ ޝާންކޮ އެޗްޑީސީގެ ވަޒީފާއިން ވަކިކުރީ މިދިޔަ އަންގާރަ ދުވަހު އެވެ. އޭނާ ވަޒީފާއިން ވަކިކުރީ ދިފާއުގައި ދެއްކި އެއްވެސް ވާހަކައަކަށް ރިއާޔަތްނުކޮށް ކަމަށް ޝާންކޮ ބުންޏެވެ.
"ސަރުކާރަށް ނިސްބަތްވާ ކުންފުނިތަކުގައި ވަޒީފާ އަދާކުރަމުން އެއިރަކު އެ އޮންނަ ސަރުކާރު ނޫން އެހެން އެއްވެސް ޕާޓީއަކަށް ނުވަތަ ޕާޓީއެއްގެ ލީޑަރަކަށް ތާއީދުކޮށް ބަހެއް ބުނުންވެސް މި އޮންނަނީ ހަރާން ކަމަކާ އެއް ލެވެލްވެފައި،" ޝާންކޮ ބުންޏެވެ.
ހުޅުމާލެ ޒުވާނުންގެ މެދުގައި ވެސް މަގުބޫލު ޝާންކޮ ބުނީ އެންމެ ފުރަތަމަ އޭނާއަށް ފިއްތުންތައް ކުރިމަތިވީ އަދަދު ނޫހުގެ ނޫސްވެރިޔާ މުހައްމަދު ޝަހުޒާން ޖަލަށްލުމުން އެކަން އެގޮތަށް ހިނގުމުން ހިތާމަކުރާ ކަމަށް ބުނެ ސޯޝަލްމީޑިއާގައި ޕޯސްޓެއް ކުރުމުން ކަމަށެވެ.
އޭގެ ފަހުން، އުފެދުނު ހިތްހަމަނުޖެހުންތަކުގައި ޕީއެންސީން ވަކިވެ އެމްޑީޕީއަށް ސޮއިކުރި ކަމަށް ޝާންކޮ ބުންޏެވެ. އަދި، ހިތަދޫ އުތުރު ބައި-އިލެކްޝަންގައި އަބްދުﷲ ސޯދިގު (ސޯބެ) އަށް ތާއީދުކޮށް ސޯޝަލްމީޑިއާގައި ޕޯސްޓެއް ޖެހި ކަމަށާއި ވަޒީފާއިން ވަކިކުރީ އޭގެ ފަހުން ކަމަށް އޭނާ ބުންޏެވެ.
ޝާންކޮގެ އިތުރުން ވެސް މިފަހުން ސިޔާސީ ގޮތުން ހިޔާލުތަފާތުވުމުން އެތައް ބަޔަކު ވަނީ ވަޒީފާއިން ވަކިކޮށްފަ އެވެ. އެ ކަންކަމާ ދެކޮޅަށް އެމްޑީޕީން ވަނީ މިރޭ މާލޭގައި މުޒާހަރާ ކުރަން ވެސް ނިންމައިފަ އެވެ.
ވަޒީފާ ބުރާސްފަތީގެ ނަމުގައި އެމްޑީޕީން ކުރާ މުޒާހަރާ ފަށާނީ މިރޭ 8:30 ގައި ރަސްފަންނު ސަރަހައްދުންނެވެ.
