ޕާކިސްތާނުގައި އަންނަ މަހު ބާއްވާ ބެޑްމިންޓަން އޭޝިއާ، ސައުތު އޭޝިއަން ރީޖަނަލް ޗެމްޕިއަންޝިޕްގެ ބޮޑު ސިލެކްޝަނެއް ކުރިއަށް ގެންގޮސް މުބާރާތުގައި ރާއްޖެ ތަމްސީލްކުރާނެ ކުޅުންތެރިން ހޮވައިފި އެވެ.
ރާއްޖޭގެ އެކި ކަންކޮޅުތަކުން ވަރުގަދަ އެކަޑަމީތަކުގެ ކުޅުންތެރިން ހިމެނޭހެން ކުރިއަށްދިޔަ ސިލެކްޝަނަށް ފަހު، އިސްލާމްއާބާދުގައި އަންނަ މަހު 1-7 އަށް ކުރިއަށްދާ މުބާރާތަށް ވަނީ ތިން އުމުރުފުރާ އަކުން 12 ކުޅުންތެރިން ހޮވިފަ އެވެ.
އެ ގޮތުން، 16 އަހަރުން ދަށުން ފިރިހެން ހޮވުނީ ރިވައިވަލް އޭދަފުށީގެ ރިޝާމް އަބްދުލް ފައްތާހު އާއި ރިވައިވަލްގެ މުހައްމަދު އައިދިން އަންވަރު އެވެ. މި އުމުރުފުރާގެ އަންހެން ބައިން، ހޮވުނީ ބީއޭއެމް ވައިޑީޕީގެ ޔަލްވީ ހުސެއިން ޒުހުރީ އާއި ލައިބާ އަހުމަދު މަހުލޫފް (އެލީ) އެވެ.
ނަވާރަ އަހަރުން ދަށު ފިރިހެން ބައިން ބީއޭއެމް ވައިޑީޕީގެ މުހައްމަދު ފަލާހު ފަރޫޒާން އާއި ނައިފަރުގެ އިބްރާހިމް ނާޝިތު ހަމްދީ ވަނީ ހޮވިފަ އެވެ. އަދި، މި އުމުރުފުރާގެ އަންހެން ބައިން، ބީއޭއެމް ވައިޑީޕީގެ ކިޔާން އާދިލް މުހައްމަދު އާއި އައިމިނަތު ފަރްހާ ފަރޫޒާން ވަނީ ހޮވިފަ އެވެ.
ތޭވީސް އަހަރުން ދަށުގެ ފިރިހެން ބައިން، ހޮވުނީ ރިވައިވަލްގެ އާދަމް މަހީން މުހައްމަދު އާއި އަހުމަދު އަޔާން ބިން މުހައްމަދު ސޮލާހު އެވެ. އަދި، މި އުމުރުފުރާގެ އަންހެން ބައިން ހޮވުނީ، ބީއޭއެމް ވައިޑީޕީގެ އައިޝަތު ޒޯޔާ ހުސެއިން އާއި ޝުބާ މުހައްމަދު ޝަރީފް އެވެ.
ބީއޭއެމްގެ ރައީސް، އިޝްފާން މުހައްމަދު (އިއްޕަ) ވިދާޅުވީ، އުމުރުފުރާ މުބާރާތަކަށް މި ގޮތަށް ރާއްޖޭގެ ވަރުގަދަ އެކަޑަމީތަކަށް ހުޅުވާލައިގެން މި ގޮތަށް ސިލެކްޝަނެއް ފޯރިގަދަކޮށް ބޭއްވިގެން ދިއުމަކީ ކުރިއެރުމެއް ކަމަށެވެ. އަދި، އުންމީދަކީ ސިލެކްޝަންތައް ކުޅެ، ކުޅުންތެރިންގެ ލެވަލް މަތިކޮށްގެން ބައިނަލްއަގުވާމީ މުބާރާތްތަކަށް ދެވެން އޮތްނަމަ އެ ފުރުސަތުގެ ބޭނުން އެންމެ ރަނގަޅަށް ހިފުން ކަމަށް އިއްޕަ ވަނީ ވިދާޅުވެފަ އެވެ.
