ވީގޯ، ސްޕެއިން (މާޗް 7) - ފަހު ވަގުތު ފެޑެރީކޯ ވަލްވޭޑޭ ކާމިޔާބުކުރި ގޯލުން 2-1 އިން ސެލްޓަ ވީގޯ އަތުން ރެއާލް މެޑްރިޑުން، ސްޕެނިޝް ލީގުގައި ރޭ މުހިންމު މޮޅެއް ހޯދައިފި އެވެ.
މި މެޗުގެ ކުރިން ރެއާލުން އެންމެ ފަހުން ކުޅުނު ދެ މެޗުން އޮތީ ބަލިވެފަ އެވެ. ދިހަ ދުވަސްތެރޭ ސްޕެނިޝް ލީގުގައި އޮސަސޫނާ އާއި ގެޓަފޭ އަތުން ރެއާލް ބަލިވެފައި އޮތުމުން، ރޭގެ މެޗަށް ނުކުތީ ނަތީޖާ ނެރެން މަޖުބޫރުވެފައި އޮތުމުގެ ޕްރެޝަރާ އެކުގަ އެވެ. ރޭ ހޯދި، މޮޅާ އެކު، ރެއާލުން ވަނީ ސްޕެނިޝް ލީގުގެ އެއް ވަނައިގައި އޮތް ބާސެލޯނާ އަށް ވުރެން އެއް މެޗު އިތުރަށް ކުޅެ، އެއް ޕޮއިންޓަށް ގާތަށް ޖެހިލައިފަ އެވެ.
ބާސެލޯނާ އިން އެއް ވަނައިގައި އޮތީ 26 މެޗުން 64 ޕޮއިންޓާ އެކު އެވެ. ދެ ވަނައިގައި އޮތް ރެއާލަށް 27 މެޗުން ވަނީ 63 ޕޮއިންޓް ލިބިފަ އެވެ.
ސެލްޓަގެ ދަނޑުގައި ރޭ ކުޅުނު މެޗު ފަށައިގެން 10 ވަނަ މިނިޓްގައި ރެއާލްގެ ވިނީޝިއުސް ފޮނުވާލި ޝޮޓެއް ވަނީ ގޯލުގެ ދަނޑިއަށް އަމާޒުވެފަ އެވެ. އޭގެ މިނިޓެއް ފަހުން، ރެއާލަށް ލީޑުނަގައިދިނީ ފްރާންސްގެ މިޑްފީލްޑަރު، އައުރެލިއަން ޗުއަމެނީ އެވެ. މިއީ، އާޑާ ގުލާ ދިން ބޯޅައަކުން ފޮނުވާލި ހަމަލާއަކުން ޗުއަމެނީ ޖެހި ލަނޑެކެވެ.
ރެއާލަށް މާ ގިނައިރެއް ލީޑުގައި އޮވެވޭ ގޮތެއްނުވި އެވެ. މެޗުގެ 25 ވަނަ މިނިޓްގައި ރެއާލް އޭރިއާތެރެއިން ހުސްކޮށް އަރައި، ބޯހާ އިގްލީސިއަސް ވަނީ ގޯލަަށް ބޯޅަ ވައްދާލައިގެން ސެލްޓަ އަށް އެއްވަރުކޮށްދީފަ އެވެ. އެ ފުރުސަތު ތަނަވަސްކޮށްދިނީ ވިލިއަޓް ސްވެޑްބާގް އެވެ.
މެޗުގެ 87 ވަނަ މިނިޓްގައި ސެލްޓަގެ އިއާގޯ އަސްޕާސް ފޮނުވާލި ހަމަލާއެއް ގޯލުގެ ދަނޑިއަށް ވަނީ އަމާޒުވެފަ އެވެ. އޭގެ ފަހުން، މެޗުގެ އިތުރު ވަގުތުގެ ހަތަރު ވަނަ މިނިޓްގައި ވަލްވޭޑޭ، އޭރިއާބޭރުން ޖެހި ޝޮޓެއް، ސެލްޓަ ކުޅުންތެރިއަކު ގައިގައި ޖެހިފައި ގޯލަށް ވަދެގެން ކާމިޔާބުކުރި ގޯލުން ރެއާލް މޮޅުވީ އެވެ.
ރެއާލަށް ދެން އޮތީ ބުދަ ދުވަހުގެރޭ ޗެމްޕިއަންސް ލީގުގެ ގަދަ 16 ބުރުގެ ފުރަތަމަ ލެގުގައި އަމިއްލަ ދަނޑުގައި މެންޗެސްޓާ ސިޓީއާ ދެކޮޅަށް ކުޅޭ މެޗެެވެ.
