އދ. ދިގުރަށުގައި ފަތުރުވެރިންނަށް ހާއްސަކޮށްފައިވާ ގޮނޑުދޮށަށް ނަޖިސް ބޭރުވާ ވީޑިއޯއެއް ސޯޝަލްމީޑިއާގައި އާންމުވެ، ދުނިޔޭގެ ސަމާލުކަން އެ ވީޑިއޯއަށް ލިބިއްޖެ އެވެ.
ކެނެރީ އައިލެންޑްސްއަށް ނިސްބަތްވާ ކޮންޓެންޓު ކްރިއޭޓަރެއް ކަމަށްވާ، ޑޭވިޑް ސެގޫރާ އޭނާގެ އިންސްޓަގްރާމް އެކައުންޓުން ޕޯސްޓު ކޮށްފައިވާ އެ ވީޑިއޯއަށް މިހައިތަނަށް 5.9 މިލިއަނަށްވުރެ ވިއުސް ލިބިފައިވެ އެވެ.
ގިގުރަށު ގޮނޑުދޮށުގައި އޭނާ ހުރެގެން ނަގާފައިވާ އެ ވީޑިއޯގައި ބުނަނީ، މި ހުރެވުނީ ދުނިޔެމަތީ ސުވަރުގޭގައި ކަމަށް ހީވި ނަމަވެސް، އެ ތަނަށް ބޭރުވަނީ ނަޖިސް ކަމަށެވެ. އަދި، އެ ސަރަހައްދަކީ އެ ރަށަށް ޒިޔާރަތްކުރާ ފަތުރުވެރިންނަށް ހާއްސަ ކޮށްފައިވާ ސަރަހައްދު ކަމަށް އެ ވީޑިއޯގައި އޭނާ ބުނެ އެވެ.
"މިއީ ބިކިނީ ބީޗު، ފަތުރުވެރިންނަށް ހާއްސަ ކޮށްފައިވާ ސަރަހައްދު. މި ތަނުގައި ފަތައިގެން ޖެހޭނެ ބަލި ވަރަށް ބޮޑުވާނެ ނޫންތޯ؟ ރާއްޖެއަށް ދަތުރުކުރާ އިންފްލުއެންސަރުން މި ވާހަކައެއް ކަލޭމެންނަކަށް ހަމަ ޔަގީނުން ވެސް ކިޔައެއް ނުދޭނެ،" ޑޭވިޑް އެ ވީޑިއޯގައި ބުނެ އެވެ.
އެކަމާ ބެހޭގޮތުން ސުވާލުކުރުމުން އެ ރަށު ކައުންސިލުގެ ރައީސް، އިބްރާހިމް އުސްމާން ވިދާޅުވީ އެ ވީޑިއޯއަކީ މި މަހުގެ ކުރީކޮޅު ނަގާފައިވާ ވީޑިއޯއެއް ކަމަށެވެ. އަދި، ވީޑިއޯއިން އެ ފެންނަ ގޮތަށް ނަޖިސް ބޭރުވާން ދިމާވީ އެ ރަށުގެ މޫދުން ބޭރުކޮށްފައި އޮންނަ ނަރުދަމާ ހޮޅި ފަޅައިގެން ގޮސްގެން ކަމަށެވެ.
އޭނާ ވިދާޅުވީ އެ ރަށުގައި މީގެ ކުރިން ބޭނުންކުރަމުން ދިޔައީ އެ ރަށު ރައްޔިތުން އަމިއްލައަށް އަޅާފައި އޮންނަ ނަރުދަމާއެއް ކަމަށެވެ. ނަމަވެސް، މިދިޔަ ސަރުކާރުގެ ދުވަސްވަރު އެ ރަށުގައި ފެށި ނަރުދަމާގެ މަޝްރޫއު ނިމުމުން، އެ ނަރުދަމާ ބޭނުންކުރަން ފެށިއިރު، ބައެއް ގޭގެ އެ ނަރުދަމާއާ ނުގުޅި ކަމަށް އުސްމާން ވިދާޅުވި އެވެ.
"ސަރުކާރުން އެޅި ނަރުދަމާއަށް ބަދަލުކުރަމުންދިޔައިރު އަދި ބައެއް ގޭގެއަށް ނުގުޅި ހުރީ، އެހެންވީމާ އެއްކޮށް އޭތި ތަޅައިނުލާ އަޅުގަނޑުމެން މިއުޅުނީ، އެއްކަލަ ކުރީގެ އެގްޒިސްޓިން އެތި، އޭތި ތަޅައިލަން ތައްޔާރުވަނިކޮށް ދެން ގަދަވެގެން ވަރަށް ގިނަ ފަހަރަށް އެ ހޮޅި ބިންދައިގެން ދާނެ، ދެން އަނެއްކާ ވެސް އައު ކުރަނީ ދޯ، އެހެން ބިންދައިގެން ގޮސްފައި އޮތީމާ އެ ވަޅުގަނޑު ތެރޭގައި ބާރުބޮޑުވެގެން ނުކުތީ،" އުސްމާން ވިދާޅުވި އެވެ.
އެ ސަރަހައްދަކީ އާންމުކޮށް ފަތުރުވެރިން އުޅޭ ސަރަހައްދަކަށް ވާތީ، ކުއްލިއަކަށް އެފަދަ ކަމެއް ދިމާވި ނަމަވެސް، ފުރަތަމަ ފެނުން އެންމެ ގާތްވާނީ ފަތުރުވެރިއަކަށް ކަމަށް އޭނާ ވިދާޅުވި އެވެ. އެ ވީޑިއޯއަކީ އެގޮތަށް ފަތުރުވެރިއަކަށް ފެނުމުން ކޮށްފައިވާ ވީޑިއޯއެއް ކަމަށް އުސްމާން ވިދާޅުވި އެވެ.
އެކަމުގެ މައުލޫމާތު ލިބުމާއެކު، އެ މައްސަލަ ހައްލު ކޮށްފައިވާނެ ކަމަށް އޭނާ ވިދާޅުވި އެވެ.
"ވަގުތުން އެޓެންޑު ވީން، މިހާރު ހައްލު ކޮށްފައި ވާނީ، ކައުންސިލާއި އަމިއްލަ ބަޔަކާ ގުޅިގެން، ރައްޔިތުން ހައްލު ކުރީ،" އުސްމާން ވިދާޅުވި އެވެ.
އެ މައްސަލަ ދިމާވިއިރު، އެ ރަށުގައި 1000 އެއްހާ ފަތުރުވެރިން ތިބި ކަމަށް އުސްމާން ވިދާޅުވި އެވެ. އޭނާ ވިދާޅުވީ އެ ރަށުގައި މިދިޔަ ސަރުކާރުން ފެށި ނަރުދަމާގެ މަޝްރޫއު އޮތީ ވެރިކަން ބަދަލުވިއިރު، 90 ޕަސެންޓު މަސައްކަތް ނިމިފައި ކަމަށެވެ. މިހާރު ކުރިއަށް ދަނީ ނުގުޅި ހުރި ގޭގޭގެ އެ ނަރުދަމާއާ ގުޅައިލުމުގެ މަސައްކަތް ކަމަށް އޭނާ ވިދާޅުވި އެވެ.
