ކ. ތިލަފުށީގައި މަރުވެފައި އޮއްވާ ފެނުނު ބިދޭސީ މީހާ ގެއްލިގެން ހޯދުމުގެ މަސައްކަތް ދެ ދުވަސް ފަހުން ފެށުމުން އިހުމާލުވި ތުހުމަތުތަކެއް އަމާޒުވެއްޖެ އެވެ.
އަދަދު އަށް އެނގިފައިވާ ގޮތުގައި ވެމްކޯގައި މަސައްކަތްކުރާ ބަންގްލަދޭޝްއަށް ނިސްބަތްވާ އަމީން މިއާ، 24 ގެއްލުނީ މިދިޔަ ހޯމަ ދުވަހު އެވެ. އެކަމަކު އޭނާ ގެއްލުނުކަން ފުލުހުންނަށް ވެމްކޯއިން ރިޕޯޓްކޮށް އޭނާ ހޯދުމުގެ މަސައްކަތް ފެށީ އިއްޔެ އެވެ.
އަމީން މިއާ ގެއްލުނުކަން ފުލުހުންނަށް އިއްޔެ ރިޕޯޓުކުރީ ތިލަފުށީގައި މަސައްކަތްކުރާ ބިދޭސީންތަކެއް އެކަމާ ކަންބޮޑުވުން ފާޅުކޮށް މައްސަލަ ހޫނު ކުރުމުންކަން މި ނޫހަށް ވަނީ އެނގިފައިވެ އެވެ.
އެކަމުގެ މައުލޫމާތު އެނގޭ މީހަކު އަދަދު އަށް ބުނީ އެ ބިދޭސީ މުވައްޒަފު ނިދަން ނާންނާތީ ކަންބޮޑުވެގެން ތިލަފުށީގެ ވެމްކޯ މެނޭޖަރުގެ ސަމާލުކަމަށް ވެސް އެކަން ގެނައި ކަމަށާއި އެކަމަކު އޭރު އޭހާ ސީރިއަސްކޮށް އެކަންތައް ނުނަގާ ކަމަށެވެ.
"އެ މީހުންގެ މީހެއް ނެތިއްޔާމުން އެމީހުންގެ ޝަކުވާތައް އަންނާނެތާ އެމީހާ ނުފެނި. އެމީހާ ފޯނަށް ގުޅޭ. އެމީހާ ނުއެއް ފެނޭ. ނިދާކަށް ވެސް ނާދޭ. އެމީހުންގެ ޝަކުވާ ބޮޑުވެގެން ތިލަފުށީގެ އެމީހުންގެ [ވެމްކޯ] ގެ މެނޭޖަރަށް އެންގި ކަމަށްވޭ. އޭތި އެހާ ސީރިއަސް އިޝޫއެއް ގޮތަށް ނުއެއް ނަގާ،" އޭނާ ބުންޏެވެ.
އޭނާ ގެއްލުނުކަން ވެމްކޯއިން ފުލުހުންނަށް ރިޕޯޓުނުކޮށް ލަސްކުރީ ކީއްވެގެން ކަމެއް މިހާތަނަށް ސާފުނުވާއިރު، އެކަމާ ގުޅިގެން ވެމްކޯގެ ބަހެއް ވެސް މިހާތަނަށް ލިބިފައެއްނުވެ އެވެ.
އަދަދު އަށް އެނގިފައިވާ ގޮތުގައި އަމީން މިއާ ގައިގައި ކުނި ގޮނޑުގައި މަސައްކަތްކުރި ކޮންނަ ބޯޓެއްގެ ދަތްގަނޑުން ޖެހި ކުނިތަކުގެ ތެރެއަށް ވެއްޓޭ މަންޒަރު ސީސީޓީވީ ކެމެރާއިން ވަނީ ފެނިފަ އެވެ. ސީސީޓީ ކެމެރާ ބެލީ އިއްޔެގެ ވަގުތެއްގައި ކަމަށް މި ނޫހަށް އެނގިފައިވެ އެވެ.
މިގޮތުން ވެމްކޯއިން ފުލުހުންނަށް މައްސަލަ ރިޕޯޓުކޮށް އޭނާ ހޯދުމުގެ މަސައްކަތް ދެ ދުވަސް ފަހުން ފެށީ ސީސީޓީވީ ކެމެރާއިން އޭނާ ކުނިތަކުގެ ތެރެއަށް ވެއްޓޭތަން ފެނުމުންކަން އެނގިފައިވެ އެވެ.
ކުނިތަކުގެ ތެރެއަށް އަމީން މިއާ ވެއްޓުނީ ކޮންނަ ބޯޓު ދުއްވަން ހުރި ސްރީލަންކާ މީހާގެ އިހުމާލުން ކަމެއް މިހާތަނަށް ކަށަވަރު ނުވާކަން މި ނޫހަށް ވަނީ އެނގިފަ އެވެ.
"ކުނިކޮށީގައި އޮޕަރޭޓްކުރަމުން އައި ހައިމާކެއްގެ ދަތްގަނޑުން ޖެހެނީ. ސީސީޓީވީން ފެނޭ. ދުއްވަން ހުރި މީހާއަކަށް ހީއެއް ނުވޭ ރިއަލައިޒްވިހެނެއް ޖެހުނު ކަމެއް. މަރުވީމަ ފޮރުވާލީ ކަމަށް ވެސް ވެދާނެ. ނޫނިއްޔާ އެކަން ހިނގިކަން އެ މީހާއަށް ވެސް ނޭނގުނީ،" އޭނާ ބުންޏެވެ.
ފުލުހުން ވަނީ މިކަމާ ގުޅިގެން ސްރީލަންކާ މީހާއާ ސުވާލުކޮށްފަ އެވެ. ނަމަވެސް މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރެއް ނުކުރެ އެވެ.
ފުލުހުން ބުނީ އެ މައްސަލަ ތަހުގީގު ކުރަމުންދާ ކަމަށާއި އިތުރު މައުލޫމާތު ލިބުމުން މީޑިއާތަކާ ހިއްސާ ކުރާނެ ކަމަށެވެ.
