އެމްޑީޕީ ސަރުކާރުން ކުރިއަށްގެންދިޔަ ބިންވެރިޔާ ސްކީމްގެ ދަށުން މާލެ ސަރަހައްދުން ބަންޑާރަ ގޯތި ދޫކުރުމުގެ އުސޫލުގެ ދަށުން ގިރާވަރުފަޅުން ގޯތި ލިބުނު މީހުންނަށް ލިބޭ ލޮޓް ކަނޑައެޅުމަށް ހޮނިހިރު ދުވަހު ގުރެއް ނެގުމަށް ހަމަޖެހިއްޖެ އެވެ.
ހައުސިން މިނިސްޓްރީން ބުނީ ގިރާވަރުފަޅުން ގޯތި ލިބިފައިވާ ފަރާތްތަކަށް ކަނޑައެޅިފައިވާ ބިމުގެ ސަރަހައްދުތަކަށް ބަދަލު އަންނާނެތީ، އައު ލޮޓް ނަންބަރުތައް ކަނޑައެޅުމަށް އަލުން ގުރު ނެގުމަށް ހަމަޖެހިފައިވަނީ ހޮނިހިރު ދުވަހު ހެނދުނު 09:30 ގައި ސޯޝަލް ސެންޓަރުގެ ހޯލުގައި ކަމަށެވެ.
ގުރު ނެގުމުގެ ކަންކަން ކުރިއަށް ގެންދާނީ އެކަމަށް ކަނޑައަޅާފައިވާ މިނިސްޓްރީގެ މުވައްޒަފުން ކަމަށާއި ގިރާވަރުފަޅުން ބިން ލިބޭ ފަރާތްތަކުގެ ތެރެއިން ގުރުއަތުލާ ހޯލަށް ބިން ލިބިފައިވާ ފަރާތް ނުވަތަ ބިން ލިބިފައިވާ ފަރާތްތަކުގެ ތެރެއިން ކޮންމެ ޕްލޮޓަކަށް އެއް ފަރާތަށް ވަދެވެ އެވެ.
މީގެއިތުރުން ގޯތި ލިބޭ ފަރާތެއްގެ ބަދަލުގައި އެހެން ފަރާތަކުން ހާޒިރުވާން ބޭނުންވާނަމަ، އެކަން އަންގައިދޭ ލިޔުމާއި އަދި ގޯތީގެ ވެރިފަރާތުގެ އައިޑީ ކާޑުގެ ކޮޕީގެ އިތުރުން ބަދަލުގައި ހާޒިރުވާ ފަރާތުގެ އައިޑީ ކާޑުގެ ކޮޕީއާއެކު ހާޒިރުވުމުން، ގުރުއަތު ނެގުމަށް ހަމަޖެހިފައިވާ ސަރަހައްދަށް އެ ފަރާތަށް ވަދެވޭނެ ކަމަށް މިނިސްޓްރީން ބުންޏެވެ.
އޮކްޓޯބަރު 15، 2024، ގައި މިނިސްޓްރީން އާންމުކުރި ގިރާވަރުފަޅުގެ ލޭންޑް ޔޫސް ޕްލޭނުގައި 610 ގޯތި މަދުވެފައިވާތީ، އެ އަދަދު ހިމަނައިގެން ގިރާވަރުފަޅުން ދޫކުރަންޖެހޭ ޖުމްލަ 4،072 ގޯތި ހިމެނޭހެން އައު ލޭންޑް ޔޫޒް ޕްލޭނެއް އެކުލަވާލައި އެ ޕްލޭން ވަނީ ގެޒެޓްކޮށްފަ އެވެ.
މި ބަދަލާ ގުޅިގެން ބިންވެރިޔާ ސްކީމްގެ ދަށުން ގިރާވަރުފަޅުން ގޯތި ލިބިފައިވާ ފަރާތްތަކަށް ކަނޑައެޅިފައިވާ ބިމުގެ ސަރަހައްދުތަކަށް ބަދަލު އަންނާނެތީ، އައު ލޮޓް ނަންބަރުތައް ވަނީ ކަނޑައަޅާފަ އެވެ.
ގިރާވަރުފަޅުން ދޫކުރާ ގޯތީގެ އަދަދާއި ބޮޑުމިން:
- 1،250 އަކަފޫޓުގެ 2،603 ގޯތި
- 1،650 އަކަފޫޓުގެ 1،214 ގޯތި
- 2،050 އަކަފޫޓުގެ 254 ގޯތި
- 2،450 އަކަފޫޓުގެ އެއް ގޯތި
މިނިސްޓްރީން ބުނީ ގުރުއަތު ނެގުން ކުރިއަށްދާއިރު ގޯތި ލިބިފައިވާ ފަރާތަށް ގުރުއަތުން ލިބޭ ޕްލޮޓް ހިޔާވެހި ޕޯޓަލް އިން ވަގުތުން ފެންނާނެ ކަމަށާއި އެފަރާތަކަށް ލިބޭ ޕްލޮޓް ނަންބަރު އެސްއެމްއެސް މެދުވެރިކޮށް އެންގޭނެ ކަމަށެވެ.
ގޯތި ލިބޭ ފަރާތްތަކުގެ ގުރުއަތުލުން ނިމުމުން، ގޯތިތަކުގެ ރަޖިސްޓްރީ އާއި ބިން ލިބޭ ފަރާތްތަކާއެކުވާ އެއްބަސްވުންތަކާ ގުޅޭ މައުލޫމާތު މިނިސްޓްރީން ހިއްސާކުރާނެ ކަމަށާއި ބިން ހިއްކާ ނިމުމުން ގޯތި ހަވާލުކުރުމުގެ މަސައްކަތް ކުރިއަށް ގެންދާނެ ކަމަށް މިނިސްޓްރީން ބުންޏެވެ.
