ވިޔަފާރި ބޭންކުތަކުން ބޯހިޔާވަހިކަމަށް އިންވެސްޓުކުރަން މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ކަނޑައެޅި ގަވާއިދުގެ ދަށުން، ފްލެޓްތަކެއް އެޅުމަށް ދިވެހި ތިން ކުންފުންޏަކާ ބޭންކް އޮފް މޯލްޑިވްސްއިން ހަވާލުކޮށްފި އެވެ.
ބީއެމްއެލްގެ ސަބްސިޑަރީ ކުންފުނި، ބީއެމްއެލް އެފޯޑަބަލް ހޯމް ލީސިން ކުންފުނިން ހުޅުމާލޭގައި ފްލެޓްތަކެއް އަޅަން ބޭރުގެ ދެ ކުންފުންޏަކާ ވެސް އޮތީ ހަވާލުކޮށްފަ އެވެ. އިއުލާން ކުރުމެއް ނެތި ބޭރުގެ ކުންފުނިތަކަކަށް މިފަދަ މަޝްރޫއުތަކެއް ދިނުމުން އެ ބޭންކަށް ފާޑުކިޔުން ވެސް އަމާޒުވި އެވެ.
މިއަދު ބީއެމްއެލްއިން ފްލެޓު އެޅުމަށް ސޮއިކުރީ ރަޝީދު ކާޕެންޓްރީ އެންޑް ކޮންސްޓްރަކްޝަން (އާރުސީސީ)، އެފްޑަބްލިއު ކޮންސްޓްރަކްޝަން އަދި އަމީން ކޮންސްޓްރަކްޝަންއާ އެވެ.
"މި މަޝްރޫއުތައް ނިމުމުން ހުޅުމާލޭ ފޭސް 1، ފޭސް 3 އަދި ވިލިމާލޭގައި 3،200 އަށްވުރެ ގިނަ ހައުސިންގ ޔުނިޓް ކުލި ދައްކައި ޚަލާސްކުރުމުން މިލްކުވާ ގޮތަށް، ނިސްބަތުން ކުޑަ ކުއްޔެއްގައި ދޫކުރުމަށް ވަނީ ހަމަޖެހިފައި،" ބީއެމްއެލްއިން ބުނެފައިވެ އެވެ.
ބޭރު ކުންފުނިތަކާ ހަވާލުކުރި މަސައްކަތްތަކެކޭ އެއްގޮތަށް މި ފްލެޓުތައް އަޅާ އަގުތައް ވެސް ބީއެމްއެލްއިން ހާމައެއް ނުކުރެ އެވެ. މީގެ ކުރިން ބީއެމްއެލްއިން ސޮއިކުރީ ޗައިނާގެ ދެ ކުންފުނި ކަމަށްވާ ބެއިޖިން އާބަން ކޮންސްޓްރަކްޝަން ގްރޫޕް އަދި ޗައިނާ މެޝިނަރީ އިންޖީނިއަރިން ކޯޕަރޭޝަނާ އެވެ.
މީގެ ކުރިން ފްލެޓްތައް އެޅުމަށް ބޭރުގެ ކުންފުނިތަކާ ހަވާލުކުރި ސަބަބާ ގުޅޭގޮތުން ސުވާލުކުރުމުން ބުނީ މަޝްރޫއުތައް ހަވާލުކުރީ ބޭންކުން ކަނޑައަޅާފައިވާ ކޮންޓްރޯލް އަގުތަކެއްގައި ކަމަށެވެ. އެއީ ކޮން އަގުތަކެއް ކަމެއް ނޭނގެ އެވެ.
ޗައިނާއަށް ނިސްބަތްވާ އެ ދެ ކުންފުނިގެ ތެރެއިން ބީޔޫސީޖީއާ 1،117 ފްލެޓް އަޅަން ހަވާލުކުރިއިރު، ސީއެމްއީސީއާ ހަވާލުކުރީ 1،224 ފްލެޓް އެޅުމަށެވެ. ދިވެހި ކުންފުނިތަކުން އަޅާނީ 859 ޔުނިޓެވެ.
އެ ކުންފުނިތަކުގެ ތެރެއިން އާރުސީސީއަކީ މި ސަރުކާރުން އަގުބޮޑު ގިނަ ޕްރޮޖެކްޓުތަކެއް ހަވާލުކޮށްފައިވާ ކުންފުންޏެކެވެ. ގިނައީ، ހުޅުވާލާފައިވާ ބީލަމަކަށް ނުގޮސް، ހާއްސަ އުސޫލުތަކުގެ ތެރެއިން އެ ކުންފުންޏާ ހަވާލުކުރި މަޝްރޫއުތަކެވެ. މިކަމާ ގުޅިގެން ސަރުކާރުގެ ބަހެއް ނުލިބުނު ނަމަވެސް ނާޒިމް މި ނޫހަށް ކުރިން ވިދާޅުވީ، މަސައްކަތް ދެނީ އެ ކުންފުނީގެ ޓްރެކް ރެކޯޑަށް ބަލާފައި ގާބިލުކަމުން ކަމަށެވެ
