މިދިޔަ ދެ އަހަރު ރާއްޖެއަށް އެންމެ ގިނައިން ޓޫރިސްޓުން އައި ގައުމު ކަމަށްވާ ޗައިނާއިން މި އަހަރުގެ މިހާތަނަށް ފަތުރުވެރިންގެ އަދަދު ބޮޑުތަނުން ދަށްވެފައިވާކަން ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފި އެވެ.
އެ މިނިސްޓްރީން އިއްޔެ އާންމުކުރި ތަފާސްހިސާބުތަކުން ދައްކާ ގޮތުގައި ރާއްޖެއަށް އެންމެ ގިނައިން ޓޫރިސްޓުން އަންނަ ގައުމުތަކުގެ ލިސްޓުގައި ޗައިނާ މިވަގުތު އޮތީ ހަތަރު ވަނައިގަ އެވެ. މިދިޔަ އަހަރުގެ ފުރަތަމަ 25 ދުވަސް ނިމުނުއިރު ޗައިނާ އޮތީ އެ ލިސްޓުގެ އެއްވަނައިގަ އެވެ.
ޓޫރިޒަމް މިނިސްޓްރީގެ ނަންބަރުތައް ދައްކާގޮތުން ޖެނުއަރީ 24، ގެ ނިޔަލަށް ޗައިނާއިން ރާއްޖެއަށް އައީ 13،889 ޓޫރިސްޓުންނެވެ. މިދިޔަ އަހަރުގެ ޖެނުއަރީ 25، އާ ހަމައަށް އެ ގައުމުން 23,186 ޓޫރިސްޓުން އައެވެ. މިއީ 10،000 ޓޫރިސްޓުންގެ މަދު ވުމެކެވެ.
މިދިޔަ އަހަރާއި އަޅާބަލާއިރު މި އަހަރު ޗައިނާއިން ރާއްޖެ އަންނަ ޓޫރިސްޓުންގެ ޖުމްލަ އަދަދުގެ ހިއްސާ ވެސް މި އަހަރު ވަނީ ދަށަށް ގޮސްފަ އެވެ. މި އަހަރު ރާއްޖެ އައި ޓޫރިސްޓުންގެ ތެރެއިން ޗައިނާއަށް ނިސްބަތްވަނީ އަށް ޕަސެންޓު މީހުންނެވެ. މިދިޔަ އަހަރު އެ މުއްދަތުގައި އައި ޓޫރިސްޓުންގެ ތެރެއިން 14 ޕަސެންޓު ހިއްސާކުރީ ޗައިނާ އިންނެވެ.
ޗައިނާއިން އައި ޓޫރިސްޓުންގެ އަދަދު ދަށްވި ނަމަވެސް މި މުއްދަތުގައި ރާއްޖެ އައި ޓޫރިސްޓުންގެ ޖުމްލަ އަދަދު ވަނީ އިތުރުވެފަ އެވެ. އެގޮތުން މިދިޔަ އަހަރުގެ މި މުއްދަތުގައި ރާއްޖެއަށް 160,224 ޓޫރިސްޓުން އައި އިރު އެ އަދަދު މި އަހަރު ވަނީ 170,709 އަށް އިތުރުވެފަ އެވެ.
މިއީ 7 ޕަސެންޓުގެ އިތުރުވުމެކެވެ. މިދިޔަ އަހަރުގެ މި މުއްދަތުގައި 2024 އަށްވުރެ 11 ޕަސެންޓު އިތުރަށް ޓޫރިސްޓުން އައެވެ. އެހެންކަމުން އަހަރުން އަހަރަށް ޓޫރިސްޓުން އަންނަ މިންވަރު އިތުރުވުން ވެސް މި އަހަރުގެ ފުރަތަމަ 25 ދުވަހު މި ވަނީ ދަށަށް ގޮސްފަ އެވެ.
ޖުމްލަ ޓޫރިސްޓުންގެ އަދަދު މަދުނުވެ ހިފެހެއްޓުނު މައިގަނޑު ސަބަބަކީ ރަޝިޔާގެ މާކެޓު ކުރިއެރުމެވެ. އެގޮތުން އެ ގައުމުން މިދިޔަ އަހަރަށްވުރެ 5،000 އެއްހާ އިތުރު ޓޫރިސްޓުން މި އަހަރުގެ މި މުއްދަތުގައި ރާއްޖެ އައިސްފައިވެ އެވެ. ލިސްޓުގެ އެއްވަނައިގައި އޮތް ރަޝިޔާއިން މި އަހަރު ރާއްޖެ އައި ޓޫރިސްޓުންގެ 14 ޕަސެންޓު ހިއްސާކުރެ އެވެ.
ދެވަނައިގައި އޮތް އިޓަލީ އަދި ތިންވަނައިގައި އޮތް ޔޫކޭ އިން ވެސް ރާއްޖެއަށް އައި ޓޫރިސްޓުންގެ އަދަދު މިިދިޔަ އަހަރަށްވުރެ ވަނީ އިތުރުވެފަ އެވެ. ނަމަވެސް، އިންޑިއާ އިން އައި ޓޫރިސްޓުންގެ އަދަދު މިދިޔަ އަހަރަށްވުރެ ވެސް ދަށެވެ.
މިދިޔަ އަހަރު ރެކޯޑު އަދަދަކަށް (2.2 މިލިއަން) ޓޫރިސްޓުން އައި ނަމަވެސް، ބަޖެޓުގައި އަންދާޒާ ކުރި ވަރަށް 2.3 މިލިއަން ޓޫރިސްޓުން ނާދެ އެވެ. ނަމަވެސް އަހަރުންއަހަރަށް ބަލާއިރު، ޓޫރިސްޓުން އައި އަދަދު ވަނީ ގާތްގަނޑަކަށް 10 ޕަސެންޓު އިތުރުވެފަ އެވެ.
ސަރުކާރުން ލަފާކުރާ ގޮތުގައި މި އަހަރު ވެސް ޓޫރިޒަމް ސިނާއަތުގެ ހަރަކާތްތެރިކަން އިތުރުވެ، ދުވެލި ބާރު ވާނެ އެވެ. މި އަހަރަށް ފާސްކުރި ބަޖެޓުގައި ހިމަނާފައިވާ އަންދާޒާތަކުން ދައްކާ ގޮތުގައި އަންނަ އަހަރު 2.4 މިލިއަން ޓޫރިސްޓުން އަންނާނެ އެވެ.
