ވޯޓު ގަންނަ ކެންޑިޑޭޓުންނަކީ ރައްޔިތުންގެ ބާރުވެރިކަން ނިގުޅައިގަނެ އެ މީހުންގެ އަމިއްލަ މަސްލަހަތަށް މަސައްކަތް ކުރާ ބައެއް ކަމަށާއި ކުރިއަށް އޮތް ލޯކަލް ކައުންސިލް އިންތިހާބުގެ ދުވަސްވަރު ތާއީދު ހޯދުމަށް ރިޝްވަތު ދީފި ނަމަ ރިޕޯޓު ކުރުމަށް އެންޓި ކޮރަޕްޝަން ކޮމިޝަނުން އެދެފި އެވެ.
އެ ކޮމިޝަނުން މިއަދު ނެރުނު ނޫސްބަޔާނެއްގައި ބުނީ އާންމު އިންތިހާބުތަކާ ދިމާކޮށް އާންމުންގެ ތާއީދު ހޯދުމަށާއި މީހުން ލައްވައި ވޯޓު ލެއްވުމަށް ރިޝްވަތު ދޭކަން ފާހަގަވެފައިވާ ކަމަށެވެ. އަދި އެފަދަ މައްސަލަތައް އިތުރުވަމުން ދިޔުމަކީ ދައުލަތުގެ މުއައްސަސާތަކާއި އިދާރާތަކަށް ރައްޔިތުން ކުރާ އިތުބާރު ގެއްލިގެންދާ ކަމެއް ކަމަށް ވެސް އެ ބަޔާނުގައި ބުންޏެވެ.
ލޯކަލް ކައުންސިލްތަކަށް އިންތިހާބު ކުރާނެ ކެންޑިޑޭޓުން ނިންމާން ޖެހޭނީ ރައްޔިތުން އަމިއްލައަށް ކަމަށާއި ވޯޓު ލާނެ މީހުން ކަނޑައެޅުމުގަ އާއި ވޯޓުލުމުގެ ހައްގު އަދާކުރުމުގައި ނަޒާހާތްތެރިކަން އިސްކުރުމަށް އޭސީސީގެ ބަޔާނުގައި އިލްތިމާސްކޮށްފައިވެ އެވެ.
"ގައުމުގެ މުސްތަގުބަލަށް ވިސްނާ ފިކުރުކޮށް ކޮރަޕްޝަން ހުއްޓުވުމަށް ފަރުދީ ޒިންމާ އަދާކުރުމަކީ މުހިންމު ކަމެކެވެ. ރިޝްވަތުގެ މުއާމަލާތްތަކުގެ ތެރެއިން ވޯޓު ގަނެގެން މަގާމުތަކަށް އިންތިހާބުވާ ކެންޑިޑޭޓުންނަކީ ރައްޔިތުންގެ ހަގީގީ ބާރުވެރިކަން ރައްޔިތުންގެ އަތުން ނިގުޅައިގަނެ، އެ މީހުންގެ އަމިއްލަ މަސްލަހަތަށް މަސައްކަތް ކުރާ ބައެކެވެ،" އޭސީސީގެ ބަޔާނުގައި ބުންޏެވެ.
"ހަމަ އެފަދައިން ރިޝްވަތު ހިފައި، ތިމާއަށް ލިބިފައިވާ އިންތިހާބީ ހައްގު އަމިއްލަ ވަގުތީ ފައިދާއަށްޓަކައި ވިއްކާލުމަކީ ތިމާގެ އަމިއްލަ ނަފުސަށާއި އާއިލާއަށާއި މުޅި މުޖުތަމައުއަށް ވެވޭ ހިޔާނާތެކެވެ."
ރިޝްވަތު ދިނުމާއި ހިފުމަކީ ގާނޫނީ ކުށެއްކަން ހަނދާން ކޮށްދީ އޭސީސީގެ ބަޔާނުގައި ވަނީ އެފަދަ ކަމެއް ފާހަގަކުރެވިއްޖެ ނަމަ ރިޕޯޓު ކުރުމަށް އެދިފަ އެވެ. އަދި އެފަދަ އެއްވެސް މައްސަލައެއް ނުބަލައި ދޫކޮށްނުލާނެ ކަމުގެ ޔަގީންކަން ދޭ ކަމަށް ވެސް އެ ބަޔާނުގައި ބުންޏެވެ.
