ދުނިޔޭގެ މައި ފުޓްބޯޅަ އިދާރާ، ފީފާގެ ބެޖް މި އަހަރަށް ވެސް ދިވެހި 12 ރެފްރީން/އެސިސްޓަންޓް ރެފްރީން ހާސިލްކޮށް، ރާއްޖެ އަށް ކަނޑައަޅާފައި ހުރިހާ ސްލޮޓެއް ފުރިހަމަކޮށްފި އެވެ.
އެ ގޮތުން، މި އަހަރަށް ވެސް ފީފާ ބެޖް ލިބިފައިވަނީ، ހަތް އެސިސްޓަންޓް ރެފްރީންނާއި ފަސް ރެފްރީންނަށެވެ. ފީފާ ބެޖް ހާސިލްކުރި ފަސް ރެފްރީންނަކީ، އާދަމް ފަޒީލް، ޒަހީރު ހުސެއިން، މުހައްމަދު ޖާވިޒް (ޖޭޑް)، އަފްޝީން ނަސީރު އަދި ސިނާން ހުސެއިން އެވެ.
މީގެ ތެރެއިން، ފަޒީލް އާއި ޖޭޑް، ފީފާގެ ބެޖް ހާސިލްކުރީ 2016 ވަނަ އަހަރު އެވެ. އަދި، ސިނާނަށް 2020 ވަނަ އަހަރު ފީފާ ބެޖް ލިބުނުއިރު، ޒަހީރު ވަނީ 2024 ވަނަ އަހަރު ފީފާ ބެޖް ހާސިލްކޮށްފަ އެވެ. އަދި، އެންމެ ފަހުން، ފީފާ ބެޖް ހޯދީ، މިދިޔަ އަހަރު އެ ހާސިލްކުރި އަފްޝީން އެވެ.
ފީފާ ބެޖް ކުރިއަށް އޮތް އަހަރަށް ވެސް ހާސިލްކުރި އެސިސްޓަންޓް ރެފްރީންނަށް ބަލާއިރު، ޖައުފަރު ރަޝީދު، އަހުމަދު އަބްދުﷲ، އަހުމަދު އަފްސަހު، ނިއުޝާދު މުހައްމަދު، އަހުމަދު ހަސަން، އަބްދުﷲ ޝާތިރު އަދި ރައީފް ރައޫފް ހިމެނެ އެވެ.
މީގެ ތެރެއިން، އަފްސަހު އާއި ޖައުފަރު، އެންމެ ފުރަތަމަ ފީފާ ބެޖް ހާސިލްކުރީ 2012 ވަނަ އަހަރު އެވެ. އަހުމަދު އަބްދުﷲ އަށް 2015 ވަނަ އަހަރު ފީފާ ބެޖް ލިބުނުއިރު، އަހުމަދު ހަސަން ބެޖް ހާސިލްކުރީ 2023 ވަނަ އަހަރު އެވެ. އަދި، 2024 ވަނަ އަހަރު ރައީފް އާއި ޝާތިރު ވަނީ ފީފާ ބެޖް ހާސިލްކޮށްފަ އެވެ.
ރާއްޖޭގެ ރެފްރީން އަންނަނީ ބައިނަލްއަގުވާމީ ލެވަލްގައި، ގިނަ މުބާރާތްތަކެއްގައި ރެފްރީކަން ކުރަމުންނެވެ.
