ލަންޑަން (ޑިސެމްބަރު 25) - ދާދި ފަހުން ވަޒީފާ އިން ވަކިކުރި އިނގިރޭސި ރެފްރީ، ޑޭވިޑް ކޫޓް އަށް އަލުން ވަޒީފާ ހޯދަން ލިބިފައި އޮތް އެޕީލްކުރުމުގެ ފުރުސަތު ދޫކޮށްލަން ނިންމައިފި އެެވެ.
ކޫޓްގެ ފަރާތުން ފެނުނު ލިވަޕޫލާއި އެ ޓީމުގެ ކުރީގެ ކޯޗު ޔާގެން ކްލޮޕާ ބެހޭގޮތުން ބަދުބަސްތަކެއް ބުނާ ވީޑިއޯއެއްގެ މައްސަލަ އާއި މަސްތުވާތަކެތި ބޭނުންކުރާ ވީޑިއޯގެ މައްސަލައިގައި ކޫޓް ވަޒީފާ އިން ވަކިކުރަން ނިންމީ ހުރިހާ ގޮތަކުން ބެލުމަށް ފަހު އެެވެ.
ޓް، 42، ގެ ވައިރަލްވި މި ވީޑިއޯގައި އޭނާ ވަނީ، 2020 ވަނަ އަހަރު ލިވަޕޫލާއި ބާންލީ ކުޅުނު މެޗުގައި ޓަޗްލައިންގައި ހިނގައިދިޔަ ކަންތައްތަކެއްގެ ވާހަކަ ދައްކައި، ލިވަޕޫލްގެ އޭރުގެ ކޯޗު ކްލޮޕާ ބެހޭގޮތުން ބޭއަދަބީ ބަސް ބޭނުންކޮށް ވާހަކަ ދައްކައިފަ އެވެ. އަދި އެ ވާހަކަތަކަށް ފަހު، ކޫޓް ވަނީ ޖުމްލަކޮށް މުޅި ލިވަޕޫލާ މެދު އޭނާ ހިތުގައި ނަފްރަތު އޮތް މިންވަރު ދޭހަވާ ގޮތަށް، ބޭއަދަބީ އިބާރާތް ބޭނުންކޮށް ވާހަކަ ދައްކައިފަ އެވެ.
އޭގެ ފަހުން، މި ފަހަރުގެ ޔޫރޯ ފުޓްބޯޅަ މުބާރާތުގެ ތެރެއިން، ރެފްރީ ކޫޓް، ޑްރަގް ބޭނުންކުރާ ވީޑިއޯ އެއް ވައިރަލްވެ، އޭގެ މައްސަލަ ޔުއެފާ އިން ތަހުގީގުކުރަން ފެށި އެވެ. ކޫޓް މަސްތުވާތަކެތި ބޭނުންކުރި މި ވީޑިއޯ ނަގާފައިވަނީ، ކޫޓް މި ފަހަރުގެ ޔޫރޯގައި މަސައްކަތްކުރި މެޗު ނިމުނުތާ އެއް ދުވަސް ފަހުންނެވެ. ކޫޓް، މި ފަަހަރުގެ ޔޫރޯގައި މަސައްކަތްކުރީ، ވީޑިއޯ އެސިސްޓަންޓް ރެފްރީ (ވީއޭއާރް) ގަ އެވެ. އޭނާގެ ފަހު މެޗަކީ، ކުއާޓާ ފައިނަލުގައި ފްރާންސާއި ޕޯޗުގަލް ކުޅުނު މެޗުގަ އެވެ.
ރެފްރީންގެ އިސް ޖަމިއްޔާ، ޕްރޮފެޝަނަލް ގޭމްސް އޮފިޝަލްސް ލިމިޓެޑް (ޕީޖީއެމްއޯއެލް) އިން ކޫޓްގެ ކޮންޓްރެކްޓް ނިމުމަކަށް ގެނައީ ބަލަންޖެހޭ މިންގަނޑުގެ ތެރެއިން ހުރިހާ ކަމެއް ކަށަވަރުކުރުމަށް ފަހު އެވެ. ކޫޓް ވަޒީފާ އިން ވަކިކުރަން ނިންމި އެންމެ ބޮޑު ސަބަބަކީ ރެފްރީންގެ އިންޓަގްރިޓީ ހިފެހެއްޓުމަށް ކަމަށް ޕީޖީއެމްއޯއެލް އިން ވަނީ ބުނެފަ އެވެ.
ކޫޓް އަށް އޭނާގެ ހައްގުގައި ޕީޖީއެމްއޯއެލްގެ ނިންމުމާ ދެކޮޅަށް އެޕީލްކުރުމުގެ ފުރުސަތު އޮތެވެ. އެކަމަކު ކޫޓް ނިންމީ ޕީޖީއެމްއޯއެލްގެ ނިންމުން ބަަލަައިގަތުމަށެވެ.
ޔޫރަޕްގެ މައި ފުޓްބޯޅަ އިދާރާ ޔުއެފާ އިން އަދިވެސް އަންނަނީ ކޫޓްގެ މި މައްސަލަތައް ތަހުގީގު ކުރަމުންނެެވެ.
