އަންނަ ހޮނިހިރު ދުވަހު މާލޭގައި ފަށާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ)ގެ ވިމެންސް ކަޕްގައި ރަން މެޑަލް ހޯދުމަށް ގައުމީ އަންހެން ޓީމުގެ ވަރަށް ބޮޑު އަމާޒެއް އެބައޮތް ކަމަށް ޓީމުގެ ކޯޗު މުހައްމަދު ނަދީމް (ނަދީމްބެ) ބުނެފި އެވެ.
ގައުމީ އަންހެން ވޮލީބޯޅަ ޓީމުގެ ކޯޗުކަމާ މިދިޔަ އޮކްޓޫބަރު މަހު ހަވާލުވި ނަދީމްބެ ކޯޗުކަމުގައި ޓީމުގެ ފަރިތަކުރުންތައް ފަށައިގެން، ޓީމުގެ ސްކޮޑު 14 އަށް ކުޑަކުރުމަށް ފަހު، ދާދި ފަހުން ތައިލެންޑްގެ ވެރިރަށް ބެންކޮކްގައި ހަތް ދުވަހުގެ ޓްރެއިނިން ކޭމްޕެއް ވަނީ ބައްވައިފަ އެވެ.
ސީނިއާ އާއި ޖޫނިއާ ކުޅުންތެރިންގެ މައްޗަށް އެކުލެވޭ ސްކޮޑެއް ގޮވައިގެން، ތައިލެންޑްގައި ރަނގަޅު ގިނަ ޓްރެއިނިންތަކެއް ކުރިއަށްގެންދެވުނުއިރު، މެޗު ހާލަތްތަކަށް ތައްޔާރުވުމަށްޓަކައި، އެކި ވިސްނުންތަކާ އެކު ވެސް ޓްރެއިނިން ރޭވުނުކަން ނަދީމްބެ ފާހަގަކުރި އެވެ.
"ތައިލެންޑް ބައެއް ކުޅުންތެރިން އިދިކޮޅު ޓީމަށް އަރުވައިގެން، ދިވެހި ކުޅުންތެރިންނާ އެއްކޮށް ވެސް ޕްރެކްޓިސްތަކުގައި އެ ގޮތަށް ގޭމް ސިޓުއޭޝަން ގޮތަށް ހަމަ ޕްރެކްޓިސްތަކެއް ކުރެވުނު،" ނަދީމްބެ، "އަދަދު ސްޕޯޓްސް" އަށް ދިން އިންޓަވިއުއެއްގައި ބުންޏެވެ.
"ނަތީޖާ، އިންޝާﷲ ވަރަށް ރަނގަޅު ކަމަށް މި ފެންނަނީ،"
ގައުމީ އަންހެން ވޮލީބޯޅަ ޓީމުން ވަނީ ތިން މުބާރާތެއްގައި ރިހި މެޑަލް ހޯދައިފަ އެވެ. އެންމެ ފުރަތަމަ 2019 ވަަނަ އަހަރު ނޭޕާލްގައި ބޭއްވި ސެންޓްރަލް ޒޯން އަންހެން މުބާރާތުންނެވެ. އޭގެ ފަހުން، 2023 ވަނަ އަހަރު މާލޭގައި ބޭއްވި ފޯ ނޭޝަންސް ކަޕުންނެވެ. އަދި އެންމެ ފަހުން، މިދިޔަ އަހަރު ކާވާ ޗެލެންޖް ކަޕްގަ އެވެ.
ތުރުކުމެނިސްތާން ވަކިވުމާ އެކު، ކާވާ ވިމެންސް ކަޕްގައި، ރާއްޖޭގެ އިތުރުން ދެން ކުޅެނީ ބަންގްލަދޭޝާއި ކިރްގިސްތާން އަދި އަފްގާނިސްތާން އެވެ.
ނަދީމްބެ ބުނީ، މުބާރާތުގައި ވާދަކުރަނީ ރާއްޖެއާ އަޅާކިޔާއިރު ނިސްބަތުން ރަނގަޅު ޓީމުތައް ކަމަށެވެ. ފާއިތުވި އަހަރުތަކުގައި އަންހެން ވޮލީ ޓީމުން ހޯދަމުން އަންނަ ކުރިއެރުންތަކަށް ބަލާއިރު މިހާރު މަދުވަނީ، ރަން މެޑަލެއް ކަމަށް ނަދީމްބެ ވަނީ ބުނެފަ އެވެ.
"ދެން، ހުރިހާ ކުޅުންތެރިންގެ ވެސް ވަރަށް ބޮޑު އުންމީދެއް އެއީ އެ (ފައިނަލުގައި ބަލިވުން) ބަދަލުކުރެވޭނެ ގޮތެއް ބަލަން، އެ އަޒުމުގައި ވަރަށް ބޮޑަށް މަސައްކަތްކުރާތަން މި ފެންނަނީ، ހާއްސަކޮށް ސީނިއާ ކުޅުންތެރިންގެ ފަރާތުން، މިކަމަށް އެދިގެން މަސައްކަތްކުރާތަން އެބަ ފާހަގަކުރެވޭ،" ނަދީމްބެ ބުންޏެވެ.
"އެސޯސިއޭޝަންގެ ވެސް އެންމެ ބޮޑު ފޯކަސް އަކީ، ފައިނަލަށް ދިޔަސް، ގޯލްޑް މެޑަލް އެއް އެޅުވޭނެ ވަގުތެއް އަވަހަށް ފެނިގެންދިއުން، އެ އަޒުމުގައި މި ފެށުނުއިރުއްސުރެން މި މަސައްކަތްކުރަނީ،"
ނަދީމްބެ ބުނީ، ފައިނަލުގައި އެ ކުރިމަތިވާ ޕްރެޝަރު ހާލަތަށް ތައްޔާރުވެ، ނަތީޖާ ނެރޭ ސެޓުގެ އެ ޕޮއިންޓްތައް ހޯދާނެ ގޮތްތަކާ ބެހޭގޮތުން ވެސް ވާހަކަ ދެކެވި، ކޮންމެ ޕޮއިންޓެއް ވެސް ހޯދުމުގެ މުހިންމުކަން ކުޅުންތެރިންނަށް ވިސްނައިދެމުން އަންނަ ކަމަށެވެ.
އަރަމުން އަންނަ ޒުވާން އަންހެން ވޮލީބޯޅަ ކުޅުންތެރިން ފާއިތުވި އަހަރުތަކުގައި ބޭއްވި ކާވާގެ އުުމުރުފުރާ މުބާރާތްތަކުގައި ކުޅެ، ތަޖުރިބާ ހޯދާފައިވާކަން ނަދީމްބެ ފާހަގަކުރި އެވެ. އޭގެ ސަބަބުން، ސީނިއާ ގައުމީ ޓީމަށް ވެސް ފައިދާތަކެއް ކުރާކަމަށް ނަދީމްބެ ބުނެފައިވެ އެވެ.
"އެ ކުދިންގެ ލޯ ހުޅުވުމާއި ގޭމް ސިޓުއޭޝަން އަށް ތައްޔާރުވުމާ ސީނިއާ ކުޅުންތެރިންނާ އެއްކޮށް ވާދަކުރަން އެ ރޫހު އާ ވުމާ އެ ކަހަލަ ވަރަށް ގިނަ ކަންތައް އެބަ ކުރެވޭ،" ނަދީމްބެ ބުންްޏެވެ.
ކާވާ ވިމެންސް ކަޕްގައި ކުޅޭ ރާއްޖޭގެ އަންހެން ވޮލީބޯޅަ ޓީމުގެ ކުޅުންތެރިންނާއި އޮފިޝަލުން ފޮޓޯ އަކަށް ހުއްޓިލައިގެން.--- ފޮޓޯ: ރާއިފް ޔޫސުފް / އަދަދު ސްޕޯޓްސް
ރާއްޖޭގެ ކުޅިވަރުގައި މަތީ ފަންތީގައި އެކި ކުޅިވަރުތަކުގައި މަސައްކަތްކޮށްފައިވާ ނަދީމްބެ ބުނީ، ރާއްޖޭގެ ކުޅިވަރުގެ ތާރީހުގައި ވެސް އެންމެ ބޮޑު ބައެއް އަދާކުރާ ބަަޔަކީ ސަޕޯޓަރުން ކަމަށެވެ.
"އަޅުގަނޑުމެން ކުޅިވަރު ކުޅުނުއިރު ވެސް ފުޓްބޯޅަ އެއްޗެހި ވޮލީބޯޅަ އެއްޗެހި ކުޅުނުއިރު ވެސް ހަމަ ސަޕޯޓަރުންގެ ލޯތްބާއި އިހުތިރާމް، އެ ސަޕޯޓް ނުލިބި ކާމިޔާބެއް ހާސިލްކުރަން ވަރަށް އުނދަގޫވާނެ،" ނަދީމްބެ ބުންޏެވެ.
އެ ގޮތުން، ރާއްޖޭގެ ވޮލީބޯޅަ އަށް ވެސް ސަޕޯޓަރުންގެ ހިތުގައި އޮތް ލޯތްބާއި ޝައުގުވެރިކަން ސޯޝަލް ސެންޓަރުން ފެނިގެންގޮސްފައިވާ ކަމަށާއި އުންމީދަކީ، މި ފަހަރު ކުރިއަށް ވުރެން އެތައް ގުނައެއް ރަނގަޅުވެގެން ދިއުން ކަމަށް ނަދީމްބެ ވަނީ ބުނެފަ އެވެ.
"މި ފަހަރު މިއީ އިތުރަށް ހިތްވަަރެއް ލައިގެން މި ސަޕޯޓަރުންގެ ސަޕޯޓް އިތުރުކޮށްގެން މޮޅުވާން ބޭނުންވާ އެ އިތުރު ޕޮއިންޓް ކޮޅު ހޯދަން ޓީމާ އެއްކޮށް ސަޕޯޓަރުންގެ ވަރަށް މުހިންމު ފަހަރަކަށްވާނެ،" ނަދީމްބެ ބުންޏެވެ.
ކާވާ މުބާރާތުގައި ވާދަކުރާ ގައުމީ އަންހެން ވޮލީ ޓީމުގެ ސްކޮޑުގައި ހިމެނެނީ، ފާތިމަތު ޖޫޒާން ޒަރީރު، ފާތިމަތު އަނާލް، އައިމިނަތު ޝަހާ ޝާމިން، އައިމިނަތު އަރީޝާ، ހައްވާ ސަހާ، މަރިޔަމް އަޒުމާ، މާޔާ ހުސެއިން ސޮލާހު، ހައްވާ ރާޝިދާ، ނަރީމާ އިދުރީސް، މައިހާ އަލީ، އައިމިނަތު މާނާ ނާޒިމް، ހައިފާ އިމާދު، މަނާލް އިސްމާއިލް ރަޝީދު އަދި މަރިޔަމް ރިޝްފާ އެވެ.
ޓީމުގެ ކޯޗަކަށް ނަދީމްބެ ހުރިއިރު، އެސިސްޓަންޓް ކޯޗަކީ، ފަތުހުﷲ ވަހީދު (ފައްލޯ) އާއި އައިމިނަތު ޒީނާ އެވެ. އަދި، މެނޭޖަރަކަށް އިބްރާހިމް ނާފިއު ހުރިއިރު، ޓީމުގެ ޑޮކްޓަރަކީ، ޑރ. ޝަރަންޕްރީތު ކޯރް އެވެ.
ރާއްޖޭން މުބާރާތުގައި ކުޅޭ ފުރަތަމަ މެޗުގައި، އަންނަ ހޮނިހިރު ދުވަހުގެރޭ ބަންގްލަދޭޝާ ކުޅޭނެ އެވެ. ދެ ވަނަ މެޗުގައި އާދިއްތަ ދުވަހުގެރޭ، އަފްގާނިސްތާނާ ކުޅޭއިރު، ލީގު ބުރުގެ ފަހު މެޗުގައި ކިރްގިސްތާނާ ބައްދަލުކުރާނީ ހޯމަ ދުވަހުގެރޭގަ އެވެ. އެ އަށް ފަހު ލީގު ބުރު ނިމޭއިރު، އެއް ދުވަހުގެ މެދުކެނޑުމަކަށް ފަހު އޮންނާނީ، ސެމީ ފައިނަލެވެ.
ސެމީ ފައިނަލުގައި، ލީގު ބުރުގެ އެއް ވަނަ ކުޅޭނީ ހަތަރު ވަނައާ އެވެ. އަދި، ދެ ވަނަ ނުކުންނާނީ ތިން ވަނައާ ދެކޮޅަށެވެ. އެ މެޗުތަކުން މޮޅުވާ ޓީމުތައް ފައިނަލަށް ދަތުރުކުރާއިރު، ބަލިވާ ޓީމުތައް ކުޅޭނީ ތިން ވަނަ ހޮވާ މެޗުގަ އެވެ. ފައިނަލް މެޗާއި ތިން ވަނަ ހޮވާ މެޗު އޮންނާނީ، އަންނަ ހަފްތާގެ ބުރާސްފަތި ދުވަހު އެވެ.
