ރަނގަޅު ގޮތަކީ ސޯލިހާއި އަޅުގަނޑު 2028 ގައި ވާދަނުކޮށް އެހެން ކެންޑިޑޭޓެއްގެ ފަހަތަށް އެރުން: ނަޝީދު

2022 ވަނަ އަހަރު ބޭއްވި އެމްޑީޕީ ކޮންގްރެސްގައި ސޯލިހާއި ނަޝީދު. އެ ކޮންގްރެސް ނިންމާލީ ދެ ރައީސުންގެ މެދުގައި އޮތް ނުތަނަވަސްކަން ހައްލު ކުރުމަށް އެއްބަސްވެގެން ކަމަށް އޭރު ހުންނެވި އެ ޕާޓީގެ ޗެއާޕާސަން ފައްޔާޒު ވަނީ ވިދާޅުވެފައި --- ފޮޓޯ: އަދަދު ފައިލް

2022 ވަނަ އަހަރު ބޭއްވި އެމްޑީޕީ ކޮންގްރެސްގައި ސޯލިހާއި ނަޝީދު. އެ ކޮންގްރެސް ނިންމާލީ ދެ ރައީސުންގެ މެދުގައި އޮތް ނުތަނަވަސްކަން ހައްލު ކުރުމަށް އެއްބަސްވެގެން ކަމަށް އޭރު ހުންނެވި އެ ޕާޓީގެ ޗެއާޕާސަން ފައްޔާޒު ވަނީ ވިދާޅުވެފައި --- ފޮޓޯ: އަދަދު ފައިލް

ދިވެހިރާއްޖެއަށާއި އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އަށް އެންމެ ރަނގަޅު ގޮތަކީ 2028 ވަނަ އަހަރުގެ އޮންނަ ރިޔާސީ އިންތިހާބުގައި ކުރީގެ ރައީސް އިބްރާހިމް މުހައްމަދު ސޯލިހާއި އެމަނިކުފާނު ވާދަނުކޮށް އެހެން ކެންޑިޑޭޓެއްގެ ފަހަތަށް އެރުން ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ރާއްޖޭގެ އެންމެ ގިނަ ދުވަސްވީ ޕާޓީގެ ތެރޭގައި ރިޔާސީ ޓިކެޓުގެ ބަހުސް އަލުން ފެށިފައި މިވަނީ އެ ޕާޓީގެ ޗެއާޕާސަންކަމުން ފައްޔާޒު އިސްމާއީލް އިސްތިއުފާ ދެއްވުމުންނެވެ. އޭނާގެ އިސްތިއުފާ ސިޓީގައި ވަނީ ދެ ރައީސުންގެ މެދުގައި އޮތް ނުތަނަވަސްކަން ހައްލުކުރުމަށް ޗެއާޕާސަންގެ ހައިސިއްޔަތުން ކުރެއްވި ބައެއް ކަންކަން ހާމަކުރައްވައިފަ އެވެ.

"އަޅުގަނޑު ކުރިމަތި ނުލައި ރައީސް ސޯލިހުއަށް ފުރުސަތު ދިނުމަށް ދެ ފަހަރު މަސައްކަތް ކުރިން. ރައީސް ސޯލިހުގެ ބައެއް އަރިސް ބޭފުޅުންނަށާއި ރައީސް ސޯލިހުއަށް އެ ގޮތް ކަމުނުގޮސް، އަޅުގަނޑުމެން ނުލާ އިންތިހާބު ކާމިޔާބުވާނެ ކަމަށް މާ ބޮޑަށް ދެކެވި މުޅި ކަން ހަރާބުވެގެން ދިޔައީ،" އެމްޑީޕީގެ ގައުމީ މަޖިލީހުގެ އެހަރާއި މިހާރުގެ މެންބަރުން ތިއްބަވާ ގްރޫޕެއްގައި ނަޝީދު އިއްޔެ ލިޔުއްވި އެވެ.

Advertisement

ރިޔާސީ އިންތިހާބުގައި އެމްޑީޕީގެ ފަރާތުން ސޯލިހު ވާދަކުރެއްވުމަށާއި، ރާއްޖޭގައި އޮންނަން ފެންނަ ވެރިކަމުގެ ނިޒާމާމެދު ރިޔާސީ އިންތިހާބުގެ ކުރިން ވޯޓެއް ނެގުމަށާއި އެ ވޯޓުގައި އެމްޑީޕީން ވަކި ކޮޅެއް ނުނެގުމަށް ދެ ރައީސުންގެ މެދުގައި އެއްބަސްވުމަކަށް އާދެވުނު ކަމަށް ފައްޔާޒުގެ އިސްތިއުފާ ސިޓީގައި ލިޔުއްވާފައިވެ އެވެ.

ނަމަވެސް މި ޝަރުތުތަކަށް އެއްބަސްވުމަށްފަހު ވެސް އޭގެ ދުވަސްކޮޅެއް ފަހުން އެމްޑީޕީގެ ބައެއް އިސް ބޭފުޅުންނަށް ގަބޫލުކުރެވުނީ ރައީސް ނަޝީދާއެކު އެއްބަސްވެވުނު ގޮތަށް ކުރިއަށް ނުދިއުމަށް ކަމަށް ފައްޔާޒުގެ ސިޓީގައި ވިދާޅުވެފައި ވެ އެވެ. ނަތީޖާއެއްގެ ގޮތުން ޕްރައިމަރީގައި އެ ދެބޭފުޅުން ވެސް ވާދަކުރެއްވީ އެވެ.

"މަނިކުފާނު ހުށަހެޅުއްވީ ހަމައެކަނި ނިޒާމީ ވޯޓަށްތޯ؟ އޭގެ ތަފްސީލު ކޮންމެވެސް ދުވަހަކުން އެނގޭނެ ކަމަށް، އެކަމަށް އެކަނިތޯ އެއްބަސް ނުވެވުނީ،" ނަޝީދުއަށް ސުވާލެއް އަމާޒު ކުރައްވަމުން ހުޅުމާލޭ ދާއިރާގެ ކުރީގެ މެންބަރު އަދި ސޯލިހުގެ ކޮއްކޮ އަލީ ނިޔާޒު ވިދާޅުވި އެވެ.

އެ ސުވާލަށް ޖަވާބު ދެއްވަމުން ނަޝީދު ވަނީ ހުށަހެޅީ އެމަނިކުފާނު ކުރިމަތިނުލާ ގޮތަށް ކަމަށް ވިދާޅުވެފަ އެވެ. ނިޔާޒު ވަނީ އެ ހުށަހެޅުމާ ދެބަސް ނުވާ ކަމަށާއި އެ ހުށަހެޅުމުގައި އެއްބަސް ނުވެވޭ އެހެން ކަންކަން ހުރި ކަމަށް އެނގޭ ކަމަށް ވިދާޅުވެފަ އެވެ.

އެއްބަސްވުމަށް އަމަލުނުކުރުމަށް ސޯލިހު ނިންމެވި ކަމަށް ނަޝީދު ވިދާޅުވެފައިވާތީ ނިޔާޒު ވަނީ ސޯލިހުގެ ބޮލުގައި އެފަދަ އިލްޒާމެއް އެޅުވުމުން އެމަނިކުފާނު ވިދާޅުވާ އެއްޗެއް ވެސް އެނގެން ބޭނުންވާ ކަމަށް އެ ގްރޫޕްގައި ލިޔުއްވާފަ އެވެ.

"އެމްޑީޕީ އަށާއި ރާއްޖެއަށް އެންމެ ރަނގަޅު ވާނީ ރައީސް އިބޫ ވެސް އަދި އަޅުގަނޑު ވެސް 2028 ގެ ރިޔާސީ އިންތިހާބަށް ވާދަނުކުރަން. އަޅުގަނޑުމެން އެންމެން އެއް ކެންޑިޑޭޓެއް ފަހަތަށް އެރުން،" ނަޝީދު ވިދާޅުވި އެވެ.

އެ ގްރޫޕަށް ހަވީރު ފޮނުވި މެސެޖެއްގައި އެމްޑީޕީގެ އެޑްވައިޒަރުގެ މަގާމުގައި ހުންނެވި ސޯލިހު ވަނީ 2023 ގެ އިންތިހާބާ ގުޅޭގޮތުން އެ ގްރޫޕުގައި ދެކެވުނީ ވާހަކައިގެ އެއްބައި ކަމަށް ވިދާޅުވެފަ އެވެ.

"އޭގެ ހުރިހާ ތަފްސީލުތަކެއް އަޅުގަނޑު ނުދައްކައި މި ހުރީ މަސްލަހަތަށް ޓަކައި. މީ އެންމެން އެކުގާ ޕާޓީއާއިގެން ކުރިއަށްދާންވީ ވަގުތު ކަމަށް އަޅުގަނޑު ދެކެން،" ސޯލިހު ލިޔުއްވި އެވެ.

ނަޝީދު ވަނީ އެމްޑީޕީގެ އިސް ބައެއް ބޭފުޅުން ދެ ފަރާތާ ވާހަކަ ދައްކަން އެދިވަޑައިގަންނަވާ ކަމަށް ވިދާޅުވެފަ އެވެ. އެމަނިކުފާނު ހުށަހެޅުއްވި ނަންތަކުގެ ތެރޭގައި ނިޔާޒު އާއި ކުރީގެ މިނިސްޓަރުން ކަމަށްވާ މާރިޔާ އަހްމަދު ދީދީ އާއި މުހައްމަދު އަސްލަމް ހިމެނެ އެވެ.

ނަޝީދާއި ސޯލިހު ވެސް ވަނީ ދެ އިންތިހާބެއްގައި އެމްޑީޕީގެ ރިޔާސީ ޓިކެޓުގައި ވާދަކުރައްވައިފަ އެވެ. އެ ގޮތުން، ރާއްޖޭގައި ބޭއްވި ފުރަތަމަ ޑިމޮކްރަޓިކް އިންތިހާބު ކާމިޔާބުކޮށް 2008 ވަނަ އަހަރު އެމްޑީޕީގެ ފުރަތަމަ ސަރުކާރުގައި ރައީސްކަން ކުރެއްވީ ނަޝީދު އެވެ. އޭގެ 10 އަހަރު ފަހުން 2018 ގައި އޮތް އިންތިހާބު ކާމިޔާބުކޮށް އެމްޑީޕީގެ ދެވަނަ ސަރުކާރުގައި ރައީސްކަން ކުރެއްވީ ސޯލިހު އެވެ.

ނަމަވެސް، ދެ ބޭފުޅުންނަށް ވެސް ވާދަކުރެއްވި ދެވަނަ ރިޔާސީ އިންތިހާބު ކާމިޔާބެއް ނުކުރެވެ އެވެ. 2013 ގައި ޕީޕީއެމްގެ ކެންޑިޑޭޓު ކުރީގެ ރައީސް އަބްދުالله ޔާމީންއާ ވާދަކޮށް ނަޝީދު ބަލިވިއިރު 2023 ގައި ސޯލިހު ބަލިވީ ޕީޕީއެމް/ޕީއެންސީގެ ކެންޑިޑޭޓު މިހާރުގެ ރައީސް މުހައްމަދު މުއިއްޒުއާ ވާދަކޮށެވެ.

އެ ޕާޓީއަށް 2023 ގައި އޮތް ރިޔާސީ އިންތިހާބު ގެއްލުމުގައި އެންމެ ބޮޑު އެއް އަސްލަކީ ރައީސްކަން ކުރެއްވި އެ ދެ ބޭފުޅުންގެ މެދުގައި އުފެދުނު ނުތަނަވަސްކަމާއި ހިޔާލު ތަފާތުވުންތަކެވެ. ޖެނުއަރީ، 2023، ގައި އޮތް ޕްރައިމަރީން ބަލިވުމާއެކު ނަޝީދު އެމްޑީޕީއާ ފެއަށް ޖެހި އާ ޕާޓީއެއް އުފެއްދެވި ނަމަވެސް އަލުން އަނބުރާ މި އަހަރުގެ ތެރޭ އެމްޑީޕީއާ ވަނީ ގުޅިވަޑައިގެންފަ އެވެ.

ކޮމެންޓް

ފަހުގެ ޚަބަރު

ވަޒީފާގެ ބިރުދައްކައިގެން އެއްލައްކަ މެންބަރުން ހަމަކޮށްފި

ސަރުކާރު ހިންގާ ޕީއެންސީގެ މެންބަރުންގެ އަދަދު އެއްލައްކައަށް އަރާފައިވާއިރު، މިއީ ވަޒީފާގެ ބިރުދައްކައިގެންނާއި ރިޝްވަތު ދީގެން ހޯދި އަދަދެއް ކަމަށް ވަނީ ތުހުމަތުކުރެވިފައި. އިލެކްޝަންސް ކޮމިޝަނުގެ ދަފްތަރުން ދައްކާގޮތުގައި މިދިޔަ އަހަރާ އަޅާބަލާއިރު އެ ޕާޓީގެ މެންބަރުންގެ އަދަދު ވަނީ 26،000 އަށްވުރެ އިތުރުވެފައި.

ހިދުމަތުގެ އެންމެ މަތީ ޝަރަފު މުހައްމަދު ރަޝީދާއި އައްބާސަށް

ދައުލަތަށް ހިދުމަތް ކުރުމުގެ އެންމެ މަތީ ޝަރަފު، މުހައްމަދު ރަޝީދު އިބްރާހީމާއި އައްބާސް އިބްރާހީމަށް ވަނީ އަރުވާފައި. މުހައްމަދު ރަޝީދަށް މި ޝަރަފު އެރުވީ ދީނީ ރޮނގުން ކުރެއްވި ހިދުމަތްތަކަށް ކަމަށްވާއިރު، އައްބާސް އިބްރާހީމަށް މި ޝަރަފު އެރުވީ ދިވެހިބަހާއި އަދަބިއްޔާތުގެ ދާއިރާއިން.

އާންމުންގެ ތަނަވަސްކަން ހުއްޓުވަނީ ރާއްޖެ ނިކަމެތިކުރުން: ނަޝީދު

ރަސްމާލެ މަޝްރޫއު އީގަލް ހިލްސް ކުންފުންޏާ ހަވާލުކުރުމާ ދެކޮޅަށް އެމްޑީޕީން ކުރާ މަސައްކަތަކީ އާންމު ރައްޔިތުންނަށް ލިބެން އޮތް ތަނަވަސްކަން ހުއްޓުވައި ރާއްޖެ ނިކަމެތިކުރުމަށް ޖަހާ މަޅިއެއް ކަމަށް ނަޝީދު ވިދާޅުވި.

ޖޭޕީ، އަދާލަތު، އެމްޑީއޭ އަދި އެމްއެންޕީން މެންބަރުން ވަކިވަނީ

އިލެކްޝަންސް ކޮމިޝަނުގެ ދަފްތަރުން ދައްކާގޮތުގައި ޖޭޕީ، އެމްޑީއޭ، އަދާލަތު އަދި އެމްއެންޕީން ގިނަ އަދަދެއްގެ މެންބަރުން ވަނީ ވަކިވެފައި. މީގެ ބަދަލުގައި ސަރުކާރު ހިންގާ ޕީއެންސީއާއި އިދިކޮޅު އެމްޑީޕީގެ މެންބަރުންގެ އަދަދު ބޮޑުތަނުން އިތުރުވި. އެންމެ ގިނަ މެންބަރުން ވަކިވީ ޖޭޕީން ކަމަށްވާއިރު، އެންމެ ގިނަ މެންބަރުން އަލަށް ގުޅުނީ ޕީއެންސީއާ

އިސްތިއުނާފު ލަސްވާ މައްސަލައިގައި ޖޭއެސްސީ ހާޒިރުކުރަނީ

ޖަލު ހުކުމް ތަންފީޒުކޮށް ނިމޭއިރުވެސް އިސްތިއުނާފު މަރުހަލާ ނުނިމޭ މައްސަލައަށް ގާނޫނީ ހައްލެއް ހޯދުމަށް ޖޭއެސްސީ މަޖިލީހުގެ ޖުޑިޝަރީ ކޮމިޓީއަށް ހާޒިރުކުރުމަށް ވަނީ ފާސްކޮށްފަ. އިސްތިއުނާފު މައްސަލަތައް ނިންމަންޖެހޭ ވަކި މުއްދަތެއް ގާނޫނުގައި ނެތުމުގެ ސަބަބުން ކުށްވެރިންގެ އަސާސީ ހައްގުތައް ގެއްލެމުންދާކަން މެންބަރުން ފާހަގަކުރެއްވި.

"ބިން ދީ ދީނާއި މިނިވަންކަން ގެއްލުވާ ވެރިޔަކު އަދި މި ނޫނީ ނާދޭ"

ބޭރު މީހުންނަށް ބިން މިލްކުކުރެވޭ ގޮތަށް ސަރުކާރުން ނިންމާފައިވާ ނިންމުމަކީ ރާއްޖޭގެ ދީނީ ވަހުދަތާއި މިނިވަންކަމަށް އޮތް ބޮޑު ނުރައްކަލެއް ކަމަށާއި މި ނިންމުމުގެ ސަބަބުން ރާއްޖޭގެ ބިންތަކުގެ މިލްކުވެރިކަން އެހެން ދީންތަކުގެ މީހުންނަށް ލިބިދާނެ ކަމުގެ ބިރު އޮތްކަން ފާހަގަކުރައްވައި، ގައުމު ދިފާއުކުރުމަށް ނުކުތުމަށް ޖަމީލު ގޮވާލައްވައިފިއެވެ.

ސުޕްރީމް ކޯޓުގެ ފަނޑިޔާރުންނަށް އޮނަރަބަލް ކިޔަން އަންގައިފި

ސުޕްރީމް ކޯޓުގެ ފަނޑިޔާރުންނާ މުހާތަބުކުރާއިރު "އޮނަރަބަލް" ކިޔުމަށް ޖޭއެސްސީން ރަސްމީކޮށް އަންގައި ސާކިއުލާއެއް ވަނީ ނެރެފައި. މި ބަދަލާއެކު ފަނޑިޔާރުންގެ ނަމުގެ ކުރިއަށް "އަލްއުސްތާޒް" ބޭނުންކުރުން ހުއްޓާލަން ޖެހޭއިރު، މިއީ މީގެ ކުރިން އަމަލުކުރަމުން އައި އުސޫލަށް ގެނައި ރަސްމީ ބަދަލެއް.

Newsletter

Get the latest news delivered straight to your inbox