ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން ގައުމީ އަންހެން ޓީމުގެ ކޯޗުގެ މަގާމާއި އެސޯސިއޭޝަންގެ ހިންގާ ކޮމިޓީގެ މަގާމުގައި ހުރި ސޮފްވާން ފަސް އަހަރަށް ސަސްޕެންޑްކޮށްފި އެވެ.
ވީއޭއެމް އިން މިއަަދު ނެރުނު ބަޔާނެއްގައި ބުނެފައިވަނީ، އެ އެސޯސިއޭޝަންގެ ސަމާލުކަމަށް އައިސްފައިވާ މައްސަލައެއް ބެލުމަށް އެކުލަވާލެވުނު އެޑްހޮކް ކޮމިޝަނުގެ ރިޕޯޓަށް ބަލައި، ވީއޭއެމްގެ ހިންގާ ކޮމިޓީގެ ބައްދަލުވުމުގައި ވަނީ ފިޔަވަޅުތަކެއް އަޅަން ނިންމާފައި ކަމަށެވެ.
އެ ގޮތުން މައިގަނޑު ހަތަރު ފިޔަވަޅެއް އަޅަން ވީއޭއެމް އިން ނިންމި އެވެ. އެއީ، އަންހެން ޓީމުގެ ކޯޗުގެ މަގާމުން ސޮފްވާން ވަަކިކުރުމަށާއި އެ ފަދަ މަގާމަކަށް ކުރިއަށް އޮތް ފަސް އަހަރު ނުނެގުމަށާއި ވީއޭއެމް އިން އިންތިޒާމްކުރާ އެއްވެސް މުބާރާތެއްގައި ސޮފްވާނަށް ކުރިއަށް އޮތް ފަސް އަހަރު ބައިވެރިނުވެވޭ ގޮތަށް ނިންމުމުގެ އިތުރުން، ވީއޭއެމްގެ ރެފްރީން ފޮނުވައިގެން ކުރިއަށްދާ އެއްވެސް މުބާރާތެއްގައި ސޮފްވާނަށް މަސައްކަތް ނުކުރެވޭ ގޮތަށް ނިންމުމަށެވެ.
މީގެ އިތުރުން، ވީއޭއެމްގެ ހިންގާ ކޮމިޓީގެ މެމްބަރު ކަމުން ސޮފްވާން ވަކިކުރުމަށް ފަހު، ކުރިއަށް އޮތް ފަސް އަހަރު، ވީއޭއެމްގެ އިންތިހާބީ އެއްވެސް މަގާމަކަށް ސޮފްވާނަށް ނާދެވޭ ގޮތަށް އަދަބު ދޭން ވަނީ ނިންމައިފަ އެވެ.
މިދިޔަ އަހަރުގެ މެއި މަހު ގައުމީ ޓީމުގެ ކޯޗަކަށް ހަމަޖެއްސި ސޮފްވާންއާ ގުޅޭ މައްސަލައެއް ވީއޭއެމް އިން ބެލީ އޭނާ މަގާމުގެ ޒިންމާތަކުން އެކަހެރިކޮށްފަ އެވެ. އެ މުއްދަތުގައި، ގައުމީ އަންހެން ޓީމުގެ ޓްރެއިނިން ކުރިއަށްގެންދިޔައީ ކޯޗު، މުހައްމަދު ނަދީމް (ނަދީމްބެ)ގެ އިރުޝާދުގެ ދަށުންނެވެ.
މީގެ ކުރިން ވެސް ސޮފްވާންގެ މައްޗަށް އެކި ތުހުމަތުތަކެއްގެ ވާހަކަތަކެއް ސޯޝަލް މީޑިއާގައި ވެސް ދައުރުވިއިރު، ބައެއް ކުޅުންތެރިން ވެސް ސޮފްވާންގެ ޝަކުވާ އެސޯސިއޭޝަނާ ހިއްސާކޮށްފައިވާ ކަމުގެ މައުލޫމާތުވަނީ ލިބިފަ އެވެ. އެކަމަކު، އެސޯސިއޭޝަނުން އެ ފަހަރުތަކުގައި ސޮފްވާންގެ މައްސަލައިގައި ފިޔަވަޅެއް ނޭޅި ކަމުގައި ވިޔަސް، މި ފަހަރު މި ދިމާވި މައްސަލައިގައި މި ވަނީ ފިޔަވަޅުތަކެއް އަޅައިފަ އެވެ.
މި މައްސަލައިގައި، ވީއޭއެމްގެ ރައީސް މުހައްމަދު ލަތީފް، ވީއޭއެމްގެ މީޑިއާ ވަޓްސަޕް ގްރޫޕަށް ފޮނުއްވި މެސެޖެއްގައި ބުނެފައިވަނީ، އެސޯސިއޭޝަނުގެ ފަރާތެއްގެ މަސްލަހަތު ރައްކާކުރަން ފޮރުވަންޖެހޭ ކަމެއް ނެތް ކަމަށެވެ.
"މީހެއްގެ ނަން ބޭނުންކޮށްގެން ޖަވާބެއް ދޭން ޖެހޭނީ ކަންކަން ބެލުމަށް ފަހު، އަންހެން ކުދިންނަށް އަދި ފިރިހެން ކުދިންނަށް ވެސް ބިރެއް ނެތި ނެޝަނަލް ޓީމު، އަދި އެސޯސިއޭޝަންގެ އެހެން ހަރަކާތްތަކުގައި އުޅެވޭނެ މާހައުލެއް އޮންނާނެ. ކަމެއް ދިމާވެއްޖިއްޔާ އެކަމެއް ބެލުމަށް ފަހު، އަޅަން ޖެހޭ ފިޔަވަޅެއް އަޅާނެ ކަމުގެ ޔަގީންކަން ދެން،" ވީއޭއެމްގެ މީޑިއާ ވަޓްސަޕް ގްރޫޕުގައި، އެސޯސިއޭޝަންގެ ރައީސް، ލަތީފް ލިޔުއްވާފައިވެ އެވެ.
މީގެ އިތުރުން އެޑްހެކް ކޮމިޝަނުގެ ރިޕޯޓުގައި ފާހަގަކޮށްފައިވާ އިތުރު ކަންތައްތަކެއް ތަންފީޒުކުރުމަށް ވެސް ވީއޭއެމް އިން ވަނީ ނިންމައިފަ އެވެ. އެ ކަންތައްތަކަކީ:
* ގައުމީ ޓީމުގެ ސްކޮޑަށް ކުޅުންތެރިން ހޮވާ އުސޫލު އިތުރަށް ހަރުދަނާކޮށ،ް އެ އުސޫލުގެ ތެރެއިން ނޫންގޮތަކަށް ޤައުމީ ޓީމުގެސްކޮޑަށް ކުޅުންތެރިން ނުހޮވުން
* ގައުމީ ޓީމުގެ ކުޅުންތެރިންނާއި އޮފިޝަލުންގެ ސުލޫކީ މިންގަނޑު އިތުރަށް މުރާޖާކޮށް އެ މިންގަނޑު ޤައުމީ ޓީމުގެ ކުޅުންތެރިންނާއި އޮފިޝަލުންނަށް އަންގާފައި ބޭއްވުން
* ގައުމީ ޓީމުގެ ކުޅުންތެރިން އަދި އޮފިޝަލުންގެ މެދުގައި ހިނގާފާނެ ޖިންސީ ފުރައްސާރައިގެ ޢަމަލުތައް ރިޕޯޓުކުރާނެ އުސޫލެއް ޤާއިމްކޮށް އެކަން ކުޅުންތެރިންނާއި އޮފިޝަލުންނަށް އެނގޭނެގޮތެއް ހެދުން.
* ވޮލީބޯލް އެސޯސިއޭޝަން އޮފް މޯލްޑިވްސްގެ ތަފާތު ކޮމިޝަންތަކާއި ތަފާތު ގުނަވަންތަކުގައި މަސައްކަތްކުރާ ފަރާތްތަކުގެ މެދުގައި ހިނގާފާނެ ޖިންސީ ފުރައްސާރައިގެ އަމަލުތައް ރިޕޯޓު ކުރާނެ އުސޫލެއް ޤާއިމްކޮށ،ް އެކަން އެފަދަ މަސައްކަތްކުރާ ފަރާތްތަކަށް އެނގޭނެގޮތް ހެދުން.
* އެޑްހޮކް ކޮމިޝަނަށް ހުށަހެޅިފައިވާ މައްސަލަ އަކ،ީ ސީރިއަސް މައްސަލައަކަށްވާތ،ީ އެ ބާވަތުގެ މައްސަލަ ތަހްގީގު ކުރުމުގެ އިހްތިސާސް އޮތް ފަރާތަކަށް އެންގުން
* ވޮލީބޯލް އެސޯސިއޭޝަން އޮފް މޯލްޑިވްސްގެ ހިންގާ ޤަވާޢިދު (ވާރޝަން 2023) ގެ 48 ވަނަ މާއްދާގެ (ބ) ގައި "ޖިންސީ ފުރައްސާރައިގެ އެއްވެސް ޢަމަލެއް ހިންގުނ،ް ނުވަތަ އެފަދަ އަމަލަކަށް ހިއްވަރުދިނުން" އެއީ އެސޯސިއޭޝަނުގެ މެމްބަރުންގެ މައްޗަށް މަނާކަމެއްގެ ގޮތުގައި ބަޔާންކޮށްފައިވާތ،ީ ވޮލީބޯލް އެސޯސިއޭޝަން އޮފް މޯލްޑިވްސްގެ މެމްބަރުންގެ ތެރޭގައި ހިމެނޭ އެއްވެސް ކުލަބެއްގެ ހިންގާ ކޮމިޓީގައި ތުހުމަތު ކުރެވުނު ފަރާތް ހިމެނިފައިވާނަމ،ަ އެ ކުލަބެއްގެ ހިންގާ ކޮމިޓީއިން އެ ފަރާތް ވަކިކުރުމަށް އެ ކުލަބަށް އެންގުމާއި އަދި ތުހުމަތު ކުރެވުނު ފަރާތް އެ ކުލަބެއްގެ ހިންގާ ކޮމިޓީއިން ވަކިކުރިކަން ކޮމިޝަނަރ އޮފް ސްޕޯޓްސްގެ ފަރާތުން ކަށަވަރު ކުރުނ.ް އަދި އެކަން ކަށަވަރު ކުރުމުގެ ކުރިނ،ް ވޮލީބޯލް އެސޯސިއޭޝަން އޮފް މޯލްޑިވްސްގެ ފަރާތުން ހިންގާ އެއްވެސް ޙަރަކާތެއްގައި އެ މެމްބަރު ކުލަބު ބައިވެރި ނުކުރުން.
"އަދަދު ސްޕޯޓްސް" އަށް މައުލޫމާތު ލިބިފައވާ ގޮތުގައި، ވީއޭއެމް އިން މި ފިޔަވަޅުތައް އަޅާފައި މި ވަނީ، ސޮފްވާނާ މެދު ކުރެވުނު ތުހުމަތުތަކުގެ ސީރިއަސް ކަމަށް ބެލުމަށް ފަހު އެވެ.
