ލާއިންސާނީ އަދަބު ދީ ޣައިރު ގާނޫނީ އަދަބު ދޭ ވަކިވަކި ފުލުހުންގެ ވާހަކަ ދެއްކުމަކީ ބިރުދެއްކުން ނޫން ކަމަށާއި އެ ވާހަކަތައް ދައްކަނީ ފުލުހުން ޒިންމާދާރު ކުރުވަން ކަމަށް ކުރީގެ ބަންޑާރަ ނައިބު ޑރ. އަހްމަދު އަލީ ސަވާދު ވިދާޅުވެއްޖެ އެވެ.
އޭނާ މިފަދައިން ވިދާޅުވެ އެކްސްގައި ޕޯސްޓެއް ކުރެއްވީ އިދިކޮޅު އެމްޑީޕީން އޮކްޓޯބަރު 3، ގައި މާލޭގައި ބޭއްވި ބޮޑު މުޒާހަރާގައި ބައިވެރިންނަށް އަނިޔާކުރި ފުލުހުންގެ ވާހަކަ ދައްކާތީ ފިޔަވަޅު އަޅާނެ ކަމުގެ އިންޒާރު ފުލުސް އޮފީހުން ރޭ ނެރުނު އިންޒާރުގެ ބަޔާނާއި ގުޅިގެންނެވެ.
"ފުލުހަކަށް ވިޔަސް މީހުނަށް ލާއިންސާނީ އަނިޔާ އަދި ޣައިރު ގާނޫނީ އަދަބެއް ދީފިއްޔާ އަނިޔާވި މީހާވެސް ބަލަންތިބޭ މީހުންވެސް އަޑުއަހާ މީހުންވެސް އެވާހަކަ ދައްކާނެ. އަދި އެކަން ކުރިބަޔަކު ޒިންމާދާރު ކުރުވަންވެސް ގޮވާނެ. އެއީ ފުލުހުންނާ ފުލުހުންގެ އާއިލާއަށް ބިރުދެއްކުމެއް ނޫން،" ސަވާދު ލިޔުއްވާފައިވެ އެވެ.
މީގެ އިތުރުން، ދައުލަތުގެ އިދާރާއެއްގެ މީހަކު ގޯހުން ކަމެއް ކޮށްފިއްޔާ އެވާހަކަ ދައްކާ މީހާ އެބުނަނީ ތިމަންނަގެ ފައިސާއިން މުސާރަނަގާ މީހާ ތިމަންނަގެ މައްޗަށް ގޯސް ހަދައިފިޔޭ ކަމަށް ވެސް ސަވާދު ވިދާޅުވި އެވެ.
ފުލުހުން ރޭ ނެރުނު ބަޔާނުގައި ބުނެފައިވަނީ ފުލުހުންގެ އޮފިސަރުންނާއި އެ އޮފިސަރުންގެ އާއިލާއަށް ނަފްރަތު އުފެދޭ ގޮތަށް އަދި ބިރު ހީވާގޮތަށް ސޯޝަލް މީޑިއާގައި ޕޯސްޓުކޮށްފިނަމަ އެ މީހާކާ މެދު އަޅަންޖެހޭ ގާނޫނީ ފިޔަވަޅު ފުލުހުން އަޅާނެ ކަމަށެވެ.
"އޭނާއަށް ބިރު ހީވާގޮތަށް އެއްވެސް އަމަލެއް ސޯޝަލް މީޑިއާގެ ވަސީލަތެއް މެދުވެރިކޮށް ނަމަވެސް، ހިންގައިފިނަމަ، އެފަދަ ފަރާތަކާމެދު މި ހިދުމަތުގެ ފަރާތުން އަޅަންޖެހޭ ގާނޫނީ ފިޔަވަޅު އަޅާނެކަމުގައި ދަންނަވަން،" ފުލުހުން ބުންޏެވެ.
ފުލުހުން ބުނީ އޮފިސަރުންގެ ރަސްމީ ވާޖިބު އަދާކުރުމަށް ހުރަސް އެޅުމުގެ ގޮތުން ހުއްދަ ނޫން އެއްވެސް އަމަލެއް ކޮށްފިނަމަ، އެ އަމަލަކާމެދު އެޅެން އޮތް އެންމެ ހަރުކަށި ފިޔަވަޅު އަޅާނެ ކަމަށެވެ.
ހުކުރު ދުވަހުގެ ރޭ ކުރި މުޒާހަރާގެ ބައިވެރިންނަށް އަނިޔާކުރި ފުލުހުންގެ ފޮޓޯތަކާއި ވީޑިއޯތައް ސޯޝަލް މީޑިއާގައި ދަނީ ދައުރުކުރަމުންނެވެ. ފުލުހުންގެ އަނިޔާތައް ކުށްވެރިކޮށް އެކަން ކުރަމުންދަނީ ކާކުކަން ނޭގޭ އެކައުންޓުތަކުގެ އިތުރުން ކާކުކަން އެނގޭ ގޮތަށް ފާޅުގަ އެވެ.
