އެމްޑީޕީން އޮކްޓޯބަރު 3 ވަނަ ދުވަހުގެ ރޭ މާލޭގައި ބޭއްވި ބޮޑު މުޒާހަރާ ރޫޅާލަން އަޑުގަދަ ހަތިޔާރު (ސޮނިކް ވެޕަން) ބޭނުން ކުރުން ލާއިންސާނީ އަދަބު މަނާކުރާ، އިންޓި ޓޯޗާ ގާނޫނާ ހިލާފު ކަމަށާއި އެއީ ލާއިންސާނީ އަދި ޣައިރު ގާނޫނީ އަދަބެއް ކަމަށް، މަޝްހޫރު ގާނޫނީ ވަކީލް ޑރ. އަހުމަދު އަލީ ސަވާދު ވިދާޅުވެއްޖެ އެވެ.
ޖެޓެއްގެ އިންޖީނުގެ އަޑު ކައިރިން އިވޭ މިންވަރަށް ވުރެ ވެސް އަޑުބާރު ސޮނިކް ވެޕަން ބޭނުންކުރާ އާލާތް 2013 ވަނަ އަހަރުން ފެށިގެން ފުލުހުން ހޯދާފައި ހުއްޓަސް، ރައްޔިތުންނާ ދެކޮޅަށް "ހަތިޔާރެއްގެ" ގޮތުގައި ބޭނުން މިކުރީ ރައީސް މުއިއްޒުގެ ސަރުކާރުގަ އެވެ. މީގެ ކުރިން އެ އާލާތް ބޭނުންކޮށްފައި ވަނީ މުޒާހަރާތަކުގައި ފުލުހުންގެ އެންގުންތައް އިއުލާނުކުރަން ދޭ އެލާޓެއްގެ ގޮތުގަ އެވެ.
ނަމަވެސް އޮކްޓޯބަރު 3 ވަނަ ދުވަހުގެ ރޭގެ މުޒާހަރާގައި އެ ހަތިޔާރު މެދުކެނޑުމެއް ނެތި، އެތައް މިނެޓެއް ވަންދެން، އަޑުގެ ބާރުމިން މަތިކުރަމުން ބޭނުންކުރި އެވެ.
ސޮނިކް ވެޕަން ބޭނުންކުރި މައްސަލައިގައި އާންމުން ފާޑުކިޔަން ފެށުމުން، އެ ހަމަލާ ފުލުހުންގެ އިދާރާއިން ދިފާއުކޮށް ބަޔާނެއް ނެރެފައި ވަނިކޮށް، ކުރިން ބަންޑާރަ ނައިބުކަން ކުރެއްވި ސަވާދު ރޭ އެކްސްގައި ކުރެއްވި ޕޯސްޓެއްގައި ވިދާޅުވީ މުޒާހަރާ ކޮންޓްރޯލްކުރަން ފުލުހުން އަޑުގަދަ ހަތިޔާރު ބޭނުންކުރީ އެންޓި-ޓޯޗާ ގާނޫނުގެ 10، 11، 12، 14 އަދި 15 ވަނަ މާއްދާތަކުގައި ބަޔާންކުރާ 'ނަފްސާނީ' އަދި 'ރަހުމު ކުޑަ ލާއިންސާނީ އިހާނެތި އަމަލު' ނުވަތަ ޓޯޗާގެ ގޮތުގަކަން ގާނޫނުން ސާފުކޮށް ދޭހަވާ ކަމަށެވެ.
"[އެއީ] މުޒާހިރީންގެ އިތުރުން މާލޭގެ އެސަރަހައްދުގަ ދިރިއުޅޭ ކުދިބޮޑު ހުރިހާ ރައްޔިތުނަށް އާންމުކޮށް ދިން ލާއިންސާނީ ޣައިރު ގާނޫނީ އަދަބެއް،" ސަވާދު ވިދާޅުވި އެވެ.
ސޮނިކް ވެޕަން ބޭނުންކުރި މައްސަލަ ބަންޑާރަ ނައިބު، ޕްރޮސެކިއުޓާ ޖެނެރަލް އަދި އެޗްއާރްސީއެމްއިން މިކަން ބަލައި ފުލުހުން ޒިންމާދާރު ކުރުވަންޖެހޭނެ ކަމަށް ވެސް އޭނާ ވިދާޅުވި އެވެ.
"ބަޔަކު މުޒާހަރާއެއް ކުރީމަ އެ ސަރަހައްދުގަ ދިރިއުޅޭ އާންމުނަށް ގާނޫނުން ބޭރު އަނިޔާއެއް ދިނުމުގެ ހައްގެއް އެކަކަށްވެސް ނުލިބޭ،" ސަވާދު ވިދާޅުވި އެވެ.
"ރައްޔިތުނަށް އަނިޔާދޭނީ ޒާލިމު ވެރިން."
ޒާލިމު ވެރިންނަކީ އާހިރަތުގައި ކައުޘަރުގެ އާރާއި ގާތްނުވެވޭނެ، ރަސޫލާ(ﷺ) އިންކާރު ކުރައްވާނެ ބައެއް ކަމަށް ވެސް ސަވާދު ވިދާޅުވެފައިވެ އެވެ.
އޮކްޓޯބަރު 3 ވަނަ ދުވަހުގެ ރޭގެ މުޒާހަރާ ރޫޅާލުމަށް ތަކުރާރުކޮށް ސޮނިކް ވެޕަން ބޭނުން ކުރި އެވެ. އޭގެ އަޑު، ޖެޓެއްގެ އިންޖީނުގެ އަޑު ކައިރިން އިވޭ މިންވަރަށް ވުރެ ވެސް ބާރެވެ.
ސޮނިކް ވެޕަންއަކީ ލޯންގު ރޭންޖް އެކޮސްޓިކް ޑިވައިޒް ނުވަތަ އެލްއާރުއޭޑީ ބޭނުންކޮށްގެން އެއް ރިދަމަކަށް އުފައްދާ ގަދަ އަޑެކެވެ. މިއީ މުޒާހަރާތައް ކޮންޓްރޯލް ކުރުމަށް ފުލުހުންނާއި ސިފައިން ބޭނުންކުރާ ނޮން-ލީތަލް ހަތިޔާރެކެވެ.
ހަތިޔާރު ބޭނުންކުރުމުގައި ފުލުހުން އަމަލުކުރަން ޖެހޭ ގޮތުގެ އުސޫލެއް އޮންނަން ޖެހެ އެވެ. ޕެޕާ ސްޕްރޭ އާއި ކަރުނަ ގޭސް އަދި މުގުރު ބޭނުންކުރުމުގައި އަމަލުކުރާނެ ގޮތުގެ އުސޫލު ނުވަތަ އެސްއޯޕީ ހަދާފައި އޮވެ އެވެ.
ހަތިޔާރު ހޯދުމާއި ގެންގުޅުމާއި ބޭނުންކުރުމާ ގުޅޭ ފުލުހުންގެ ގަވާއިދުގައި ބުނާ ގޮތުން ހަތިޔާރެއް ބޭނުންކުރުމުގެ ކުރިން އިންޒާރު ދޭން ޖެހެ އެވެ. ގަވާއިދު ބުނާ ގޮތުން ފުލުހުން އިންޒާރުގެ ގޮތުން "ހަތިޔާރު ބޭނުންކުރަނީ" މި އިބާރާތް ބޭނުންކުރަން ޖެހޭނެ އެވެ. ނަމަވެސް ފުލުހުން ސޮނިކް ވެޕަން ބޭނުންކުރަން މިފަދަ އިންޒާރެއް ނުދެ އެވެ.
ސޮނިކް ވެޕަން ބޭނުންކުރަން ފެށީ، ކުރީގެ ރައީސް އިބްރާހިމް މުހައްމަދު ސޯލިހު އާއި އެމްޑީޕީގެ އިސް ވެރިން މުޒާހަރާގެ ކުރީ ސަފަށް ޖެހި، ފުލުހުންގެ ޝީލްޑްތަކުގެ ކައިރީގައި ހުރެ، މެގަ ފޯނުން ވާހަކަ ދައްކަން ތައްޔާރުވަމުން ދަނިކޮށެވެ.
މުޒާހަރާ ރޫޅާލުމަށްޓަކައި ފުލުހުން ޝީލްޑާއި ރައިޓް ގިޔަރުގައި ނުކުމެ، ޕެޕާ ސްޕްރޭ ވެސް ޖެހި އެވެ. އަދި އަށް މީހުން ހައްޔަރު ކުރި އެވެ. އޭގެ ތެރެއިން ދެ މީހަކު ވަނީ ދޫކޮށްލައިފަ އެވެ.
ހައްޔަރުކުރި މީހުންގެ ތެރޭގައި ރައްޔިތުންގެ މަޖިލީހުގެ ކުރީގެ މެންބަރު ޔާސިރު އަބްދުއްލަތީފު، ރައްޔިތުންގެ މަޖިލީހުގެ ކުރީގެ މެންބަރު ޔައުގޫބު އަބްދުﷲ އަދި މާފުށީ ކައުންސިލްގެ ރައީސް ހަސަން ސޮލާހު ހިމެނެ އެވެ. މިހާރު ބަންދުގައި ތިބި ހަ މީހުންގެ މައްސަލަ ތަހުގީގުކުރަން އެ މީހުން ބަންދަށް، ފުލުހުން އެދުނު ގޮތަށް ކްރިމިނަލް ކޯޓުން ވަނީ 15 ދުވަސް ޖަހައިފަ އެވެ.
