އިދިކޮޅު އެމްޑީޕީން ރޭ މާލޭގައި ބޭއްވި މުޒާހަރާގެ ބައިވެރިންނާ ދެކޮޅަށްބާރުގަދަ އަޑު އިއްވާ "ސޮނިކް ވެޕަން" ބޭނުންކުރުން ފުލުހުންގެ އިދާރާއިން ދިފާއުކޮށްފި އެވެ.
މުޒާހަރާ ރޫޅާލުމަށް ތަކުރާރުކޮށް ސޮނިކް ވެޕަން ފުލުހުން ބޭނުން ކުރި އެވެ. އޭގެ އަޑު، ޖެޓެއްގެ އިންޖީނުގެ އަޑު ކައިރިން އިވޭ މިންވަރަށް ވުރެ ވެސް ބާރެވެ.
މުޒާހަރާގެ ބައިވެރިންގެ އިތުރުން ކައިރީގައި ހުރި ގެތަކުގައި ތިބި މީހުންނާއި ފިހަރާތަކާއި ހޮޓާ ރެސްޓޯރަންޓުތަކުގައި ތިބި މީހުންނަށް ވެސް އޭގެ އުނދަގޫ ޖެހުނެވެ.
ގާނޫނުއަސާސީން ކަށަވަރުކޮށްދޭ ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ހައްގުގެ ބޭނުމަށް ހުރަސް އެޅުން ދިފާއުކޮށް ފުލުހުން ނެރުނު ބަޔާނެއްގައި ބުނީ އެއްވުމުގެ ބައިވެރިން ގާނޫނާ ހިލާފު އަމަލު ހިންގާފައިވާ ކަމަށެވެ.
ސުލްހަވެރި އެއްވުމުގެ ސިފަ އެ މުޒާހަރާއިން ގެއްލުމުން ގާނޫނީ އިންޒާރު ދިނުމަށް ފަހު ރޫޅާލަން މަސައްކަތް ކުރީ "ކެތްތެރިކަމާއެކު" ކަމަށް ފުލުހުން ބުނެ އެވެ. އަދި ބާރުގޭ ބޭނުންކޮށްފައި ވަނީ ކަނޑައަޅާފައިވާ ގާނޫނުތަކާއި ގަވާއިދުތަކުގެ ތެރެއިން ނަގަހައްޓަން ޖެހޭ އަސާސްތަކާއެކު ކަމަށް ބުނެ ފުލުހުން ދިފާއުވެފައިވެ އެވެ.
ސޮނިކް ވެޕަންއަކީ ލޯންގު ރޭންޖް އެކޮސްޓިކް ޑިވައިޒް ނުވަތަ އެލްއާރުއޭޑީ ބޭނުންކޮށްގެން އެއް ރިދަމަކަށް އުފައްދާ ގަދަ އަޑެކެވެ. މިއީ މުޒާހަރާތައް ކޮންޓްރޯލް ކުރުމަށް ފުލުހުންނާއި ސިފައިން ބޭނުންކުރާ ނޮން-ލީތަލް ހަތިޔާރެކެވެ.
ހަތިޔާރު ބޭނުންކުރުމުގައި ފުލުހުން އަމަލުކުރަން ޖެހޭ ގޮތުގެ އުސޫލެއް އޮންނަން ޖެހެ އެވެ. ޕެޕާ ސްޕްރޭ އާއި ކަރުނަ ގޭސް އަދި މުގުރު ބޭނުންކުރުމުގައި އަމަލުކުރާނެ ގޮތުގެ އުސޫލު ނުވަތަ އެސްއޯޕީ ހަދާފައި އޮވެ އެވެ.
ނަމަވެސް ސޮނިކު ވެޕަން، ނުވަތަ ބާރު އަޑު ބޭނުންކުރަން ޖެހޭ ހާލަތާއި ބޭނުންކުރާ ގޮތް ފުލުހުން އާންމުކޮށްފައެއް ނެތެވެ.
ހަތިޔާރު ހޯދުމާއި ގެންގުޅުމާއި ބޭނުންކުރުމާ ގުޅޭ ފުލުހުންގެ ގަވާއިދުގައި ބުނާ ގޮތުން ހަތިޔާރެއް ބޭނުންކުރުމުގެ ކުރިން އިންޒާރު ދޭން ޖެހެ އެވެ. ގަވާއިދު ބުނާ ގޮތުން ފުލުހުން އިންޒާރުގެ ގޮތުން "ހަތިޔާރު ބޭނުންކުރަނީ" މި އިބާރާތް ބޭނުންކުރަން ޖެހޭނެ އެވެ. އެކަމަކު ފުލުހުން ސޮނިކް ވެޕަން ބޭނުންކުރަން މިފަދަ އިންޒާރެއް ނުދެ އެވެ.
