ގްރޭޓާ މާލޭ ސަރަހައްދުގައި ފުރަތަމަ ޑިވިޝަންގެ ކްލަބުތަކުގެ ފަރިތަކުރުންތަކާއި، އެކެޑަމީތަކުގެ ފަރިތަކުރުންތައް ކުރިއަށް ގެންދިއުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފް.އޭ.އެމް)ގެ ބެލުމުގައި ދަށުގައި އޮތް ހަމައެކަނި ދަނޑުތަކާއި މާފަންނުގައި އޮތް ދެ ޓާފް ދަނޑެވެ. މިއީ، ދެ ވަނަ ޑިވިޝަނާއި ތިން ވަނަ ޑިވިޝަންގެ ޓީމުތައްވެސް ބޭނުންކޮށް، ބައެެއް ފަހަރު އެ ދެ ޑިވިޝަންގެ މުބާރާތް ވެސް ކުޅެން އޮތް ދެ ދަނޑެވެ.
އެކަމަކު، ފާއިތުވި އަހަރުތަކުގެ ތެރޭގައި، ޓާފް ދެ ދަނޑުގެ ޕިޗް ހަލާކުވެ، ބޭނުންނުކުރެވޭ ފެންވަރަށް ދެ ދަނޑުގެ ހާލަތު ވެއްޓުނެެވެ. ތަން ނުބެލެހެއްޓި "ކުނި ގޮނޑެއް"ގެ ގޮތުގައި އެ ދެ ދަނޑު އޮތް ސަރަހައްދު ސިފަކުރެވެން ފެށި އެވެ. އެކަޑަމީތަކާއި ޓީމުތަކުން އިސްވެ، މަދުމަދުން، އެތަން ސާފުކުރުމުގެ ކަންކަން ހިންގި އެވެ.
އެކަމަކު، އަސްލު މަންޒަރު ސިފަވެ، ފެންނަން އޮތީ އެ ތަނަށް އަހަރުތަކެއްގެ އިހުމާލުވެފައި އޮތްކަމެވެ. ޓީމުތަކާއި ކުޅުންތެރިންގެ ޝަކުވާތައް ގިނަ ނަމަވެސް، އޭރު އެފްއޭއެމުން އެ ދެ ދަނޑުގެ މެއިންޓެނަންސް އަދި ބެލެހެއްޓުމަށް އަޅާ ނުލާތާ އެތައް އަހަރެއްވެއްޖެ އެެވެ.
މަރާމާތުތަކަށް ފަހު ޓާފް ދަނޑު.--- ފޮޓޯ: މިރާޝް ނާޝިމް / އަދަދު ސްޕޯޓްސް
އެފްއޭއެމްގެ ރައީސް ކަަމަށް، މިދިޔަ ޖުލައި މަހު ފަހުކޮޅު އިންތިހާބުވި، އަހުމަދު ތޯރިގް (ޓޮމް)ގެ ލީޑަޝިޕުން އެންމެ ފުރަތަމަ އިސްކަންދީގެން މިދިޔަ ދުވަސްވަރުކޮށްފައިވާ ކަންތައްތަކުގެ ތެރެއިން އެއް ކަމަކީ ޓާފް ދެ ދަނޑު މަރާމާތްކޮށް، އެތަން ސާފުކޮށް، ރީފާބިޝްކުރުމެވެ.
އެ ގޮތުން، އެފްއޭއެމްގެ ވައިސް ޕްރެޒިޑެންޓް, ހުސެއިން ޝާފިއު (ކޮކީ)ގެ ބެލުމުގެ ދަށުން ފާއިތުވި މަހެއްހާ ދުވަހުގެ ތެރޭގައި ޓާފް ދަނޑުގެ ފެންވަރު ރަނގަޅުކުރުމަށް ގިނަ މަސައްކަތްތަކެއް ވަނީ ކޮށްފަ އެވެ ދެ ދަނޑުގެ ޕިޗް ވަނީ މަރާމާތްކޮށްފައިވާއިރު، ފުނިޖެހިފައި އޮތް ކުނީގެ ފުނިތައް ވަނީ އެއްކޮށް ސާފުކޮށްފަ އެވެ.
މީގެ އިތުރުން މި މަސައްކަތުގައި، އެފްއޭއެމްގެ ބޯޑު މެމްބަރު، އިމްރާން މުހައްމަދު ވެސް އިސްކޮށް ގިނަ ކަންކަމުގައި މަސައްކަތްތަކެއް ވަނީ ކޮށްފަ އެވެ.
ޓާފް ދަނޑުގައި ހުރި އިމާރާތުގެ އެކި ބައިތަކުގައި، ތަނުގައި ކުލަލައި، ކްލަބުތަކަށް ދޫކޮށްފައިވާ ގުދަންތަކުގައިވެސް ބައެއް މަސައްކަތްތައް ވަނީ ކޮށްފަ އެވެ. މި މަސައްކަތްތަކުގެ ސަބަބުން ޓާފް ދަނޑުގެ ފަރިތަކުރުންތައް ކުރިއަށް ގެންދިއުމަށް ވަނީ ކުރިއަށް ވުރެ މާ ބޮޑުތަން ފަސޭހަވެފަ އެވެ.
މަރާމާތުތަކަށް ފަހު ޓާފް ދަނޑު.--- ފޮޓޯ: މިރާޝް ނާޝިމް / އަދަދު ސްޕޯޓްސް
އެފްއޭއެމްގެ ޖެނެރަލް ސެކްރެޓަރީ، އަހުމަދު ޒަރީރު، "އަދަދު ސްޕޯޓްސް" އަށް ވިދާޅުވީ، ދުރު ވިސްނުމަށް ބަލާއިރު، އެންމެ މުހިންމު ކަމަކީ، ޓާފް ދަނޑުގެ މަރާމާތަށް ވުރެ އެ ޕިޗްގެ ޓާފް ބަދަލުކުރުން ކަމަށެވެ.
އެ ގޮތުން، ޕިޗު ބަދަލުކުުރުމަށް ކުރަން ޖެހޭ ކަންކަމުގެ މަސައްކަތް ވެސް ކުރެވެމުންދާކަން ފާހަގަކުރައްވައި، ޒަރީރު ވިދާޅުވީ، މި ވަގުތަށް ބަލާއިރު ވެސް މުހިންމު ކަމެއްގެ ގޮތުގައި ފެންނާތީވެ، އެފްއޭއެމް އިން ނިންމީ ޓާފް ދަނޑުގެ މަރާމާތުގެ ކަންކަން ކޮށް ބޮޑު ބްރޭކަކަށް ފަހު، ފުޓްބޯޅަ ސީޒަނެއް ފަށައިގެން އުޅުމާ އެކު، ޓީމުތަކަށް ވެވެން ހުރި އެހީތެރިކަމެއް އެކި ގޮތްގޮތުން ފޯރުކޮށްދިނުމަށް ކަމަށެވެ.
މިދިިޔަ އަހަރުތަކުގައި ޓާފް ދަނޑު ހަލާކުވުމުގެ މައްސަލަތައް ބޮޑުވެ، ޓީމުތަކަށް އެކަށޭނެ ގޮތަށް ޓްރެއިނިންތައް ކުރިއަށްގެންދިއުމުގައި ގޮންޖެހުންތައް ކުރިމަތިވި ވާހަކަ ކޯޗުންނާއި ކުޅުންތެރިން މީޑިއާގައި ހިއްސާކޮށްފައިވެ އެވެ.
