ރައީސް މުހައްމަދު މުއިއްޒުގެ ސަރުކާރުން ގައުމު "ލޫޓުވައިފި" ކަމަށް ބުނެ، އެންމެ ބޮޑު އިދިކޮޅު ޕާޓީ، މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ބާއްވާ އެއްވުމަކީ ވަކި ޕާޓީއެއްގެ ހަރަކާތެއް ކަމަށް ނުބަލައި ހުރިހާ ރައްޔިތުން އެ އެއްވުމުގައި ބައިވެރިވާން ކުރީގެ ރައީސް މުހައްމަދު ނަޝީދު ގޮވާލައްވައިފި އެވެ.
ނަޝީދުގެ ރަސްމީ އެކްސް އެކައުންޓުން ކުރެއްވި ޕޯސްޓެއްގައި ވިދާޅުވީ، މިއީ ވަކި ޕާޓީއެއްގެ ހަރަކާތެއްގެ ގޮތުގައި ދެކެން ނުޖެހޭ ކަމަށެވެ.
"އޮކްޓޯބަރު 3، ގެ މުޒާހަރާ އަކީ ވަކި ޕާޓީއެއްގެ ކަމެއްގެ ގޮތުގައި ދެކޭކަށް ނުޖެހޭ. އެއީ ކޮރަޕްޝަނާއި ދެކޮޅު ހުރިހާ އެންމެން ބައިވެރިވުން ރަނގަޅު މުޒާހަރާއެއް،" ނަޝީދު އެކްސްގައި ލިޔުއްވާފައިވެ އެވެ.
ހުކުރު ދުވަހުގެ އެއްވުމަށް ނަޝީދު ދައުވަތު ދީފައިވާއިރު، އެ އެއްވުމަށް އެމްޑީީޕީން ދަނީ ދުރާލައި ތައްޔާރުވަމުންނެވެ. އެގޮތުން އެއްވުމަށް ރަށްރަށުން މީހުން ގެނައުމުގެ މަސައްކަތްތައް ވެސް އެ ޕާޓީން ދަނީ ކުރަމުންނެވެ.
މި އެއްވުމަށް ގިނަ އަދަދެއްގެ ރައްޔިތުން ނުކުމެ މާލޭގެ މަގުތައް ފުރާލާނެ ކަމަށް އެމްޑީޕީގެ ޕާޓީގެ ޗެއާޕާސަން ފައްޔާޒު އިސްމާއީލް ވެސް ވަނީ ވިދާޅުވެފަ އެވެ.
"ޓިނު ޖަހައި ބަންދުކުރިޔަސް ޖުމްހޫރީ މައިދާނަކީ ހުރިހާ ދިވެހިންނަށް ވެސް ހުޅުވާލެވިފައި އޮތް ތަނެއް،" މަރާމާތު ކުރަން ކަމަށް ބުނެ މިހާރު ބަންދުކޮށްފައިވާ ޖުމްހޫރީ މައިދާނަށް ހުކުރު ދުވަހުގެ އެއްވުމުގެ މިސްރާބު ހުރި ކަމަށް އިޝާރާތް ކުރައްވައި ފައްޔާޒު ލިޔުއްވި އެވެ.
"ލޫޓުވައިފި ލޫޓުވައިފި" ނަމުގައި އެމްޑީޕީން އެއްވަން ނިންމާފައިވަނީ ހުކުރު ދުވަހުގެ ރޭ އާޓިފިޝަލް ބީޗަށެވެ. މާލޭގައި ބާއްވާ ބޮޑު އެއްވުމަށް އެ ޕާޓީން ތައްޔާރުވަމުން އަންނައިރު ސަރުކާރުން އެ ހަރަކާތަށް ހުރަސް އެޅުމަށް ކަންކަން ކުރަމުންދާ ކަމަށް އެމްޑީޕީން ބުނެ އެވެ.
މުއިއްޒު ދިވެހި ރައްޔިތުންނާއި މުޅި ގައުމު ނިކަމެތިކޮށްފި ކަމަށާއި، ގައުމު ހަމަ މަގަށް އެޅުވުމަށްޓަކައި، އަންނަ އޮކްޓޯބަރު 3، ގައި ރަށްރަށުން ވެސް މީހުން މާލެއަށް އަރައި، ސަރުކާރު ޖަވާބުދާރީކުރުވަން ހުރިހާ ރައްޔިތުން ނުކުތުމަށް ކުރީގެ ރައީސް އިބްރާހިމް މުހައްމަދު ސޯލިހު ވެސް ވަނީ ގޮވާލައްވާފަ އެވެ.
ސޯލިހު ވިދާޅުވީ ގައުމުގެ އަދުގެ ހާލަތު އޮތީ ކޮންމެ މީހަކު ވެސް ކަންބޮޑުވާ ހިސާބުގަައި ކަމަށާއި ތަކެތީގެ އަގު އިންތިހާއަށް ބޮޑުވެ، ދެމަފިރިން ރެޔާއި ދުވާލު މަސައްކަތް ކޮށްގެން ވެސް ހަރަދު ދެކޮޅުނުޖެއްސޭ ކަމަށެވެ.
