ދައުލަތުގެ މަގާމުތަކުގައި ތިބި މުވައްޒަފުންގެ ތެރެއިން ސިޔާސީ ގޮތުން އައްޔަންކޮށްފައިވާ މުވައްޒަފުންގެ ލިޔެކިޔުން ވަކިން ބަލަހައްޓަމުން ނުދާތީ ސިޔާސީ މުވައްޒަފުންގެ އަދަދު ނޭނގޭ ކަމަށް ބުނެ ފިނޭންސް މިނިސްޓްރީން އިންފޮމޭޝަން ކޮމިޝަން (އައިކޮމް) ގެ އަޑުއެހުމުގައި ދޮގު ހެދި މައްސަލަ ކަމާ ގުޅުންހުރި އިދާރާތަކަށް ހުށަހަޅާނެ ކަމަށް ގާނޫނީ ވަކީލު އައިކް އަހުމަދު އީސާ ވިދާޅުވެއްޖެ އެވެ.
އައިކޮމްއަށް މި މައްސަލަ ހުށަހެޅި އައިކު އަހްމަދު އީސާ އެވެ. އޭނާ ފިނޭންސްގައި އެދުނީ މާޗު 13، 2025 އާ ހަމައަށް ދައުލަތުން މުސާރައަށް ކޮށްފައިވާ ހަރަދުގެ ތެރެއިން ސިޔާސީ މުވައްޒަފުންނަށް ކުރާ ހަރަދު ހޯދުމަށެވެ. އެގޮތުން، މުވައްޒަފުންގެ އަދަދާއި މުސާރަ އާއި އިނާޔަތްތަކަށް ކޮށްފައިވާ ހޭދަ ހޯދުމަށް އައިކު އެދިފައިވެ އެވެ.
ނަމަވެސް ސިޔާސީ މުވައްޒަފުންނާއި އެހެނިހެން މުވައްޒަފުންގެ މައުލޫމާތު ވަކިން ބަލަހައްޓަމުން ނުދާ ކަމަށް ބުނެ ފިނޭންސް މިނިސްޓްރީން ވަނީ އައިކޮމްގެ އަޑު އެހުމުގައި ދޮގު ހަދައިފަ އެވެ.
އެކަމާ ގުޅިގެން އަދަދު އަށް މައުލޫމާތު ދެއްވަމުން އައިކު ވިދާޅުވީ ފިނޭންސް މިނިސްޓްރީން ދޮގު ހެދި މައްސަލަ ސިވިލް ސާވިސް ކޮމިޝަނަށާއި އެންޓި ކޮރަޕްޝަން ކޮމިޝަން އަދި ނެޝަނަލް އިންޓަގްރިޓީ ކޮމިޝަނަށް ހުށަހަޅާނެ ކަމަށެވެ.
"އެ މައްސަލައިގައި އައިކޮމް އިން ގޮތެއް ނިންމީމާ އަޅުގަނޑުމެން ހުށަހަޅާނަން ފިނޭންސް މިނިސްޓްރީގެ މައްސަލަ ސީއެސްސީއަށާއި އޭސީސީއަށާއި އެންއައިސީ އަށް،" އައިކް ވިދާޅުވި އެވެ.
މާޗު 13، 2025 އާ ހަމައަށް ދައުލަތުން މުސާރައަށް ކޮށްފައިވާ ހަރަދުގެ ތެރެއިން ސިޔާސީ މުވައްޒަފުންނަށް ކުރާ ހަރަދު ފިނޭންސުން ނުދިނުމުން އައިކޮމްއިން ބެލި މައްސަލައިގެ އަޑުއެހުމުގައި ފިނޭންސްގެ ފަރާތުން ބައިވެރިވީ އެ މިނިސްޓްރީގެ ލީގަލް އޮފިސަރެވެ. އޭނާ އެ އަޑުއެހުމުގައި ދެއްކި ވާހަކަތަކަށް ބަލާއިރު ފިނޭންސުން އަދިވެސް އެ މައުލޫމާތު ހާމަކުރަން ދެކޮޅު ހަދާކަން އެނގެ އެވެ.
އިންފޮމޭޝަން ކޮމިޝަނަރު އަހްމަދު އާހިދު ވިދާޅުވި ގޮތުގައި އެ މައުލޫމާތަކީ ދައުލަތުގެ ކޮންމެވެސް އިދާރާއެއްގައި ހުންނަން ޖެހޭ މައުލޫމާތެކެވެ. ދައުލަތުގެ ހުރިހާ މާލިއްޔަތުގެ ކަންކަމެއް ބަލަހައްޓަނީ ފިނޭންސުން ކަމަށްވެފައި އެ މައުލޫމާތު ހުރި އިދާރާއެއް އެ މިނިސްޓްރީއަށް އެނގެން ވާނެ ކަމަށް އާހިދު ވިދާޅުވި އެވެ.
ދައުލަތުގެ ކޮންމެ އިދާރާއަކުން ވެސް މުސާރަ ޝީޓު ތައްޔާރު ކުރުމަށް ފަހު ފޮނުވާނީ ފިނޭންސް މިނިސްޓްރީއަށެވެ. އެ ކަމަށް ފިނޭންސްގެ ފަރާތުން ބައިވެރިވި ލީގަލް އޮފިސަރު ވެސް އެއްބަސްވި އެވެ. އެއާއެކު އާހިދު ވިދާޅުވީ ހުރިހާ އިދާރާއެއްގެ މުސާރަ ޝީޓު ފިނޭންސްގައި ހުންނަންވާނެ ކަމަށެވެ.
"ތި ބޭފުޅުން ތި ވިދާޅުވަނީ ތި ބޭފުޅުންނަށް އެނގޭކަށެއް ނޯންނާނެ ސިޔާސީ މުވައްޒަފުންނަކީ ކޮބައިކަމެއް؟" އާހިދު ސުވާލު ކުރެއްވި އެވެ.
"އާދެ، ސިޔާސީ މުވައްޒަފުންނާއި އެހެން މުވައްޒަފުން އަޅުގަނޑުމެންނަށް ވަކި ނުކުރެވޭ،" ލީގަލް އޮފިސަރު ޖަވާބު ދެއްވި އެވެ.
ދައުލަތުގެ އިދާރާތަކުގައި މަސައްކަތް ކުރާ މުވައްޒަފުންގެ މަގާމާއި، މުސާރަ އާއި، އިނާޔަތްތަކާއި، އައްޔަންކުރި ތާރީހު އެ މިނިސްޓްރީއަށް އެނގޭނެ އެވެ. ވަކިން ހާއްސަކޮށް ސިޔާސީ ގޮތުން އައްޔަންކުރާ މުވައްޒަފުންނަކީ ކޮންމެ ފަސް އަހަރަކުންހެން ބަދަލުވާ ބަޔަކަށްވުމާއެކު އެ މައުލޫމާތުތައް ފިނޭންސް މިނިސްޓްރީގައި ހުންނާނެ އެވެ.
މިފަދަ މުހިންމު މައުލޫމާތެއް ފިނޭންސްގައި ނެތް ކަމަށް ބުނެ އޮޅުވާލުމަކީ އެ މިނިސްޓްރީއަށް މާލިއްޔަތު ގާނޫނާއި ގަވާއިދުން މަތިކޮށްފައިވާ ޒިންމާ އަދާނުކުރެވޭ ކަމުގެ ސާފު ހެއްކެކެވެ. އެ މައުލޫމާތު އެ މިނިސްޓްރީގައި ހުންނާނެ ކަމަށް ތަފާތު އެކި މަސްދަރުތަކުން ޔަގީންކޮށްދިނެވެ.
ރައީސް މުހައްމަދު މުއިއްޒުގެ ސަރުކާރުގައި ތިބީ 922 ސިޔާސީ މުވައްޒަފުން ކަމަށް ރައީސް އޮފީހުން ބުނެ އެވެ. ނަމަވެސް، އެ ނަންބަރު ޔަގީން ކުރެވޭނެ އެއްވެސް ގޮތެއް ނެތެވެ. އިދިކޮޅު ފަރާތްތަކުން އަންދާޒާ ކުރާ ގޮތުގައި އެ އަދަދު ހުރީ 2،000 އަށްވުރެ މަތީގަ އެވެ.
ހުރިހާ ކަމެއް ހާމަކުރުމުގެ ވައުދާއެކު ވެރިކަމަށް ވަޑައިގެންނެވި މުއިއްޒުގެ މި ސަރުކާރުގެ އެންމެ ބޮޑު ސިއްރަކަށް ވެފައިވަނީ ސިޔާސީ މުވައްޒަފުންގެ އަދަދެވެ. ރަށްރަށުގެ ކުޅިވަރު ސްޓޭޑިއަމްތައް ބެލެހެއްޓުމާއި، ހޮސްޕިޓަލްތައް ބެލެހެއްޓުމާއި، ފަޅު ރަށްރަށް ބެލެހެއްޓުމަށް ވެސް ސިޔާސީ މުވައްޒަފުން ބޮޑު މުސާރަ ދީފައި އެބަތިއްބެވެ.
