ހުޅުމާލެ ފުރަތަމަ ފިޔަވަހީގައި ހުންނަ ރެހެންދި ސްކޫލަށް އިންޒާރުގެ އީމެއިލް އެއް ލިބިގެން އެ ސްކޫލުގައި ފުލުހުން ހަރަކާތްތެރިވެއްޖެ އެވެ.
މިކަމާ ގުޅިގެން ފުލުހުން މިހާތަނަށް ބުނީ އެ ސްކޫލަށް ފުލުހުން ދިޔައީ ލިބުނު މައުލޫމާތަކާއި ގުޅިގެން ބަލަންޖެހޭ ކަންކަން ބެލުމަށް ކަމަށެވެ.
އިތުރު ތަފުސީލު ހޯދުމަށް ސްކޫލަށް ގުޅައިގެން ޖަވާބެއް ނުލިބުމުން، އަދަދު ނޫހުން އެޑިއުކޭޝަން މިނިސްޓަރު ޑރ. އިސްމާއިލް ޝަފީއު އަށް ގުޅުމުން އޭނާ ވިދާޅުވީ ފުލުހުން އެ ސްކޫލަށް ދިޔައީ އިންޒާރުގެ މެއިލް އެއް ލިބިގެން ކަމަށެވެ.
"[ކޮން ކަހަލަ އިންޒާރެއްތޯ] އަޅުގަނޑު ޖެހޭނީ ބަލައިލަން. އަޅުގަނޑަށް މައުލޫމާތު ލިބިފައި އޮތީ އިންޒާރުގެ މެއިލްއެއް ލިބިފައޭ އޮތީ ސްކޫލަށް. ގޮތް ނޭނގޭ މެއިލް އަކުން ފޮނުވާފަ އިނީ،" މިނިސްޓަރު ވިދާޅުވި އެވެ.
ފުލުހުން ސްކޫލަށް ދިޔައީ 9:00 ހާއިރު ކަމަށާއި ބަލަން ޖެހޭ ކަންކަން ބެލުމަށްފަހު ނުރައްކަލެއް ނެތްކަން ޔަގީން ކުރުމަށްފަހު 10:00 ހާއިރު ގޮސްފައިވާ ކަމަށް ވިދާޅުވި އެވެ. ފުލުހުން ސްކޫލަށް ދިޔަ ނަމަވެސް އެ ވަގުތު ކިޔެވުމަށް އެއްވެސް ބުރޫއެއް ނާރާކަން މިނިސްޓަރު ފާހަގަކުރެއްވި އެވެ.
މިކަމާއި ގުޅިގެން އިތުރު ތަފުސީލު ހޯދަން އެދުނު ނަމަވެސް ފުލުހުން މިހާތަނަށް އެއްވެސް ތަފުސީލެއް ދީފައެއް ނުވެ އެވެ.
