ބިނާކުރަންވީ އިންސާނީ ހައްގުތައް ވެސް ރައްކާތެރި ކުރެވޭ ގައުމިއްޔަތެއް ކަމަށް ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ގައުމީ ދުވަހުގެ މުނާސަބަތުގައި ނަޝީދު އެކްސް ގައި ކުރެއްވި ޕޯސްޓެއްގައި ވިދާޅުވީ ބިނާކުރަންވީ އިސްލާމީ މަތިވެރި އުސޫލުތަކާއި އިންސާނީ ހައްގުތައް ވެސް ރައްކާތެރި ކުރެވޭ ފާގަތިކަން ހޯދޭ ގައުމިއްޔަތެއް ކަމަށެވެ.
"ބިނާކުރަންވީ އިސްލާމީ މަތިވެރި އުސޫލުތަކާއި، އިންސާނީ ހައްގުތައް ރައްކާތެރި ކުރުމާއި، ޑިމޮކްރަޓިކް ހަމަތަކުގެ ތެރެއިން ތަނަވަސްކަމާއި ފާގަތިކަން ހޯދޭ ގައުމިއްޔަތެއް،" ނަޝީދު ވިދާޅުވި އެވެ.
ނަޝީދު މިހެން ވިދާޅުވެފައި މިވަނީ މިނިވަން މީޑިއާ ނެތިކޮށްލުމަށް ސަރުކާރުން ފަހަތުގައި އޮވެ ހުށަހަޅާފައިވާ ބިލާ ދެކޮޅަށް ނޫސްވެރިން މަސައްކަތް ފަށާފައި ވަނިކޮށް، މިނިވަންކަމާއެކު ހިޔާލުފާޅު ކުރުމަކީ "ތިމާގެ ހިތަށް އައިހާ އެއްޗެއް" ބުނުމުގެ ގޮތުގައި ރައީސް މުހައްމަދު މުއިއްޒު ސިފަކުރައްވާފައި ވަނިކޮށެވެ.
ގައުމީ ދުވަހުގެ ރަސްމީ ޖަލްސާގައި މުއިއްޒު ވިދާޅުވީ ތިމާއަށް އަބުރަކާއި އިއްޒަތެއް ލިބިފައިވާ ފަދައިން އަނެކާއަށް ވެސް އަބުރާއި އިއްޒަތް ލިބިފައިވާކަން ގަބޫލުކުރަން ޖެހޭ ކަމަށެވެ.
"މި ހޯލު ތެރޭގަ މި ތިބީ އެންމެން. މިސާލެއްގެ ގޮތުގަ މިކަމާ ބެހޭ ގޮތުން އެއްޗެއް ދަންނަވާލާނަން. ތީގެ ތެރެއިން ބޭފުޅަކު ތިމަންނަގެ ހިޔާލުފާޅުކުރުމުގެ މިނިވަންކަމޭ މިތާ ތެދުވެ އިއުލާނުކޮށްލަންވީ މިތާ ބޮމެއް އެބަ އޮތޭ. [އެހެން] ކިޔާފަ ހަޅޭލަވައިލައްވަންވީ. އެއީ މިނިވަންކަންތޯ. ދެން އެހެން މީހުންގެ ހައްގުތަކަށް އެ ހިސާބުން ވާނީ ކިހިނެއްތޯ،" މުއިއްޒު ވިދާޅުވި އެވެ.
މިނިވަން މީޑިއާ ނެތިކޮށްލާ ބިލު ފަރުމާކޮށްފައި ވަނީ މީޑިއާގެ ކޮންޓްރޯލް ސަރުކާރަށް ނެގޭނެ ގޮތަށެވެ. މީޑިއާއަށް އަދި ވަކިވަކި ނޫސްވެރިންނަށް އަދަބު ދީ ޖޫރިމަނާ ކުރެވޭނެ އުސޫލުތަކެއް ވެސް އެ ބިލުގައި ކަނޑައަޅާފައިވެ އެވެ.
