ރިއޯ ޑި ޖަނެއިރޯ، ބްރެޒިލް (އޮގަސްޓް 20) - ފުޓްބޯޅަ ތާރީހުގައި އެންމެ ގިނަ މެޗު ކުޅުމުގެ ރެކޯޑް ބްރެޒިލްގެ ގޯލްކީޕަރު، ފަބިއޯ އަށް ލިބިފައިވާ ކަމަށް އޭނާ ކުޅެމުން އަންނަ ބްރެޒިލްގެ ކްލަބް، ފްލުމިނެންސޭ އިން ބުނެފި އެވެ.
ކޮޕަ ސުޑަމެރިކާނާގެ ގަދަ 16 ބުރުގައި ފްލުމިނެންސޭ އިން ކުޅުނު މެޗަކީ، އުމުރުން 44 އަހަރުގެ ފަބިއޯ، ޕްރޮފެޝަނަލް ކެރިއަރުގައި ކުޅުނު 1391 މެޗެވެ.
ގިނިސް ވޯލްޑް ރެކޯޑް ފޮތުގައިވާ ގޮތުން، އިނގިރޭސި ލެޖެންޑަރީ ގޯލްކީޕަރު، ޕީޓާ ޝިލްޓަން، އެންމެ ގިނަ މެޗު ކުޅުމުގެ ރެކޯޑް ހަދާފައިވަނީ، 1390 މެޗު ކުޅެގެންނެވެ. އެކަމަކު، މިހާރު އުމުރުން 75 އަހަރުގެ، ޝިލްޓަން، މީގެ ކުރިން، ބުނެފައިވަނީ އޭނާގެ ހިސާބުތައް ދައްކާގޮތުން ކުޅެވުނީ، 1387 މެޗު ކަމަށެވެ. ޝިިލްޓަންގެ މި އަދަދަށް ވެސް މެޗު ހަމަވަނީ، އިނގިރޭސި 23 އަހަރުން ދަށުގެ ޓީމަށް ކުޅުނު، 13 މެޗު ވެސް ހިމަނައިގެން ކަމަށްވާތީވެ، އޭނާގެ ޖުމްލަ މެޗުގެ އަދަދާ މެދު އަބަދުވެސް ބަހުސެއް ހިނގަ އެވެ.
ޕްރޮފެޝަނަލް ކެރިއަރު 1997 ވަނަ އަހަރު ފެށިއިރު، މުޅިން ކުޅެފައިވަނީ ބްރެޒިލްގެ ކްލަބްތަކަށެވެ. އެންމެ ގިނަ މެޗު ކުޅެފައިވަނީ، ކްރުޒޭރޯ އަށެވެ. އެ ޓީމަށް 2005 އިން 2022 އަށް ކުޅުނުއިރު، 976 މެޗު ކުޅެދިނެވެ. ވަސްކޮޑަގަމާ އަށް 150 މެޗު ކުޅެދިން، ފްލުމިނެންސޭ އަށް ކުޅެދީފައިވަނީ، 235 މެޗެވެ. އަދި، އުނިއާއޯ ބެންޑެއިރަންޓޭ އަށް 30 މެޗު ކުޅެދިނެވެ.
ޖޫން/ޖުލައި ގައި އެމެރިކާގައި ކުރިއަށްދިޔަ ފީފާ ވޯލްޑް ކަޕްގައި ފްލުމިނެންސޭ އިން ކުޅުނު ހަ މެޗުގައި ވެސް ފަބިއޯ ކުޅެފައިވެ އެވެ. އޭގެއިން ތިން މެޗު ނިންމާލީ ގޯލެއް ނުވަދެ އެވެ.
