މަސްތުވާތަކެތި ގެންގުޅު ކަމަށް ތުހުމަތު ކުރެވޭ ފުލުސް މީހަކު، ފުލުހުންގެ ވަޒީފާ އަދާ ކުރީ ހުވާ ކުރާ ރަސްމިއްޔާތަށް ހާޒިރު މަކަރުން ހުވާނުކޮށް ކަމަށް ބުނެފި އެވެ.
ޖުލައި 11، ގައި ފުލުހުން އަހުމަދު ސާޖިދު ހައްޔަރު ކުރީ އޭނާ ދިރިއުޅު ގެއިން މަސްތުވާތަކެތި ކަމަށް ތުހުމަތު ކުރެވޭ އެއްޗެއް ފެނުމުންނެވެ. އޭނާގެ ގެ ބަލައި ފާސް ކުރީ ވޭޕު ވިއްކާ ކަމަށް ތުހުމަތު ކުރެވިގެން ކޯޓު އަމުރެއްގެ ދަށުންނެވެ. މަސްތުވާތަކެތި ފެނުނީ ބަލައި ފާސް ކުރުމުގެ ތެރޭގަ އެވެ.
ފުލުހުން ހުވާ ނުކުރާ ކަމަށް އަހުމަދު ސާޖިދު ބުނީ އޭނާ ބަންދުން ދޫކޮށްލަން ގދ. ތިނަދޫ ކޯޓުން ކުރި އަމުރު ދައުލަތުގެ ފަރާތުން ހައި ކޯޓުގައި އިސްތިއުނާފު ކުރުމުން މިދިޔަ ބުރާސްފަތި ދުވަހު ބޭއްވި ޝަރީއަތުގެ މަޖިލީހުގަ އެވެ.
"އާދެ ކޮންސްޓަބިއުލަރީގެ ހުވާގެ ރަސްމިއްޔާތު އޮތް އެތަނަށް އަޅުގަނޑު ވެސް ދިޔައިން. އެކަމަކު އަޅުގަނޑު ހުވައެއް ނުކުރަން، އަޅުގަނޑު ހުރީ އެތަނުގަ،" އޭނާ ބުންޏެވެ.
ސާޖިދު ބަންދު ނުކުރެވޭނެ ކަމަށް ދަށު ކޯޓުން ނިންމީ، ވޭޕު ގެންގުޅުމަކީ ޖިނާއީ ކުށަކަށް ނުވެފައި، އެފަދަ އެއްޗެއް ހޯދަން ޖިނާއީ އަމުރެއް ނުނެރެވޭނެ ކަމަށް ކަނޑައެޅުމަށްފަހު އެވެ. ދަށު ކޯޓުން ބުނަނީ ސާޖިދުގެ ގެ ބަލައި ފާސް ކުރަން ފުރަތަމަ ހޯދި އަމުރަކީ ބާތިލު އަމުރެއް ކަމުން، އެ އަމުރުގެ ދަށުން ހޯދި ހެކި ގަރީނާ ސައްހަ ކަމަށް ބަލައިނުގަނެވޭނެ ކަމަށެވެ.
އެކަމަކު، ދައުލަތުގެ ފަރާތުން ހައި ކޯޓުގައި ބުނެފައި ވަނީ، ސާޖިދަކީ ފުލުހެއް ކަމުން، ގާނޫނު ނެގެހެއްޓުމުގެ ޒިންމާއެއް އޮތް މީހަކު ވޭޕު ހިމެނޭ ގޮތަށް މަނާ ތަކެތި ވިއްކުމަކީ ޖިނާއީ ކުށެއް ކަމަށެވެ. އެހެންކަމުން މި ހާލަތުގައި، ވޭޕުގެ މައްސަލައެއްގައި ވެސް ބަލައި ފާސް ކުރުމުގެ ޖިނާއީ އަމުރެއް ނެރެވިދާނެ ކަމަށް ދައުލަތުން ބުނެ އެވެ.
އޭނާއަކީ ފުލުހުންގެ ހުވާކޮށްގެން ހުރި މީހެއް ނޫން ކަމަށް ދައްކަން ސާޖިދު ކޯޓުގައި މަސައްކަތް ކުރީ އެހެންވެ ކަމަށް ބެލެވެ އެވެ. އެކަމަކު، ފަނޑިޔާރުން ވަނީ އެ މައްސަލައިގައި ސާޖިދާއި ސާޖިދުގެ ވަކީލަށް ވަރަށް ބޮޑަށް ފާޑުވިދާޅުވެފަ އެވެ.
"ވަކީލު އެބަ އުއްމީދު ކުރަންތޯ އަޅުގަނޑުމެން ކިބައިން އޭނާ ހަދަނީ ތެދުކަން ގަބޫލު ކުރަން؟،" ހުވާ ނުކުރާ ކަމަށް ބުނެ ސާޖިދު ދެއްކި ވާހަކައަށްފަހު ފަނޑިޔާރު މުހައްމަދު ނިޔާޒު ވިދާޅުވި އެވެ.
ބުރާސްފަތި ދުވަހު އެ މައްސަލައިގެ އަޑުއެހުން ނިންމާލީ ދެން އަޑުއެހުމެއް ބާއްވާ ދުވަހަކު މައްސަލަ ނިންމާނެ ކަމަށް ކަނޑައެޅުމަށްފަހު އެވެ.
