ބާސެލް، ސްވިޒަލެންޑް (ޖުލައި 28) - ފައިނަލުގައި ޕެނަލްޓީ ޖަހައިގެން، 3-1 އިން ސްޕެއިން ބަލިކޮށް، އިންގްލެންޑުން ޔޫރޯ އަންހެނުންގެ ފުޓްބޯޅަ މުބާރާތުގެ ތަށި ދިފާއުކޮށްފި އެވެ.
މިއީ، އަމިއްލަ ގައުމުން ބޭރުގައި އިންގްލެންޑަށް ފުޓްބޯޅައިގައި މިހާތަނަށް ލިބުނު އެންމެ ބޮޑު ކާމިޔާބެވެ. މީގެ ތިން އަހަރު ކުރިން، 2022 ވަނަ އަހަރު ޖަރުމަނު ބަލިކޮށް އަންހެނުންގެ ޔޫރޯ މުބާރާތް އިންގްލެންޑުން ކާމިޔާބުކުރީ އަމިއްލަ ގައުމުގައި ކުޅެ އެވެ. އިނގިރޭސި ފިރިހެން ޓީމު ވަނީ އެންމެ ފަހުން ދެ ޔޫރޯ ފައިނަލުގައި ވެސް ބަލިވެފަ އެވެ.
މި ފަހަރުގެ ފައިނަލުގައި ރޭ އިންގްލެންޑުން ޖެހުނީ ސްޕެއިނާ ދެކޮޅަށް ހިތްވަރުގަދަ ކުޅުމެއް ދައްކާށެވެ. އެ ގޮތުން، މި މެޗުގައި ލީޑުނެގީ ސްޕެއިނުންނެވެ. އެ ޓީމަށް މެޗުގެ 25 ވަނަ މިނިޓްގައި ލީޑުނަގައިިދިނީ، މަރިއޯނާ ކެންޑިއަންޓޭ އެެވެ. އިންގްލެންޑުން އެއްވަރުކުރީ ދެ ވަނަ ހާފުގަ އެވެ. އެ ޓީމުގެ ލަނދު ޖެހީ މެޗުގެ 57 ވަނަ މިނިޓްގައި އަލެސިއާ ރޫސޯ ބޮލުންނެވެ.
ނަތީޖާ ނެރެން ޕެނަލްޓީ ޖަހަން ޖެހުނުއިރު، އިންގްލެންޑުގެ ފަސް ޕެނަލްޓީގެ ތެރެއިން ތިން ޕެނަލްޓީ ކާމިޔާބުކުރި އެވެ. އެކަމަކު، ސްޕެއިނަށް ޖެހުނީ ހަތަރު ޕެނަލްޓީގެ ތެރެއިން އެންމެ ޕެނަލްޓީ އެކެވެ.
މުބާރާތުގެ އެންމެ މޮޅު ކުޅުންތެރިއަކީ، އެންމެ ގިނަ ގޯލު ޖެހި ކުޅުންތެރިންގެ ތެރޭގައި ވެސް ހިމެނޭ އިންގްލެންޑްގެ ބެތަނީ މެޑް އެވެ.
