ކުރީގެ ރައީސް މުހައްމަދު ނަޝީދު އާއި އިދިކޮޅު މޯލްޑިވިއަން ޑިމޮކްރެޓިކް ޕާޓީގެ ޗެއާޕާސަން ފައްޔާޒް އިސްމާއިލް އެ ޕާޓީގެ ބައެއް މެންބަރުންނާއެކު މިރޭ ބައްދަލުވުމެއް ބާއްވައިފި އެވެ.
އޯޓީޕީ ރެސްޓޯރަންޓުގައި ކުރިއަށްގެންދިޔަ އެ ބައްދަލުވުމުގައި މަޝްވަރާކޮށްފައި ވަނީ އަންނަ އަހަރު ބާއްވާ ލޯކަލް ކައުންސިލް އިންތިހާބާ ގުޅޭ ގޮތުންނެވެ. ނަމަވެސް އެއީ އާންމުކޮށް ހުޅުވާލައިގެން ކުރިއަށްގެންދިޔަ ބައްދަލުވުމެއް ނޫނެވެ.
އޭގެ އިތުރުން، ވެރިކަން ހިންގުމުގެ ނިޒާމާއި ވެރިއަކު ހޮވަން ބާއްވާ އިންތިހާބުގައި ޕްރިފެރެންޝަލް ސިސްޓަމެއް ގެންގުޅުމާމެދު ވެސް އެ ބައްދަލުވުމުގައި މަޝްވަރާ ކުރި އެވެ.
އެ ބައްދަލުވުމުގައި ގާތްގަނޑަކަށް 150 އާއި 200 އާ ދެމެދުގެ އަދަދަކަށް އެމްޑީޕީގެ މެންބަރުން ބައިވެރިވި ކަމަށް އެތަނަށް ދިޔަ އަދަދު ގެ ނޫސްވެރިން ބުނެ އެވެ.
ނަޝީދު އާއި ފައްޔާޒް އިސްވެ ހުންނަވައި އެމްޑީޕީގެ މެންބަރުންނާ ބައްދަލު ކުރެއްވިއިރު، އެ ދެ ބޭފުޅުން ވެސް ވަނީ ދެން އެންމެ އަވަހަށް 2028 ގައި ބާއްވާ ރިޔާސީ އިންތިހާބުގައި ވާދަ ކުރެއްވުމުގެ ޝައުގުވެރިކަން ފާޅު ކުރައްވައިފަ އެވެ.
ނަޝީދު އާއި ފައްޔާޒްގެ އިތުރުން، ކުރީގެ ރައީސް އިބްރާހިމް މުހައްމަދު ސޯލިހާއި ރައްޔިތުންގެ މަޖިލީހުގެ މެންބަރު އަހުމަދު ޝަމްހީދު ވެސް ވަނީ ރިޔާސީ އިންތިހާބުގައި ވާދަ ކުރެއްވުމަށް ޝައުގުވެރިވާ ކަމަށް ވިދާޅުވެފަ އެވެ.
މިހާރު ގާނާގައި ދިރިއުޅުއްވާ ނަޝީދު މާލެ ވަޑައިގަތީ ރޭގެ ވަގުތެއްގަ އެވެ. މިދިޔަ ރިޔާސީ އިންތިހާބުގެ ކުރިން ސޯލިހާ ޖެހުނު މައްސަލައެއްގައި ޕާޓީ އިން ވަކިވެވަޑައިގެން ދެ އަހަރު ހުންނެވުމަށްފަހު ނަޝީދު އަލުން އެމްޑީޕީއާ ގުޅިވަޑައިގަތީ ޖޫން 23، 2025، ގަ އެވެ.
