އއ. މާޅޮހުގައި އަނިޔާވެރިކޮށް މަރާލި އަބްދުއްރަހްމާން އާދަމް، 65، ގެ މަރުގެ މައްސަލައަށް 72 ގަޑިއިރު ފާއިތުވި އިރު ވެސް ފުލުހުންނަށް އެ މައްސަލައިގައި އެއްވެސް މީހަކު ހައްޔަރު ކުރެވޭ ގޮތެއް ނުވި އެވެ.
އަބްދުއްރަހްމާނު މަރުވީ މިދިޔަ ހޮނިހިރު ދުވަހުގެ ރޭ އޭނާ ދިރިއުޅޭ މާޅޮސް، މާހިޔާ، ގޭގައި ނިދާފައި އޮއްވައި ގޮތް ނޭނގޭ މީހަކު އޭނާގެ ބޮލަށް ހަމަލާދިނުމުންނެވެ. އަބްދުއްރަހްމާން މަރުވީ އެ ރަށު ސިއްހީ މަރުކަޒުގައި ފަރުވާދެނިކޮށް ހަމަ އެ ރޭގެ ވަގުތެއްގަ އެވެ.
އަބްދުއްރަހްމާނުގެ މަރުގެ މައްސަލައިގައި އެއްވެސް މީހަކު ހައްޔަރު ކުރި ކަމަކަށް ފުލުހުން ނުބުނެ އެވެ. ނަމަވެސް ފުލުހުންގެ މީޑިއާ ޑިޕާޓްމަންޓުން ފޯނު ނުނަގާތީ އެކަމާ ގުޅޭ އެންމެ ފަހުގެ މައުލޫމާތެއް ނުލިބެ އެވެ.
އެ މައްސަލަ ތަހުގީގު ކުރަން އާދީއްތަ ދުވަހުގެ ވަގުތެއްގައި ފުލުހުންގެ ފޮރެންސިކް އަދި މަރުގެ މައްސަލަތައް ތަހުގީގު ކުރާ ޑިޕާޓްމަންޓަކުން އެ ރަށަށް ދިޔަ އެވެ. ފުލުހުން ވަނީ މާހިޔާ ގެ އާއި އެ ގެ ހުންނަ ސަރަހައްދު ބަލައި ފާސްކޮށް ބައެއް ހެކިތައް އެއްކޮށްފަ އެވެ.
އޭގެ އިތުރުން އެ ރަށުގެ ބައެއް މީހުންނާ ސުވާލުކޮށް، ފައިގެ އަދި އަތުގެ ނިޝާން ފޮރެންސިކް ބޭނުމަށް ފުލުހުން ވަނީ ނަގައިފަ އެވެ. ބައެއް މީހުން ޑީއެންއޭ ސާމްޕަލް ވެސް ނަގާފައިވެ އެވެ. ފުލުހުން އެއްކުރި ހެކިތައް ވަނީ ވެރި ރަށް މާލެއަށް ފޮނުވާލައިފަ އެވެ.
އަބްދުއްރަހީމުގެ ހަށިގަނޑުގެ އޮޓޮޕްސީއެއް ހަދަން ފުލުހުން ވަނީ ނިންމައިފަ އެވެ. އޮޓޮޕްސީ ހަދަން އޭނާގެ ހަށިގަނޑު އިންޑިއާއަށް ފޮނުވާލާފައިވާ ކަމަށް މި ނޫހަށް މައުލޫމާތު ލިބެ އެވެ.
