މެޑްރިޑް (އޭޕްރީލް 30) - ކޮޕަ ޑެލް ރޭ ފައިނަލުގައި ރެއާލް މެޑްރިޑްގެ ޑިފެންޑަރު، އެންޓޯނިއޯ ރުޑިގާގެ ފަރާތުން ފެނިގެންދިޔަ ކުޅިވަރުގެ ރޫހާ ހިލާފު އަމަލުގެ ސަބަބުން އޭނާ ހަ މެޗަށް ސަސްޕެންޑް ކުރަން ނިންމައިފި އެވެ.
ސްޕެނިޝް ކަޕްގެ ފައިނަލުން ބާސެލޯނާ އަތުން 3-2 އިން ރެއާލް ބަލިވި މެޗުގެ އިތުރު ވަގުތުގެ ދެ ވަނަ ހާފު ނިމެން ކުޑަ ވަގުތުކޮޅަކަށްވެފައިވަނިކޮށް ރެފްރީ، ބާސެލޯނާ އަށް ފައުލެއް ދޭން ނިންމުމުން، ހިތްހަމަނުޖެހުން ފާޅުކުރި ގޮތުން، ބެންޗުގައި އިން ރުޑިގާ އާއި ލޫކަސް ވަޒްކޭޒަށް ވަނީ ރަތް ކާޑެއް ދައްކައިފަ އެވެ. ރުޑިގާ އަށް ރަތް ކާޑެއް ދެއްކީ، އައިސް ކިއުބެއް ރެފްރީއާ ދިމާލަށް އެއްލުމުންނެވެ.
މި މައްސަލަ ބަލައި، ސްޕެނިޝް ފުޓްބޯޅަ ފެޑެރޭޝަނުން ރުޑިގާ އަށް ހަ މެޗުގެ ސަސްޕެންޝަނެއް ދޭން ނިންމީ އެވެ. އެކަމަކު، ރުޑިގާ އަށް މި ސަސްޕެންޝަނުން މާ ބޮޑު އަސަރެއް ނުކުރާނެ އެވެ.
ކަކުލުގެ މެނިސްކަސް އަށް ލިބުނު އަނިޔާގެ ސަބަބުން ރުޑިގާ އަށް ދެން މި ސީޒަނުގައި ނުުކުޅެވޭއިރު، އޭނާގެ ސަސްޕެންޝަންގެ ފުރަތަމަ ފަސް މެޗު މި ސީޒަނުގައި ނިމޭނެ އެވެ. އަދި، ދެން، އޭނާ ސަސްޕެންޑްވާނީ އަންނަ ސީޒަނުގެ ލީގު ފުރަތަމަ މެޗަށެވެ.
ކޮޕަ ޑެލް ރޭ ފައިނަލުގައި ރެއާލުގެ ޖޫޑް ބެލިންހަމް އަށް ދެއްކި ރަތް ކާޑު ވަނީ މާފުކޮށްފަ އެވެ. އެއީ، އެ ރަތް ކާޑު ބަދަލުކުރަން ކުރި އެޕީލްގައި ރެއާލުން ހުށަހެޅި ހެއްކައް ބެލުމަށް ފަހު އެވެ.
