ސުޕްރީމް ކޯޓުގެ ތިން ފަނޑިޔާރުގެ ގޮތުގައި ތިއްބެވި ހުސްނުއްސުއޫދު އާއި މަހާޒް އަލީ ޒާހިރާއި ޑރ. އަޒްމިރާލްދާ ޒާހިރު ސަސްޕެންޑުކުރީ ނުފޫޒު ފޯރުވަން ކަމަށް ބެލޭ ކަމަށް ބުނެ އދ. އިން ކަންބޮޑުވުން ފާޅުކޮށްފި އެވެ.
އދ. ގެ ރަސްމީ ވެބްސައިޓުގައި އާންމުކޮށްފައިވާ ބަޔާނުގައި ބުނެފައިވަނީ ފަނޑިޔާރުން ސަސްޕެންޑުކުރުމާއި ފަނޑިޔާރުންގެ ސުލޫކީ މައްސަލަ ބެލުން އަދި ކުރެވޭ ކޮންމެ ތަހުގީގަކީ ސުޕްރީމް ކޯޓަށް ނުފޫޒު ފޯރުވަން ކުރެވޭ މަސައްކަތެއްގެ ގޮތުގައި ބެލެވޭ ކަމަށެވެ.
"މިއީ ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލޭނެހެން ގާނޫނުއަސާސީއަށް ގެނައި ބަދަލާމެދު ސުޕްރީމް ކޯޓުން ގޮތެއް ނިންމުމަށް ހުށަހަޅާފައިވާ މައްސަލައަށް ނުފޫޒު ފޯރުވާ، އެ ކޯޓުގެ ނިންމުން ބަލިކަށިކުރަން ހިންގި އަމަލުތަކެއް ކަމުގައި ބެލެވޭ" އދ. ގެ މިނިވަން ފަނޑިޔާރުންނާއި ވަކީލުންނަށް ކަނޑައަޅާފައި ހުންނަ ހާއްސަ މަންދޫބު، މާގަރެޓް ސެޓާވެއިޓް ވިދާޅުވެފައިވެ އެވެ.
ތިން ފަނޑިޔާރުންނާ ދެކޮޅަށް ފަށާފައިވާ ތަހުގީގުތަކާއި ބަލަމުންދާ ސުލޫކީ މައްސަލަތަކަކީ، ފަނޑިޔާރުން މަގާމުން ވަކިކުރަން އޮންނަ އުސޫލުތަކާއި ހިލާފަށް ހިންގެ ތަހުގީގުތަކެއް ކަމަށްވެސް އޭނާ ވިދާޅުވެފައިވެ އެވެ. މިއީ މިނިވަން ފަނޑިޔާރުގެއަށް ފޯރުވޭ ނުފޫޒެއްގެ ގޮތުގައިވެސް އޭނާ ސިފަކުރައްވާފައިވެ އެވެ.
ސުޕްރީމް ކޯޓުގެ ތިން ފަނޑިޔާރުން ސަސްޕެންޑުކުރުމާއެ، ސަރުކާރާއި ރައީސް ޑރ. މުހައްމަދު މުއިއްޒުގެ މައްޗަށް ނުފޫޒު ފޯރުވުމުގެ ތުހުމަތުކުރައްވާ ފަނޑިޔާރު ސުއޫދު ވަނީ އިސްތިއުފާދެއްވާފަ އެވެ.
ފަނޑިޔާރުން ސަސްޕެންޑުކުރަން ޖޭއެސްސީން ނިންމީ އެ ބޭފުޅުންގެ މައްޗަށް އެންޓި ކޮރަޕްޝަން ކޮމިޝަން (އޭސީސީ) އިން ޖިނާއީ ތަހުގީގެއް ހިންގާ ކަމަށް ބުނެ އެވެ. އެ ތަހުގީގުގެ ތަފުސީލެއް އެއްވެސް އިދާރާއަކުން ނުދެ އެވެ.
އޭސީސީގެ މައްސަލާގެ އިތުރުން، މަގާމުގައި ތިއްބެވި އަޒްމިރަލްދާ އަދި މަހާޒުގެ މައްޗަށް ޖޭއެސްސީން ވަނީ ސުލޫކީ މައްސަލަތަކެއްގެ ތަހުގީގުވެސް ހިންގާފަ އެވެ. އެ މައްސަލައިގެ ތަހުގީގު ނިންމާ، އެ ދެ ފަނޑިޔާރުން ވަކިކުރަން ތަހުގީގީ ކޮމިޓީން ވަނީ ނިންމާފަ އެވެ.
އެ ކޮމިޓީން މިގޮތަށް ނިންމީ އެ ދެ ފަނޑިޔާރުންގެ މައްޗަށް ހިންގި ތަހުގީގުތައް ނިންމުމަށްފަހު އެވެ. އެކަން މިރޭ ބޭއްވި ޖޭއެސްސީގެ ބައްދަލުވުމުގައި ވަނީ އެ ކޮމިޝަނުގެ މެންބަރުންނާ އަންގާ ތަހުގީގީ ރިޕޯޓުތައް ހިއްސާކޮށްފަ އެވެ.
މި ނިންމުމަށް ޖަވާބުދާރީވާން ފަނޑިޔާރުންނަށް ހަތް ދުވަހުގެ ފުރުސަތެއް ލިބޭނެ އެވެ. ފަނޑިޔާރުން މަގާމުން ވަކިކުރުމާމެދު ޖޭއެސްސީން ގޮތެއް ނިންމާނީ ޖަވާބުދާރީ ވުމަށް ފުރުސަތު ދިނުމަށްފަހު އެވެ.
މަހާޒް އާއި އަޒްމިރާލްދާގެ މައްޗަށް ކުރީ އަޒްމިރާލްދާގެ ފިރިކަލުން މައްސަލައެއްގައި ހައްޔަރު ކުރުމުން، ބަންދުން ދޫކޮށްލުމަށް އެ މައްސަލަ ބެއްލެވި ކްރިމިނަލް ކޯޓުގެ ފަނޑިޔާރުންނަށް ނުފޫޒު ފޯރުވި ކަމުގެ ތުހުމަތެވެ.
އޭގެއިތުރުން، ހައި ކޯޓުގެ ކުރީގެ ރަޖިސްޓްރާ ހުސެއިން މުހައްމަދު ހަނީފު ސުޕްރީމް ކޯޓަށް ހާޒިރުކޮށް އެ ކޯޓުގެ ކުރީގެ ފަނޑިޔާރު ހުސްނުއްސުއޫދު އޭނާއާ ހުތުރުބަހުން ވާހަކަދެއްކެވިއިރު ފަނޑިޔާރު މަހާޒް އާއި އަޒްމިރަލްދާ ތިއްބެވި ކަމަށް ބުނާ މައްސަލައެއް ވެސް ޖޭއެސްސީން ސުލޫކީ މައްސަލައެއްގެ ގޮތުގައި ތަހުގީގު ކުރި އެވެ.
