އިދިކޮޅު މައި ޕާޓީ އެމްޑީޕީ އާއި އެ ޕާޓީގެ މެންބަރުންތަކެއް އުފެއްދި ދަ ޑިމޮކްރެޓްސް ގުޅިގެން މަސައްކަތް ކުރަންޖެހޭ ކަމަށް ކުރީގެ ރައީސް މުހައްމަދު ނަޝީދު ގޮވައިލެއްވުމުން، އެމްޑީޕީގެ ޗެއާޕާސަން ފައްޔާޒް އިސްމާއިލް އެކަމަށް ތާއީދު ކުރައްވައިފި އެވެ.
ފައްޔާޒު މިހެން ވިދާޅުވީ، މިވަގުތު ރާއްޖެއަށް އެންމެ ރަނގަޅު ގޮތަކީ އެމްޑީޕީ އާއި ޑިމޮކްރެޓްސް ގުޅުން ކަމަށް ވިދާޅުވެ ކުރީގެ ރައީސް މުހައްމަދު ނަޝީދު ސޯޝަލް މީޑިއާގައި ކުރެއްވި ޕޯސްޓާ ގުޅިގެން އަދަދު އިން އޭނާގެ ބަހެއް ހޯދުމަށް ގުޅުމުންނެވެ.
"ހުރިހާ އެންމެން ގުޅިގެން ވިޔަސް އެބަޖެހޭ ސަރުކާރު ހަމަ މަގަށް އަޅުވަން. އަޅުގަނޑުމެން ޕާޓީން އަބަދުވެސް ގެންގުޅޭ ސްޓޭންޑަކީ އަޅުގަނޑުމެންނާ އެއްކޮށް މިނިވަން ޑިމޮކްރެޓިކް މަސައްކަތް، ދިވެހި ރާއްޖޭގަ ޑިމޮކްރަސީ ދަމަހައްޓަން މަސައްކަތް ކުރަން ތިބި ހުރިހާ ބަޔަކާ އެކުވެސް މަސައްކަތް ކުރުން،" ފައްޔާޒު ވިދާޅުވި އެވެ.
އެމްޑީޕީ އާއި ޑިމޮކްރެޓްސް ގުޅެން މިއަދު ނަޝީދު ގޮވައިލެއްވިއިރު، އެ ދެ ޕާޓީ އެކުގައި މަސައްކަތް ކުރަންޖެހޭ ކަމަށް ކުރީގެ ރައީސް އިބްރާހިމް މުހައްމަދު ސޯލިހާއި ނަޝީދު ވެސް މީގެ ކުރިން ވަނީ ވިދާޅުވެފަ އެވެ.
އެމްޑީޕީގެ ކުރީގެ ރައީސް ނަޝީދު އެޕާޓީން ވަކިވެވަޑައިގަތީ ސޯލިހާ ދެމެދު މައްސަލަތަކަކަށްފަހެވެ. އެންމެ ބޮޑު މައްސަލައަކަށްވީ ދެ ވަނަ ދައުރަކަށް ސޯލިހު ވާދަ ކުރައްވަން ނިންމެވުމެވެ. ޑިމޮކްރެޓްސް އަކީ އެ ނިންމެވުމާއެކު ބޭއްވި އެމްޑީޕީގެ ރިޔާސީ ޕްރައިމަރީ ނާކާމިޔާބު ވުމަށްފަހު ނަޝީދު އިސްވެ ހުންނަވާ އުފެއްދެވި ޕާޓީ އެކެވެ.
ނަޝީދު އެނބުރި އެމްޑީޕީއަށް ވަޑައިގެންފި ނަމަ މަރުހަބާ ދަންނަވާނެ ކަމަށް ވެސް ފައްޔާޒު މިއަދު ވިދާޅުވި އެވެ. ނަމަވެސް، އެމްޑީޕީން ވަކިވެ އެ ޕާޓީއާ ދެކޮޅަށް މި ވީ ދެ އަހަރެއްހާ ދުވަސް ތެރޭ ނަޝީދު ކުރެއްވި އެކި ކަންކަމުގެ ސަބަބުން ޕާޓީގެ ތެރޭގައި އެމަނިކުފާނާމެދު ނުރުހުން އޮތްކަން ފައްޔާޒު ފާހަގަކުރެއްވި އެވެ.
"އަޅުގަނޑުމެންގެ ތެރޭގަ އެބަހުރި ހިތްހަމަ ނުޖެހުން ރައީސް ނަޝީދު އާ ދޭތެރޭގަ. މި ވޭތުވެދިޔަ ކަންތައްތަކުގެ ދިމާވި ކަންތަންތަކުގަ ހިތްހަމަ ނުޖެހުން އެބަހުރި މެންބަރުންގެ. ދެން ރައީސް ނަޝީދުގެ ކަމެއް ދެއްތޯ އެއީ އަޅުގަނޑުމެންގެ މެންބަރުންގެ ހިތްހަމަޖެހުން ހޯއްދެވުން. [އެމްޑީޕީއަށް] ހަމަ އާދެވޭނެ ކޮންމެ ބޭފުޅަކަށް ވެސް،" ފައްޔާޒު ވިދާޅުވި އެވެ.
ފައްޔާޒު އިތުރަށް ފާހަގަކުރެއްވީ ސަރުކާރާ ދެކޮޅަށް އެހެން ޕާޓީތަކާއި ޖަމިއްޔާތަކާއެކު މަސައްކަތް ކުރަން އެމްޑީޕީގެ ގައުމީ މަޖިލީހުން ވެސް ނިންމާފައިވާ ކަމަށެވެ. އެމްޑީޕީން މިކަމުގައި ގެންގުޅޭ ސިޔާސަތު ސާފު ކަމަށް ވެސް އޭނާ ވިދާޅުވި އެވެ.
