ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ކްލަބް އިވެންޓްސްއާ ގުޅިގެން ކުރިއަށްގެންދާ އެފްއޭއެމް ވެޓަރަންސް ލީގުގެ ތަށި ޖެހިޖެހިގެން ހަތަރު ވަނަ ފަހަރަށް ހުޅުމާލެ ވެޓަރަންސް އިން ހޯދައިފި އެވެ.
ހުޅުމާލެ ވެޓަރަންސް އިން 2022، 2023 އަދި 2024 ވަނަ އަހަރު މި މުބާރާތް ކާމިޔާބުކޮށް، ތަށި މިލްކުކުރިއިރު، މި ފަހަރުގެ ފައިނަލުގައި އިއްޔެ ހަވީރު ނުކުތީ، ވިލިމާލެ ޔުނައިޓެޑާ ދެކޮޅަށެވެ. އެ މެޗުން، 2-0 އިން ވަނީ މޮޅުވެފަ އެެވެ.
ޓާފް އެއް ނަމްބަރު ދަނޑުގައި ކުރިއަށްދިޔަ މި މުބާރާތުގައި ހުޅުމާލެ ވެޓަރަންސް ޓީމަށް ގޯލުތައް ޖަހައިދިނީ، އަލީ ރިޝްވާން (ރިސޭ) އެވެ. އަދި އެ ޓީމުގެ ދެ ވަނަ ގޯލު ޖެހީ ފަރުހާދު އިސްމާއިލް (ފަރޭ) އެވެ. މި ދެ ޓީމު ގްރޫޕް ސްޓޭޖުގައި ކުޅުނު މެޗުން ވިލިމާލެ ޔުނައިޓެޑް މޮޅުވި ނަމަވެސް، ފައިނަލުގައި ކާމިޔާބު ހޯދީ ހުޅުމާލެ ވެޓަރަންސް އެވެ.
ވެޓަރަންސް ލީގުގެ މޮޅު ކުޅުންތެރިއަކަށް ހޮވުނީ ފައިނަލް މެޗުގައި އަނިޔާވެގެން ބަދަލުކުރި ހުސެއިން ޝިމާޒް (ކޮކީ) އެވެ. ކޮކީ ވަނީ މުބާރާތުގެ އެންމެ ގިނަ ގޯލު ޖެހި ކުޅުންތެރިޔާގެ މަގާމު ވެސް ހޯދައިފަ އެވެ.
މުބާރާތުގެ އެންމެ މޮޅު ގޯލުކީޕަރަކަށް ވިލިމާލެ ޔުނައިޓެޑްގެ ކީޕަރުގެ މަގާމު، މުހައްމަދު ސިނާން (ނާނީ) އަށް ލިބުނުއިރު، އެންމެ މޮޅު ކޯޗުގެ މަގާމު ހޯދީ ހުޅުމާލޭގެ ކޯޗު އަބްދުﷲ ޝިފާއު އެވެ. އަދި، މުބާރާތުގެ ފެއާ ޕްލޭ ޓީމަކީ ޕޮލިސް ކްލަބެވެ.
މި ފަހަރުގެ މުބާރާތުގައި 10 ޓީމަކުން ވަނީ ވާދަކޮށްފަ އެވެ.
