އެފްއޭއެމް ވެޓެރަންސް ލީގުގެ ސެމީ ފައިނަލުގައި މިދިޔަ އަހަރުގެ ފައިނަލުގައި ބައްދަލުކުރި، ހުޅުމާލެ ވެޓެރަންސް ކްލަބާއި ދަ ގްރާންޑޭ ސްޕޯޓްސް ކްލަބް ކުރިމަތިލާންޖެހިއްޖެ އެވެ.
ގްރޫޕް ސްޓޭޖުގެ ފަހު މެޗުގައި އިއްޔެ، ހަވީރު، ގްރޫޕް ބީގައި ދަ ގްރާންޑޭ ސްޕޯޓްސް ކްލަބް ވަނީ 2-2 އިން ސްޓެލްކޯ ކްލަބާ އެއްވަރުވެ، އެ ގްރޫޕްގެ އެއް ވަނަ ހޯދައިފަ އެވެ. އެ ގްރޫޕްގެ އެއް ވަނައިގެ ގޮތުގައި ސެމީ އަށް ދަތުރުކުރުމުން ދަ ގްރާންޑޭ އިން ސެމީގައި ކުޅެން ޖެހޭނީ ގްރޫޕް އޭގެ ދެ ވަނަ އަށް ދިޔަ، މިދިޔަ ދެ އަހަރުގެ ޗެމްޕިއަން، ހުޅުމާލެ ވެޓެރަންސްއާ އެވެ.
ހުޅުމާލެ ވެޓެރަންސް އިން މިދިޔަ އަހަރުގެ ފައިނަލުގައި ދަ ގްރާންޑޭ ބަލިކުރީ 5-2 އިންނެވެ.
އަނެއް ސެމީ ފައިނަލުގައި ގްރޫޕް އޭގެ އެއް ވަނަ ހޯދި ދިވެހި ސިފައިންގެ ކްލަބް ބައްދަލުކުރާނީ ގްރޫޕް ބީގެ ދެ ވަނަ، މުއިވެޔޮ ފްރެންޑްސްއާ އެވެ.
ހެންވޭރު ދަނޑުގައި އިއްޔެ ހަވީރު ކުޅުނު މެޗުގައި، ދަ ގްރާންޑޭގެ މުހައްމަދު ޝަނޫން އަތުން ބައިކޮޅަށް ވަން ގޯލުން މެޗުގެ ހަ ވަނަ މިނިޓްގައި ސްޓެލްކޯ އިން ލީޑުނެގި އެވެ. އެކަމަކު، މެޗުގެ 15 ވަަަނަ މިނިޓްގައި ދަ ގްރާންޑޭގެ ހޫދު ނިޒާރު ގޯލެއް ޖަހައި، އެ ޓީމަށް އެއްވަރުކޮށްދިނެވެ.
ސްޓެލްކޯ އިން ދެ ވަނަ ފަހަރަށް ލީޑުނެގީ، 19 ވަނަ މިނިޓްގައި އިބްރާހިމް އަރިސް ޖެހި ގޯލުންނެވެ.
މެޗުން ސްޓެލްކޯ މޮޅުވާން ދަނިކޮށް، ފަހު ވަގުތު ދަ ގްރާންޑޭ އަށް އެއްވަރުކޮށްދިނީ، ހޫދު ޖެހި ގޯލުންނެވެ.
ކޮންމެ ރޯދަ މަހަކު ބާއްވާ ކުރީގެ ކުޅުންތެރިންނަށް ހާއްސަ ވެޓެރަންސް މުބާރާތުގެ ގަވާއިދުގައިވާ ގޮތުން، މި ފަހަރުގެ މުބާރާތް ހާއްސަކޮށްފައި އޮތީ 40 އަހަރުން މަތީގެ ކުޅުންތެރިންނަށެވެ. އެކަމަކު، ކޮންމެ ޓީމެއްގައި ވެސް 35 އަހަރުން މަތީގެ ދެ ކުޅުންތެރިން ހިމެނުމުގެ ފުރުސަތު އޮވެ އެވެ.
ސެމީ ފައިނަލް ފުރަތަމަ މެޗުގައި މާދަމާ ހަވީރު ސިފައިން ކުޅޭނީ މުއިވެޔޮއާ އެވެ.
