ސަރުކާރުން ބޭނުންވާނަމަ ގެއްލުމެއް ނެތް ގޮތަކަށް ގދ. ކާޑެއްދޫ އެއާޕޯޓު ދޫކޮށްލުމާމެދު ޖަދަލު ނުކުރައްވާނެ ކަމަށް އެ ރަށް ތަރައްގީކޮށް ބަލަހައްޓާ ވިލާ އެއާ ކުންފުނީގެ ޗެއާމަން އަދި މާމިގިލީ ދާއިރާގެ މެންބަރު ގާސިމް އިބްރާހިމް އިއްޔެ ވިދާޅުވި އެވެ.
"ސަރުކާރުން ބޭނުންވެގެން މިވެނިހެން އެވެނިހެން ވިދާޅުވެއްޖިއްޔާ އަޅުގަނޑުމެން މިތިބީ އެ ފަރާތަށް ރީޒަނަބަލް ގޮތަކަށް ކަމަށް ވަންޏާ. އަޅުގަނޑުމެންނަށްވެސް ގެއްލުމެއް ނެތް ގޮތަކަށް ކަމަށް ވަންޏާ އެތަން އަޅުގަނޑުމެން ދޫވެސް ކޮށްލާ ގޮތަށް މިހުރީ،" ކާޑެއްދޫ އެއާޕޯޓާ ގުޅިގެން ވިލާ އެއާގެ އިސްވެރިން ރައްޔިތުންގެ މަޖިލީހުގެ އިގުތިސޯދީ ކޮމިޓީއަށް ހާޒިރުކުރި ބައްދަލުވުމުގައި ގާސިމް ވިދާޅުވި އެވެ.
ގާސިމް ވިދާޅުވީ އޭނާގެ ވިސްނުމަކީ ކާޑެއްދޫ އިންޓަނޭޝަނަލް އެއާޕޯޓެއްގެ ގޮތުގައި ތަރައްގީކުރުން ކަމަށާއި އެކަމަށް މަސައްކަތްތަކެއް ކުރަމުންދާ ކަމަށެވެ. ނަމަވެސް މިކަމުގައި ސަރުކާރާ ޖަދަލު ކުރަން ބޭނުންނުވާ ކަން އޭނާ ފާހަގަކުރެއްވި އެވެ.
ކާޑެއްދޫ އިންޓަނޭޝަނަލް ކުރުމަށް ކުރިމަތިވި ހުރަސްތަކުގެ ތެރޭގައި ކުރީގެ ރައީސް ޔާމީނުގެ ވެރިކަމުގައި އެ ރަށް އަތުލުމާއި ކޯޓުން ރަށް ހޯދުމަށް ކުރި މަސައްކަތް އަދި ރަށް ލިބުނުއިރު ދުނިޔޭގެ އިގުތިސޯދީ ހާލަތު އޮތް ގޮތް އޭނާ ފާހަގަކުރެއްވި އެވެ.
"އެކޮޅުން ހިއްކާ ރަންވޭ ހަދާ އިންޓަނޭޝަނަލް އެއާޕޯޓަކަށް ދާން އަޅުގަނޑުމެންގެ ވިސްނުން އޮތީ. އެކަމަކު ސަރުކާރުން އިރުއިރުކޮޅުން އަޅުގަނޑުމެން އަތުން އަތުލާފަ. އިރުއިރުކޮޅުން ގޯނާކުރަންޏާ ކިހިނެތްތޯ އެކަން ކުރާނީ،" ގާސިމް ވިދާޅުވި އެވެ.
