އިދިކޮޅު އެމްޑީޕީން ޓޫރިޒަމް ސިނާއަތް ފުނޑާލަން ރިސޯޓުތަކަށް ޓެރަރިސްޓު ހަމަލާއެއް ދޭން އުޅޭ ކަމަށް ތުހުމަތުކުރުމުން ޓޫރިޒަމް މިނިސްޓްރީގެ ސްޓޭޓު މިނިސްޓަރުކަމުން ސަސްޕެންޑުކުރި މުހައްމަދު ނިހާދަށް ފިނޭންސް މިނިސްޓްރީގެ ސްޓޭޓު މިނިސްޓަރުކަން ދީފި އެވެ.
ރައްޔިތުންގެ މަޖިލީހުގެ ފޭދޫ ދާއިރާގެ ކުރީގެ މެންބަރު ނިހާދު މި ތުހުމަތުތައް ކުރެއްވީ ޕީއެންސީގެ ޖަލްސާއެއްގައި މިދިޔަ މަހު ވާހަކަ ދައްކަވަމުންނެވެ. އޭނާ ވިދާޅުވީ ދެ މިލިއަން ވަނަ ޓޫރިސްޓު އަންނަން އުޅޭ ދަނޑިވަޅާ ދިމާކޮށް އެމްޑީޕީން އެފަދަ ހަމަލާއެއް ރާވަމުންދާ ކަމަށެވެ.
ނިހާދުގެ މި ވާހަކަތަކާ ގުޅިގެން ޕީއެންސީން ވަނީ ބަޔާނެއް ނެރެ, ރާއްޖޭގައި ހިންގާ ސިޔާސީ ޕާޓީއަކުން އެފަދަ ކަމެއް ނުކުރާނެ ކަމަށް ބުނެފަ އެވެ.
ސަސްޕެންޝަނުގައި ހުރި ނިހާދަށް ފިނޭންސް މިނިސްޓްރީން މަގާމެއް ދީފައިވާކަން "އަދަދު" ނޫހަށް ކަށަވަރުވެފައިވެ އެވެ. އަދި މިދިޔަ ބުރާސްފަތި ދުވަހުން ފެށިގެން ވަޒީފާއަށް ނުކުންނަވަމުން ފައްޓަވާފައިވާ ކަން ވެސް ވަނީ އެނގިފަ އެވެ.
ނިހާދު މި ސަރުކާރާ ގުޅިވަޑައިގަތުމުގެ ކުރިން ހުންނެވީ އެމްޑީޕީގަ އެވެ. އެމްޑީޕީގައި ހުންނަވައިގެން އޭނާ ވަނީ ޕީޕީއެމް/ޕީއެންސީއަށް ވަރަށް ބޮޑަށް ފާޑުވިދާޅުވެފަ އެވެ. އަދި ކުރީގެ ރައީސް އިބްރާހިމް މުހައްމަދު ސޯލިހުއަށް ދެވަނަ ދައުރެއް ހޯދައިދޭން އެންމެ ގަދަޔަށް މަސައްކަތް ކުރި މީހުންގެ ތެރޭގައި ވެސް އޭނާ ހިމެނެ އެވެ.
ނަމަވެސް ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި ފަހުން, އޭނާ ވަނީ އެމްޑީޕީއާ ފެޔަށް ޖެހިވަޑައިގެންފަ އެވެ. އޭނާއަކީ އެމްޑީޕީ ދޫކޮށް ޕީއެންސީއަށް ސޮއިކުރި 13 މެންބަރުންގެ ތެރޭގައި ހިމެނިވަޑައިގަންނަވާ ބޭފުޅެކެވެ.
