އިދިކޮޅު އެމްޑީޕީގެ މެންބަރުން ބޭނުންވަނީ ޕާޓީގައި ދެމިތިބި މީހުންނާއެކު ކުރިއަށްދާން ކަމަށް އެ ޕާޓީގެ ޗެއާޕާސަންގެ މަގާމަށް ވާދަކުރައްވާ ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް މިއަދު ވިދާޅުވެއްޖެ އެވެ.
މީކާއީލްގެ ސަޕޯޓަރުންނަށް ދިން މެސެޖެއްގައި ވިދާޅުވީ އިތުބާރު ކެމްޕެއިން ޓީމުން ދާ ކޮންމެ ރަށަކުން މެންބަރުންގެ ފަރާތުން ލިބޭ މެސެޖަކީ ޕާޓީގައި ދެގޮތެއް ނުވެ ދެމިތިބި މީހުންނާއެކު ކުރިއަށްދާން ބޭނުންވާކަން ކަމަށެވެ.
"އަޅުގަނޑުމެންނަށް ލިބޭ ޔަގީންކަމަކީ އެމްޑީޕީގެ އާންމު މެންބަރުން ކުރިއަށްދާން ބޭނުންވަނީ މި ޕާޓީއާއެކު ދެ ގޮތެއްނުވެ ދެމިތިބި ފަރާތްތަކާއެކުއޭ. މި ޕާޓީގެ މެންބަރުން ކުރިމަގު ބައްޓަންކުރަން ބޭނުންވަނީ އާ ޒުވާން ޖީލަކާއެކުއޭ،" އޭނާ ވިދާޅުވި އެވެ.
މީކާއީލް އިތުރަށް ވިދާޅުވީ ޕާޓީގެ މަތި ފަޑިއަށް އާ ޒުވާން މޫނުތައް އަދި ޒުވާން ޖީލެއް ބޭނުންވާ ކަމަށެވެ. އެގޮތުން އޭނާ ވިދާޅުވީ ޕާޓީގެ މުސްތަގުބަލަށްޓަކައި މެންބަރުން ވޯޓުލާން ބޭނުންވަނީ އިތުބާރަށް ކަމަށެވެ.
އެމްޑީޕީގެ ޗެއާޕާސަން އިންތިހާބު ބޭއްވުމަށް ހަމަޖެހިފައިވަނީ މި މަހުގެ 12، ވާ ހުކުރު ދުވަހު އެވެ. އިންތިހާބުގައި މީކާއީލްގެ އިތުރުން ދެން ވާދަކުރައްވަނީ ކުރީގެ ރައީސް މުހައްމަދު ނަޝީދު އެވެ. އެމަނިކުފާނު ގެންދަވަނީ "ބޮޑު ބަދަލު"ގެ ނަމުގައި މުޅި ރާއްޖޭގައި ވަރުގަދަ ކެމްޕޭނެއް ހިންގަވަމުންނެވެ.
މީގެ ކުރިން ވެސް މީކާއީލް ވަނީ އޭނާ ޗެއާޕާސަން ކަމަށް އިންތިހާބުވެއްޖެ ނަމަ ޕާޓީއަށް ބޮޑެތި ބަދަލުތަކެއް ގެންނަވާނެ ކަމަށް ވިދާޅުވެފަ އެވެ. އެގޮތުން ދެފުށް ފެންނަ ސިޔާސަތެއްގެ ދަށުން ޕާޓީގެ މާލީ ހިސާބުތައް އާންމުކުރަން ވެސް ވައުދުވެވަޑައިގެންނެވި އެވެ.
ރައްޔިތުންގެ މަޖިލީހަށް ދެވަނަ ދައުރަކަށް 2024 ގައި އިންތިހާބުވި އެމްޑީޕީއަށް ނިސްބަތްވާ ހަތަރު މެންބަރުންގެ ތެރެއިން މީކާއިލްއަކީ އެކަކެވެ. އެންމެ ފަހުން އޮތް މަޖިލިސް އިންތިހާބުގައި ގަލޮޅު ދެކުނު ދާއިރާގެ ގޮނޑި މީކާއިލް ދިފާއުކުރެއްވި އެވެ.
މީކާއިލް އެމްޑީޕިއާ ގުޅުނީ 2012 ވަނަ އަހަރު ކުރީގެ ރައީސް މުހައްމަދު ނަޝީދު ހިންގެވި އެމްޑީޕީގެ ފުރަތަމަ ސަރުކާރު ބަގާވާތަކުން ވައްޓާލުމާ ގުޅިގެންނެވެ. އެ ޕާޓީގެ ޒުވާނުންގެ ހިތްވަރުގެ ރައީސްކަން ވެސް މީކާއިލް ކުރެއްވި އެވެ. އަދި މިވަގުތު ވެސް އޭނާއަކީ އެ ޕާޓީގެ ގައުމީ މަޖިލީހުގެ މެންބަރެކެވެ.
