ސިޔާސީ ޕާޓީތަކަށް ދޭ ފައިސާގެ އަދަދު ކަނޑައެޅުމުގެ ކުރިން ޕާޓީތަކުގެ ދަފްތަރު އާންމުކޮށް، ޝަކުވާ ހުށަހެޅުމުގެ ފުރުސަތު ހުޅުވާލާނެ ކަމަށް އިލެކްޝަންސް ކޮމިޝަނުން ބުނެފި އެވެ.
އިލެކްޝަންގެ މެންބަރު ހަސަން ޒަކަރިއްޔާ "އަދަދު" އަށް ވިދާޅުވީ މިފަހަރު ސިޔާސީ ޕާޓީތަކަށް ދޭ ފައިސާގެ އަދަދު ކަނޑައެޅުމުގެ ކުރިން ދަފްތަރު ސާފުކޮށް އާންމު ކުރެވޭނެ ކަމަށެވެ.
މިގޮތުން ދަފްތަރު މިއަދު އާންމު ކުރުމަށް ފަހު، އެ ދަފްތަރަށް ޝަކުވާ ހުށަހަޅަން ފުރުސަތު ހުޅުވާލާނެ ކަމަށް ވެސް ޒަކަރިއްޔާ ވިދާޅުވި އެވެ.
"މިފަހަރު އަދަދު ކަނޑައަޅާނީ ދަފްތަރު ސާފުކުރުމަށްފަހު. ދަފްތަރު އާންމު ކުރެވޭނެ. ޝަކުވާ ވެސް ހުށަހަޅަން ފުރުސަތު ލިބޭނެ ދަފްތަރަށް،" ޒަކަރިއްޔާ ވިދާޅުވި އެވެ.
ޕާޓީތަކަށް ފައިސާ ދޫކުރާނީ އެ ޕާޓީތަކުން އަހަރީ ރިޕޯޓާއި އޮޑިޓް ރިޕޯޓު ހުށަހެޅުމުންނެވެ. މިގޮތުން މިހާތަނަށް އެއްވެސް ޕާޓީއަކުން އަހަރީ ރިޕޯޓުގެ އިތުރުން އޮޑިޓް ރިޕޯޓް ހުށަހަޅާފައެއް ނުވެ އެވެ.
ޕާޓީތަކުން އޮޑިޓް ރިޕޯޓް ހުށަހަޅަން ޖެހޭނީ އަހަރު ނިމޭތާ 90 ދުވަސް ތެރޭގަ އެވެ. އަދި ފެބްރުއަރީގެ ނިޔަލަށް ޕާޓީތަކުގެ އަހަރީ ރިޕޯޓް ހުށަހަޅަން ޖެހޭނެ އެވެ.
ސިޔާސީ ޕާޓީތަކުގެ ދަފްތަރު އާންމު ކުރުމަށް ހަމަޖެހިފައި ވަނީ ޑިސެމްބަރު 31، ގެ ނިޔަލަށް ހުށަހަޅާފައި ހުރި ފޯމްތައް ޕްރޮސެސް ކުރުމަށްފަހު އަންނަ މަހުގެ ތެރޭގަ އެވެ.
މިފަހަރު އިލެކްޝަނުން ޕާޓީތަކަށް ދޭ ފައިސާގެ އަދަދު ކަނޑައެޅުމުގެ ކުރިން ދަފްތަރަށް ޝަކުވާ ހުށަހަޅަން ފުރުސަތު ދޭން ނިންމާފައިވަނީ ވެރިކަން ކުރާ ޕީއެންސީއަށް ވަގަށް ގިނަ ބަޔަކު ވެއްދި ކަމުގެ މައްސަލަ ފެންމަތިވެފައިވާ ދަނޑިވަޅެއްގަ އެވެ.
ވަގު ފޯމު ފުރައިގެން ޕީއެންސީއަށް މީހުން ވައްދާކަން ފަޅާއެރިފަހުން، ނިމިދިޔަ 2024 ވަނަ އަހަރުގެ ފަހު ތިން މަސްދުވަސް ތެރޭ އެ ޕާޓީއަށް 39،985 މީހުން ވައްދާފައި އޮތްކަން އިލެކްޝަންސް ކޮމިޝަނުގެ ތަފާސްހިސާބުތަކުން ވަނީ ދައްކާފަ އެވެ.
މައުލޫމާތު ހޯދުމާއި ލިބުމުގެ ހައްގުގެ ދަށުން "އަދަދު" އިން އިލެކްޝަންސް ކޮމިޝަނުގެ ފަރާތުން ހޯދި މައުލޫމާތުތަކުން އެނގޭ ގޮތުގައި ޑިސެމްބަރު، 2024، ގެ ނިޔަލަށް ޕީއެންސީއަށް 68،968 މީހުން ވަނީ ރަޖިސްޓްރީކޮށްދީފަ އެވެ.
