މާލޭގެ ގެއެއް ކޮންނަނިކޮށް އިހު ޒަމާނުގައި ބޭނުންކޮށް އުޅުނު އާސާރީ ބޮޑުބަޑިއެއް އިއްޔެ ފެނިއްޖެ އެވެ.
ބޮޑުބަޑި ފެނުނީ ޗާންދަނީ މަގާއި ދަނބު ގޯޅި ގުޅޭ ކަންމަތީގައި، ކުރިން ހަބީބް ބޭންކުން ބޭނުން ކުރި ބިމެއް ހުރި ތަނުންނެވެ.
ބޮޑުބަޑި މިހާރު ވަނީ ހެރިޓޭޖް މިނިސްޓްރީގެ ބެލުމުގެ ދަށަށް ގެންގޮސްފަ އެވެ.
މީގެ ކުރިން 2022 ވަނަ އަހަރު ވެސް މާލެއިން ވަނީ ބޮޑުބަޑިއެއް ފެނިފަ އެވެ. އެ ފަހަރު ބަޑި ފެނުނީ ޓާޓާ ކުންފުނިން މިހާރު ފްލެޓު އަޅަމުންދާ ކުރީގެ ނާދީ ހުރި ބިމުންނެވެ.
ބޮޑުބަޑިއަކީ ކުރިން މާލޭގެ ސަލާމަތަށް ގެންގުޅުނު ބަޑިތަކެކެވެ. ބަޑިތައް ބަހައްޓާފައި ހުރީ މާލޭގެ އެކި ސަރަހައްދުތަކުގައި ބިނާކޮށްފައި ހުރި ބުރުޒުތަކެއްގަ އެވެ.
އެ ބުރުޒުތަކުގައި 100 އަށް ވުރެ ގިނަ ބޮޑުބަޑި ބަހައްޓާފައި ހުރި ކަމަށްވެ އެވެ. އޭގެ ތެރޭގައި ލޯ ބަޑި ވެސް ހިމެނެ އެވެ.
ކުރިން ބޭނުން ކުރި ބައެއް ބޮޑުބަޑި މާލޭގައި ޑިސްޕްލޭކޮށްފައި ހުއްޓެވެ. އެއް ނަންބަރު ޖެޓީ ކައިރީގައި ވެސް ދެ ބޮޑުބަޑި ހުއްޓެވެ. ނަމަވެސް ފަހުން އެ ބަޑިތައް ވަނީ ނަގައިފަ އެވެ. ދާރުލްއާސާރުގެ ބޭރުގައި މިހާރު ވެސް ބޮޑުބަޑިއެއް ޑިސްޕްލޭކޮށްފައި ހުރެ އެވެ.
