އދ. އަތޮޅު މިރިހި އައިލެންޑް ރިސޯޓް ކައިރީގައި އޮތް “ނޯތު 7” ނަމަކަށް ކިޔާ ސަފާރީން މޫދަށް ވެއްޓި ގެއްލިގެން ހޯޑަމުންދިޔަ މީހާ މަރުވެފައި އޮއްވައި ފެނިއްޖެ އެވެ.
އެމްއެންޑީއެފުން ބުނީ އޭނާގެ ހަށިގަނޑު ހޯދާފައި ވަނީ ކަނޑުގެ 69 މީޓަރު އަޑިން ކޯސްޓުގާޑުގެ ސެކަންޑް ސްކޮޑްރަންގެ ޑައިވަރުން ކަމަށެވެ.
ސަފާރީން މޫދަށް ވެއްޓި ގެއްލިގެން ހޯދަމުން ދިޔައީ އަލީ އަރުޝަދު، 35، ސީވީޑް، ނ. ހޮޅުދޫ އެވެ.
އެމްއެންޑީއެފުން ބުނީ އަރުޝަދުގެ ހަށިގަނޑު ލޯންޗަށް ނެގީ މިއަދު ހަވީރު 3:35 ހާއިރު ކަމަށެވެ.
ފުލުހުން މީގެ ކުރިން ބުނެފައި ވަނީ އަރުޝަދު ގެއްލިގެން ރިޕޯޓު ކުރީ މިއަދު ހެނދުނު ކަމަށެވެ. އެ ރިޕޯޓު ލިބުމާ ގުޅިގެން ސަފާރީގެ ސީސީޓީވީ ފުޓޭޖު ބެލުމުން، ސަފާރީގެ ޑެކު މަތީގައި ހުއްޓައި އަރުޝަދު ވެއްޓި އަރިމަތީގައި ޖެހިފައި މޫދަށް ވެއްޓޭ މަންޒަރު ފެނުނު ކަމަށް ފުލުހުން ބުންޏެވެ.
އަރުޝަދުގެ ހަށިގަނޑު ހޯދުމަށް ފުލުހުންނާއި ސިފައިން ގުޅިގެން މަސައްކަތް ކުރި އެވެ.
