ރާއްޖެއަށް މިފަހުން ކުރި ވިއްސާރައިގެ ގަދައިގައި ޖެހި ވ. އަތޮޅު ޖަވާހިރެއްގެ ގޮތުގައި ފާހަގަކުރެވޭ ޝިޕްރެކް މުޅީންހެން ހަލާކުވެއްޖެ އެވެ.
ވ. ތިނަދޫ ކައުންސިލުގެ ރައީސް، ޝިފާގު މުފީދު "އަދަދު" ނޫހަށް ވިދާޅުވީ މިފަހުން ކުރި ވިއްސާރައިގައި ބޯޓު ހަލާކުވީ ގިނަ ދުވަސްވެ ފީވެފައި އޮތުމުން ކަމަށެވެ. މިހާރު އެ ބޯޓުގެ ބައިތައް އެއްކޮށް ފީވެ، ބޯޓާ ވަކިވެގެން އޮޔާދާ ކަމަށް އޭނާ ވިދާޅުވި އެވެ.
"ޝިޕްރެކް އެއްކޮށް ހަލާކުވެގެން އޭގެ ބައިތައް އޮޔާ ދަނީ، މިއޮއް ހުރިހާ ދުވަހު އޭތި ކޮޅަށް އެ ހުރީ އަސްލު އޭގެ ކުރީ ކޮޅުގައި ވައި ހެދިފައި ހުރުމާއި އޭގައި ހުރި ފޯމުގެ ބާރުގައި، އެކަމަކު އެއީ ލަކުޑި ބޯޓެއް ވީމާ އޭގެ ވެސް އިންނާނެތާ ދުވަހެއް،" ޝިފާގު ވިދާޅުވި އެވެ.
ވ. އަތޮޅުގައި އޮންނަ ޝިޕްރެކަކީ މުޅި ރާއްޖޭގެ އިތުރުން ރާއްޖެއަށް ޒިޔާރަތް ކުރާ ފަތުރުވެރިންގެ މެދުގައި ވެސް ވަރަށް މަގުބޫލު ތަނެކެވެ. ދުވާލެއްގެ މައްޗަށް އެ ޝިޕްރެކަށް 200 އެއްހައި މީހުން ޒިޔާރަތް ކުރާ ކަމަށް ޝިފާގު ވިދާޅުވި އެވެ. އެ ޝިޕްރެކު އޮންނަނީ ވ. އަތޮޅު ކައުންސިލުގެ ބެލުމުގެ ދަށުގަ އެވެ.
"ވަރަށް ބޮޑު ގެއްލުމެއް އެއީ އަސްލު، މި އަތޮޅުގެ އިތުރުން މާލެ އަތޮޅުގެ ގިނަ ރިސޯޓުތަކުން ވެސް ދަތުރު އަޅާ ތަނެއް އެއީ، ޝިޔާމުގެ ރިސޯޓުތަކާއި އަލިމަތާ ރިސޯޓާއި އަނަންތަރާ އޮޅުވެލިފުށި ކަހަލަ އެތައް ބައިވަރު ރިސޯޓަކުން ގެސްޓުން ގޮވައިގެން ދަތުރު އަޅާ ތަނެއް އެއީ،" ޝިފާގު ވިދާޅުވި އެވެ.
ވ. އަތޮޅުގައި އަޑިއަށް ގޮސްފައި އޮންނަ ބޯޓަކީ މީގެ 10 ވަރަކަށް އަހަރު ކުރީން ރާއްޖެއިން ބޭރުން އޮޔާ އައި ބޯޓެކެވެ. އޮޔާ ގޮސް އެ ބޯޓު ވ. އަތޮޅަށް ވަނުމުން ފުރަތަމަ އެ ބޯޓު ކަފުޖަހައިގެން ގެންދަން މަސައްކަތް ކުރީ އެ އަތޮޅު ތިނަދޫ ބައެކެވެ. ނަމަވެސް އެންމެ ދޯންޏެއްގައި އެމީހުންނަށް އެ ބޯޓު ކަފު ޖަހައިގެން ގެންދެވޭ ގޮތެއް ނުވި އެވެ.
އެއަށްފަހު އެ ބޯޓުގެ މައުލޫމާތު ލިބިގެން އެމްއެންޑީއެފްގެ ޓީމެއް އެ ސަރަހައްދަށް ގޮސް އެ ބޯޓު ކައިރިއަށް ފީނައި އޭގައި ހަތިޔާރު ހުރިތޯ ބެލުމުގެ މަސައްކަތްތަކެއް ވެސް ކުރި އެވެ. ނަމަވެސް އޭގެ ތެރެއިން އެއްވެސް ހަތިޔާރެއް ފެނުނު ކަމެއް ނުވަތަ ނޫން ކަމެއް ނޭނގެ އެވެ. ބޮޑަށް ބެލެވޭ ގޮތުގައި އެ ބޯޓަކީ އަވައްޓެރި ސްރީލަންކާއަށް ނިސްބަތްވާ ބޯޓެކެވެ.
އެ ބޯޓު މިހާރު އޮންނަ ސަރަހައްދުގައި މަޑުޖެހުނީ ވ. ކެޔޮދޫ ބަޔަކު އެ ބޯޓު ކަފު ޖަހައިގެން އެ ރަށް ކައިރިއަށް ގެންގޮސްފައި އޮއްވައި އޮޔާ ގެންގޮހެވެ. ވ. ޝިޕްރެކުގެ ގޮތުގައި އެތަން މުޅި ރާއްޖެއަށް މަޝްހޫރުވީ މީގެ އަހަރުތަކެއް ކުރިން ޓީވީއެމުން ގެނެސްދިން މޯލްޑިވިއަން އައިޑޮލްގެ ތެރެއިން ދެއްކި އެލައިޑް އިންޝުއަރެންސްގެ އިޝްތިހާރެއްގެ ސަބަބުންނެވެ.
"ކުރިން ވެސް އެތަނަށް މި އަތޮޅު މީހުން ޑައިވްކޮށް ހަދާ، އެކަމަކު އެތަން ބޮޑަށް މަޝްހޫރުވީ އެލައިޑުން ދެއްކި އިޝްތިހާރަށްފަހު، ދެން އެތަން އަސްލު އަގުބޮޑު ތަނަކަށް ހެދީ މި އަތޮޅުގައި ލޯކަލް ޓޫރިޒަމްގެ ވިޔަފާރި ކުރާ މީހުން،" ޝިފާގު ވިދާޅުވި އެވެ.
