މާލެ ސިޓީ ކައުންސިލުގައި ހުރި މައްސަލަތަކާއި ވޭތުވެދިޔަ ތަނުގައި އެ އިދާރާގެ ތެރޭ ހިނގާފައިވާ ކަންކަމާ ގުޅޭ ގޮތުން "އަދަދު" ނޫހަށް މައުލޫމާތު ދޭ ބަޔަކު ހޯދާނެ ކަމަށް ބުނެ މާލެ ސިޓީގެ ޑެޕިއުޓީ މޭޔަރު އަހުމަދު ނަރީޝް ކައުންސިލުގެ މުވައްޒަފުންނަށް އިންޒާރު ދީފި އެވެ.
ސިޓީ ކައުންސިލުގެ އިސް ވެރިން ތިބޭ ގްރޫޕަކަށް ފޮނުއްވި ހައެއްކަ މެސެޖުގައި ނަރީޝް ވަނީ ތަކުރާރުކޮށް އެ ބަޔަކު ހޯދާނެ ކަމަށް ވިދާޅުވެފަ އެވެ. އެހެން ވިދާޅުވެ އޭނާ ހިއްސާކުރެއްވީ ސިޓީ ކައުންސިލްގައި ހުރި ހުރިހާ ލިޔުމެއް ޑިޖިޓަލް ކުރަން ބޮޑު އަގެއްގައި ބަޔަކާ ހަވާލުކޮށްފައިވާކަން ރިޕޯޓުކޮށް މި ނޫހުން ގެނެސްދިިން ހަބަރުގެ ސޯޝަލް މީޑިއާ ޕޯސްޓުގެ ލިންކެކެވެ.
"މި މައުލޫމާތު ކައުންސިލުން ދިން މީހަކު އެނގެން ބޭނުން! ބުނަން މި ތާނގަ ނުކެރެންޏާ އަޅުގަނޑު ހޯދަންވެސް ހޯދާނަން. މި ލެވެލްއަށް ވެއްޓެންޏާ އަޅުގަނޑުމެން ވެސް ދެން ވެއްޓޭނީ މިއަށްވުރެ ލޯ ލެވެލް އަށް. އޭރުން ކައުންސިލް ހިންގަން އެކަކަށް ވެސް ފަސޭހައެއް ނުވާނެ،" ވަޓްސްއެޕް ގްރޫޕަށް ފޮނުވި މެސެޖުގައި ނަރީޝް ވިދާޅުވެފައިވެ އެވެ.
ކުރިއަށް އޮތްތަނުގައި ކައުންސިލުގެ ތަރުޖަމާނަކު ހޮވާނީ ކައުންސިލުން ފާސްކޮށްގެން ކަމަށާއި މީޑިއާތަކަށް މައުލޫމާތު ދޭން އުސޫލެއް ހަމައެއް ނެތިއްޔާ އޭނާގެ ވެސް ހަމައެއް ނޯންނާނެ ކަމަށް ވިދާޅުވެ ވެސް ނަރީޝް ވަނީ ކައުންސިލްގެ މުވައްޒަފުންނަށް އިންޒާރުދީފަ އެވެ.
މިހާތަނަށް އޭނާ ދިޔައީ ކޮންމެ ކަމެއްގައި ވެސް 1،000 ޕަސެންޓު ސަޕޯޓު ދެމުން ކަމަށް ވެސް ނަރީޝް ވިދާޅުވި އެވެ. ބެލެވޭ ގޮތުގައި މިއީ މާލެ ސިޓީގެ މޭޔަރު ކަމަށް އިދިކޮޅު އެމްޑީޕީގެ އާދަމް އާޒިމް އިންތިހާބުވި ފަހުން ކަން ހިނގަމުންދާ ގޮތުގެ ވާހަކަ އެވެ.
"ޕޮލިޓިކަލް އެޓޭކު ދެންޏާ އަޅުގަނޑުމެންވެސް މިއަދާ ހަމައަށް ތިބޭނީ ސަޕޯޓު ނުދީ ހިންގިޔަ ނުދީ. އެކަމަކު އެހެންނެއް ނޫން އަޅުގަނޑުމެން ކަން ކުރަމުން އައީ،" ނަރީޝްގެ ފަހު މެސެޖުގައި ލިޔުއްވާފައިވެ އެވެ.
މި މެސެޖުތަކުގެ ސްކްރީން ޝޮޓެއް މި ނޫހަށް ވަނީ ލިބިފަ އެވެ. ނަރީޝް ހިތްހަމަނުޖެހުނު ހަބަރުގައި ގެނެސްދިން އެއްބަސްވުމަކީ ރައީސް ޑރ. މުހައްމަދު މުއިއްޒު މާލޭގެ މޭޔަރު ކަމުގައި ހުންނެވި ދުވަސްވަރު އެކުލަވައިލި އެއްބަސްވުމެކެވެ.
ރަޢީސްގެ މޭޔަރުކަމުގައި ކުރި އިއުލާނުގައި އޮތީ ކައުންސިލުގެ ސްޓްރެޓެޖިކް އެކްޝަން ޕްލޭންގެ އަމާޒެއް ކަމުގައިވާ ޑިޖިޓަލް ކުރުމުގެ މަޝްރޫއު ހިންގުމަށްޓަކައި ސެކްޝަންތަކުގައި ހުރި އެންމެހާ ލިޔެކިޔުންތައް ސްކޭންކުރުމަށް ބޭނުންވާތީ ބިޑު ހުށަހެޅުމަށެވެ.
މި އިއުލާނުގެ ދަށުން މަސައްކަތް ހަވާލުކުރީ އެކުއިޓައިޒް ޕްރައިވެޓް ލިމިޓެޑް ނަމަކަށް ކިޔާ ކުންފުންޏަކާ އެވެ.
މި ނޫހަށް މައުލޫމާތު ލިބިފައިވާ ގޮތުގައި އެކިއުޓައިޒް މޯލްޑިވްސްއާ ލިޔެކިޔުންތަކުގެ ޑިޖިޓަލައިޒޭޝަަން މަސައްކަތް ހަވާލުކުރީ ތިން މަސް ދުވަހުގެ ތެރޭގައި މަސައްކަތް ނިންމާ ގޮތަށެވެ. އެހެންނަމަވެސް މިއަހަރުގެ މެއި މަހާ ހަމައަށް ދިޔަ ދިޔައިރު، މަސައްކަތް ފުރިހަމަ ކުރެވިފައެއް ނުވެ އެވެ. ނަމަވެސް، އެ ކުންފުންޏަށް ސިޓީ ކައުންސިލުން 4.5 މިލިއަން ރުފިޔާ ދީފައިވާ ކަމަށް، އެ މައުލޫމާތު އެނގޭ މީހަކު ބުންޏެވެ.
އެ ހަބަރު ގެނެސްދިނުމަށް ކުރި މަސައްކަތުގައި ސިޓީ ކައުންސިލްގެ އެކި ފަންތިތަކުގެ މުވައްޒަފުންނާ މި ނޫހުން ވާހަކަ ދެއްކި އެވެ. ބައެއް ސްޓާފުން ގަބޫލުކުރާ ގޮތުގައި އެ މަޝްރޫއުގެ ބޭނުމަކީ ބަޔަކަށް ފައިސާތަކެއް ދޫކުރުމެވެ.
"އެހެން ނޫންނަމަ ތިން މަސް ދުވަހަށް ހަވާލުކުރި މަސައްކަތެއް އެތައް އަހަރަކަށް ދިގު ދެމިގެން ދާންޖެހޭ ސަބަބެއް ނެތް. އެ މީހުން ބައެއް ސްޓާފުން ގެނައި އެ މަސައްކަތަށް. ނަމަވެސް ހުރިހާ ވަސީލަތެއް، ސްކޭނަރަށް ދާންދެން ދިނީ ސިޓީ ކައުންސިލުން. ނަމަވެސް މަސައްކަތް އޮތީ ނުނިމި،" ސިޓީ ކައުންސިލްގެ މުވައްޒަފަކު ބުންޏެވެ.
ނަރީޝް ހޯދަން ބޭނުންވަނީ މި މައުލޫމާތުތައް ހިއްސާކުރި މުވައްޒަފުންނެވެ.
