ސަރުކާރުގެ ކުންފުނިތަކުގެ އޮނިގަނޑު ބަދަލުކުރުމާއި ލޯނު ނެގުން ހިމެނޭހެން ގިނަ ކަންކަމުގައި ފިނޭންސް މިނިސްޓްރީގެ ހުއްދަ ހޯދަން ޖެހޭ ގޮތަށް ކޯޑް އޮފް ކޯޕަރޭޓް ގަވަނަންސް ފޯ ސްޓޭޓް އޯންޑް އެންޓަޕްރައިޒަސް އަށް ބަދަލުގެނެސްފި އެވެ.
ޕްރައިވަޓައިޒޭޝަން އެންޑް ކޯޕަރޭޝަން ބޯޑު (ޕީސީބީ) އިން މިއަދު ނެރުނު ސާކިއުލާއެއްގައި ބުނީ، މިގޮތަށް ބަދަލު ގެންނަން ނިންމީ އެ ބޯޑުން އާދިއްތަ ދުވަހު ބޭއްވި ބައްދަލުވުމެއްގައި ކަމަށެވެ.
އެގޮތުން، މީގެ ކުރިން ޕީސީބީން ހުއްދަ ހޯދަން ޖެހޭ އަދި ކުރިއަށް އޮތްތަނުގައި ފިނޭންސުން ހުއްދަ ހޯދަން ޖެހޭ ކަންކަމުގެ ތެރޭގައި ހިމެނެނީ:
- ކުންފުނީގެ އިދާރީ އަދި މުސާރައިގެ އޮނިގަނޑަށް ބަދަލުގެނައުން
- އެކި ކަންކަމަށް އިންވެސްޓްކުރުން
- މުވައްޒަފުންގެ މަސައްކަތަށް ބަލާ ދެވޭ ބޯނަސްތައް ދިނުން
އެ ސާކިއުލާއާއެކު، ފިނޭންސުން ހުއްދަ ހޯދުމުގައި އަމަލުކުރަން ޖެހޭ ގޮތުގެ ގައިޑްލައިންތަކެއް ވެސް ޕީސީބީން ވަނީ މިއަދު ނެރެފަ އެވެ. މި ގައިޑްލައިންތަކާއި ބަދަލުތައް ހިނގާނީ ސަރުކާރުގެ ކުންފުނިތަކާއި ސަރުކާރު ހިއްސާވާ ކުންފުނިތަކުގެ ތެރެއިން ޕަބްލިކް ލިސްޓެޑް ކުންފުނިތައް ނޫން އެހެން ވިޔަފާރިތަކަށެވެ.
ލޯނު ނެގުމުގައި އަމަލުކުރާނެ ގައިޑްލައިން
ޕީސީބީން އެކުލަވާލި މި ގައިޑްލައިންގައިވާ ގޮތުގެ މަތިން ސަރުކާރުގެ ކުންފުންޏަކުން ކުރިއަށް އޮތް ތަނުގައި ލޯނެއް ނެގުމުގެ ކުރިން ލޯނު ދޫކުރާ އެއް ފަރާތައްވުރެ ގިނަ ފަރާތް ދިރާސާކޮށް ޓެކްނިކަލް ކަރުދާހެއް އެކުލަވާލަން ޖެހެ އެވެ.
މި ކަރުދާސް ކުންފުނީގެ ބޯޑަށް ހުށަހަޅާ ފާސްކޮށް، މައި ހިއްސާދާރު ކަމަށްވާ ފިނޭންސް މިނިސްޓްރީގެ ހުއްދަ ހޯދަން ޖެހެ އެވެ. ކަރުދާހުގައި އެކުލެވެންޖެހޭ ތަފުސީލުތައް ވެސް ގައިޑުލައިނުގައި ހިމަނާފައިވެ އެވެ. އެގޮތުން ލޯނު އަނބުރާ ދެއްކުމަށް އޮތް ޕްލޭންތަކާއި ކުރިން ނަގާފައިވާ ލޯނުތައް ދެއްކުމަށް އަލަށް ނަގާ ލޯނުގެ ސަބަބުން ކުރާނެ ސަބަބު ހިމެނެ އެވެ.
ގައިޑުލައިންގައި ބުނެފައިވާ ގޮތުން ސަރުކާރު ކުންފުނިތަކުން ލޯނު ނެގުމުގައި ސަރުކާރު ހިއްސާވާ ލޯނު ދޭ ކުންފުނިތަކާއި މާލީ އިދާރާތަކަށް އިސްކަންދޭނެ ޖެހޭނެ އެވެ.
މީގެއިތުރުން ވެސް ލޯނުތަކާ ބެހޭ މައުލޫމާތު ގެންގުޅުމުގައި އަދި އެ މައުލޫމާތުތައް ޕީސީބީއާ ހިއްސާކުރުމުގައި އަމަލުކުރަންޖެހޭ އުސޫލުތައް ވެސް މި ގައިޑްލައިނުގައި ބަޔާންކޮށްފައިވެ އެވެ.
އިދާރީ އަދި މުސާރައިގެ އޮނިގަނޑަށް ބަދަލު ގެނައުމުގައި އަމަލުކުރާނެ ގައިޑްލައިން
މި ގައިޑްލައިން ބުނާގޮތުން، ކުންފުނިތަކުގެ އިދާރީ އޮނިގަނޑު އެކުލަވާލުމަށް ކޮންމެ ފަސް އަހަރަކުން، ހިއުމަން ރިސޯސް ނީޑްސް އެސެސްމަންޓެއް ހަދަން ޖެހޭނެ އެވެ. އަދި އޮނިގަނޑަށް ބަދަލެއް ގެނެވޭނީ މި އެސެސްމަންޓު ހެދުމަށްފަހު ކަމަށް ވެސް ބުނެފައިވެ އެވެ. އެސެސްމަންޓުގައި ހިމަނަންޖެހޭ ކަންކަމުގެ ތަފުސީލު ޕީސީބީން އާންމުކޮށްފައިވެ އެވެ.
އެގޮތުން މުސާރައިގެ އޮނިގަނޑަށް ގެންނަ ބަދަލާއެކު ކުންފުނިތަކުން މުސާރައަށް ކުރާ ހަރަދު އާމްދަނީގެ 30 ޕަސެންޓުގައި ހިފެހެއްޓުމަށް މި އުސޫލުގައި އަންގާފައިވެ އެވެ. އާމްދަނީ ނުލިބޭ ކުންފުންޏެއްނަމަ މުސާރައިގެ ހަރަދު ހުންނަންވާނެ ކަމަށް ބުނެފައިވަނީ ހިންގުމުގެ ހަރަދުގެ 50 ޕަސެންޓުގަ އެވެ. ލޭބާ އިންޓެންސިވް ކުންފުންޏެއްނަމަ އެ މިންވަރު 65 އަށް މަތިކުރެވޭނެ އެވެ.
އޭގެ އިތުރުން، ކުންފުނިތަކަށް ނަގާ މުވައްޒަފުންގެ އަސާސީ ޝަރުތުތައް ޕީސީބީން އެކުލަވާލާ ޖޮބް ކްލެސިފިކޭޝަން ފްރޭމްވޯކާ އެއްގޮތް ކުރުމަ ށްވެސް އެ ބޯޑުން ކުންފުނިތަކަށް ވަނީ އަންގާފަ އެވެ.
