ފުލުހުން ރޭ ހިންގި އޮޕަރޭޝަނެއްގައި މީހަކު ހައްޔަރު ކުރި ފޮޓޯއެއް ފުލުހުން ޑިލީޓު ކުރުވި މައްސަލަ އެ އިދާރާއިން ބަލަން ފަށައިފި އެވެ.
ފުލުހުން ބުނީ އެ އިދާރާގެ އޮފިސަރަކު ފޮޓޯ ޑިލީޓު ކުރި ކަމުގެ ތުހުމަތެއްގެ ޝަކުވާ ލިބުމުން އެކަން ހިނގާފައިވާ ގޮތް ބަލަމުންދާ ކަމަށެވެ.
"އެފަދަ ތުހުމަތެއްގެ ޝަކުވާއެއް ސަމާލުކަމަށް އައިސްފައިވާތީ އެކަން ހިނގާފައިވާ ގޮތެއް ބަލަމުން ދަނީ،" ފުލުހުން ބުންޏެވެ.
"އަދަދު" އަށް އެނގިފައިވާ ގޮތުގައި ނޫސްވެރިޔަކު ނެގި އެ ފޮޓޯ ޑިލީޓު ކުރުވާފައި ވަނީ ޕްރެސް ކާޑު ވެސް އޮއްވަ އެވެ. އެގޮތުން ފުލުހުން ވަނީ ތަކުރާރުކޮށް ފޮޓޯ ޑިލީޓު ކުރަން އިންޒާރުދީ ފޮޓޯ ޑިލީޓު ކުރުވާފަ އެވެ.
"ޕްރެސް ކާޑު އޮތޭ ބުނީމަ ވެސް ފޮޓޯ ޑިލީޓް ކުރަން އެންގީ އޭނައަށް. ބުނީ ޕްރެސް ކާޑު އޮތްތޯ ބަލާކަށް ބޭނުން ނުވާ ކަމަށް. ޑިލީޓް ނުކޮށްފިނަމަ ފުލުހުންގެ ވާޖިބަށް ހުރަސް އެޅި ކަމަށް ބަލާނެ ކަމަށް ބުނެ ވެސް އިންޒާރުދިން،" އެކަން އެނގޭ މީހަކު މި ނޫހަށް ކިޔައިދިނެވެ.
އާންމު ތަންތަނުގައި ފޮޓޯ ނެގުން ހުރިހާ ރައްޔިތުންނަށް ވެސް ހުއްދައިރު، ޕްރެސް ކާޑު އަޅައިގެން މަނާ ސަރަހައްދުތައް ފިޔަވައި އެހެން ތަންތަނުގައި ނޫސްވެރިންނަށް ވެސް ފޮޓޯ ނަގައި ހަރަކާތްތެރިވުމަށް ގާނޫނާއި ގަވާއިދުތަކުން ހުރަހެއް ނާޅަ އެވެ.
