ރޯޑް ޑިވެލޮޕްމެންޓް ކޯޕަރޭޝަން (އާރްޑީސީ)ގެ ކުރީގެ މެނޭޖިން ޑިރެކްޓަރު މޫސާ އަލި މަނިކު (މޫކޭ) ދިރިއުޅޭ ގެއިން ފުލުހުން ގެންދިޔަ ކަމަށް ބުނެ ސަރުކާރުގެ ވެރިން ފަތުރަމުންދަނީ ހަގީގަތެއް ނެތް ފޮޓޯތަކެއް ކަމަށް ފުލުހުން ބުނެފި އެވެ.
މޫކޭގެ ގެއިން ފެނުނު ކަމަށް ބުނާ މުދަލުގެ ފޮޓޯތަކެއް ހިމެނޭ ޕޯސްޓެއްގެ ސްކްރީން ޝޮޓެއް ފޮނުވާ ފުލުހުންގެ މީޑީއާ ޓީމާ ސުވާލުކުރުމުން، ފުލުހުންގެ މީޑިއާ ޓީމުން ބުނީ މިއީ އެ މައްސަލާގައި ގެންދިޔަ މުދާތަކެއް ނޫން ކަމަށެވެ.
މީޑިއާ ގްރޫޕުގައި ހިއްސާކުރި ސްކްރީންޝޮޓުގައި ފެންނަނީ އެ ޕޯސްޓު، ފުލުހުންގެ ބެލެނިވެރި ވުޒާރާ ކަމަށްވާ ހޯމްލޭންޑް ސެކިއުރިޓީގެ މީޑިއާ އޮފިޝަލު ފާތިމަތު ރިފާތު ހިއްސާކޮށްފައިވާތަނެވެ. ރިފާތުގެ ޕޯސްޓުގައި 'މިއީ ހަގީގަތެއް ނަމަ،' ކަމަށް ބުނެފައިވެ އެވެ.
މާލޭގައި މޫކޭ ދިރިއުޅޭ އެޕާޓްމަންޓަށް ކޯޓު އަމުރެއްގެ ދަށުން ފުލުހުން ވަނީ ބުރާސްފަތި ދުވަހުގެ ރޭ ދަންވަރު އެވެ. ކޯޓު އަމުރު ނެރުނީ އާރުޑީސީގެ ފައިސާތަކަކަށް ހިޔާނާތްތެރިވި ކަމަށް ތުހުމަތުކުރެވޭ މައްސަލާގެ ތަހުގީގަށް ބޭނުންވާ ހެކި ހޯދުމަށެވެ.
ފުލުހުން މޫކޭގެ ގެއަށް ވަދެ ބަލައި ފާސްކޮށް އިލެކްޓްރޯނިކް ސާމާނުތަކެއް ގެންދިޔަ އެވެ. އެކަން ފުލުހުންވެސް ހާމަކުރި އެވެ.
މި ރެއިޑަށްފަހު ކާކުކަން ނޭނގޭ ގޮތަށް ހިންގާ އެކައުންޓުތަކުންނާއި ސަރުކާރުގެ އިސް ސިޔާސީ މަގާމުތަކުގައި ތިބި މީހުންގެ އަމިއްލަ އެކައުންޓުތަކުން ފުލުހުން ގެންދިޔަ ސާމާނުތައް ކަމަށް ބުނެ ފޮޓޯތަކެއް ދަނީ ދައުރުކުރަމުންނެވެ.
ދައުރުކުރާ ފޮޓޯތަކުގައި ހިމެނެނީ އަގުބޮޑު އަތުކުރީ ގަޑިތަކަކާއި ގަހަނާތަކެއްގެ އިތުރުން، ބްރޭންޑެޑް އަތް ދަބަސް ތަކެކެވެ. މިއީ މޫކޭގެ ގެއިން ފެނުނު ތަކެތި ކަމަށާއި މި ތަކެއްޗަކީ އާރުޑީސީގެ ލާރިއަށް ގަނެފައިވާ ތަކެތި ކަމަށް މި ޕޯސްޓުތަކުގައި ބުނެފައިވެ އެވެ. އެ ތަކެތީގެ އަގު ހަ މިލިއަނަށް އަރާ ކަމަށްވެސް ބައެއް ޕޯސްތަކުގައި ބުނެފައިވެ އެވެ.
މީގެތެރެއިން އެންމެ ގިނަ ބައެއްގެ ސަމާލުކަމަށް އައީ ސިޓީސް އެންޑް ލޯކަލް ގަވަމަންޓު މިނިސްޓްރީގެ ސީނިއާ ޕޮލިޓިކަލް ޑިރެކްޓަރު އަހުމަދު ރާޝިދު (ރާޑޯ) ކޮށްފައިވާ ޕޯސްޓެވެ. މި ޕޯސްޓަށް އާންމުންގެ ގިނަބަޔަކު ވަނީ ރައްދުދީފަ އެވެ.
އެގޮތުން، ބައެއް މީހުން ވަނީ ރާޑޯގެ ޕޯސްޓުގައި ހުރި ފޮޓޯތައް ގޫގުލް ލެންސުން ސާޗުކޮށް، އެއީ މޫކޭގެ ގެއިން ފެނުނު އެއްޗެހި ނޫންކަން ސާބިތުކޮށްދީފަ އެވެ. އެ ޕޯސްޓުގައި ހިމެނޭ ހަތަރު ފޮޓޯއަކީ ވެސް ގޫގުލް ކޮށްގެން ހޯދާފައިވާ ފޮޓޯތަކެއްކަން މި ނޫހަށްވެސް ވަނީ ހޯދިފަ އެވެ.
މި ނޫހަށް އެނގިފައިވާ ގޮތުގައި މޫކޭގެ އެޕާޓުމެންޓުން ގެންދިޔައީ އޭނާގެ ފޯނެވެ. އެކަން އޭނާވެސް ވަނީ ސޯޝަލް މީޑިއާގައި ހިއްސާކުރައްވާފަ އެވެ.
