ނިމިދިޔަ އެމްޑީޕީ ސަރުކާރުން ހިންގި ބިންވެރިޔާ އަދި ގެދޮރުވެރިޔާ ސްކީމުގެ ދަށުން ދޫކުރި ގޯއްޗާއި ފުލެޓުތަކާ ގުޅިގެން ފުލުހުން ހިންގަމުންދާ ތަހުގީގަށް އާންމުންގެ ތެރެއިން މިހާތަނަށް މައުލޫމާތު ދިނީ 16 މީހުން ކަމަށް ފުލުހުން ބުނެފި އެވެ.
މިއަދު މީޑިއާތަކަށް ފޮނުވި މެސެޖެއްގައި ފުލުހުން ބުނީ މައުލޫމާތު ހުށަހެޅި ފަރާތްތަކުގެ ތެރެއިން ގުޅުންހުރި ލިޔެކިޔުންތައް ހިއްސާކުރީ އެންމެ ހަތަރު ފަރާތަކުން ކަމަށެވެ. އެ ފުރުސަތު އަދިވެސް އޮތީ ހުޅުވާލާފަ އެވެ.
އެގޮތުން، ފުލުހުންގެ ޕޯޓަލް މެދުވެރިކޮށް ޒާތީ މައުލޫމާތު ހާމަނުކޮށް ނުވަތަ ފުލުހުން ގުޅަން ބޭނުންވެއްޖެ ހާލަތުގައި ގުޅޭނެ މައުލޫމާތާއެކުވެސް ހިއްސާކުރެވޭނެ ކަމަށް ފުލުހުން ބުންޏެވެ. ފުލުހުންގެ އިތުރުން އެންޓި ކޮރަޕްޝަން ކޮމިޝަން (އޭސީސީ) އިންވެސް ދަނީ މި މައްސަލަތައް ތަހުގީގުކުރަމުންނެވެ.
މި ދެ ސްކީމާ ގުޅިގެން ޖިނާއި ތަހުގީގެއް ހިންގަން ޕްރޮސެކިއުޓާ ޖެނެރަލް ތަހުގީގީ އިދާރާތަކަށް އެންގީ މި މަހު 19، ގަ އެވެ. އެ އެންގުން އައީ ހައުސިން ޑިވެލޮޕްމަންޓު ކޯޕަރޭޝަނުގެ ހިޔާނާތުގެ މައްސަލަތަކެއް ފެންމަތިވުމާއެކު އެވެ.
އޭގެތެރޭގައި މި ދެ ސްކީމުގެ ދަށުން ދޫކުރި ބިންތަކާއި ފުލެޓުތަކާ ގުޅޭ ހިޔާނާތްތަކެއްވެސް ހިމެނެ އެވެ. މި މައްސަލަތަކާ ގުޅިގެން އެޗްޑީސީ ބޯޑު މެންބަރުންނާއި ހައުސިން މިނިސްޓްރީގެ މިހާރުގެ އަދި ކުރީގެ އިސްވެރިންގެ ޕާސްޕޯޓު ވަނީ ހިފަހައްޓާފަ އެވެ.
ބިންވެރިޔާ ސްކީމުގެ ދަށުން މިދިޔަ ސަރުކާރުގައި މާލެ ރައްޔިތުންނަށް 9،003 ގޯތި ދޫކުރި އެވެ. ބިންވެރިޔާ ސްކީމުން ދޫކުރި ގޯތިތައް ހުންނަނީ ހުޅުމާލޭ އާއި ގުޅީފަޅާއި ގިރާވަރު ފަޅުންނެވެ. އެއީ ހުޅުމާލެއިން ދޫކުރާ 1407 ގޯއްޗާއި ގުޅީފަޅުން ދޫކުރާ 2219 ގޯއްޗާއި ގިރާވަރުފަޅުން ދޫކުރާ 5433 ގޯއްޗެވެ.
ގެދޮރުވެރިޔާ ސްކީމުގެ ދަށުން ފްލެޓް ދޭން ހުޅުވާލުމާއެކު ހުށަހެޅި މީހުންގެ ތެރެއިން ޝަރުތު ހަމަވާ ކަމަށް މިދިޔަ އޯގަސްޓު 8، ގައި ނެރުނު ވަގުތީ ލިސްޓުގައި އޮތީ 15،046 މީހުންނެވެ. ސަރުކާރުން ނިންމާފައި ވަނީ ހުށަހެޅި މީހުންގެ ތެރެއިން ޝަރުތު ހަމަވާ ހުރިހާ އެންމެންނަށް ފުލެޓް ދިނުމަށެވެ. ނަމަވެސް ކޮންޓްރެކްޓު ކުރެވި މަސައްކަތް ފަށާފައި ވަނީ 4000 ފްލެޓުގެ އެވެ.
ފުރަތަމަ 4،000 ފްލެޓް ލިބޭނީ ޕޮއިންޓް ތަރުތީބުން އެންމެ ގިނަ ޕޮއިންޓު ލިބޭ މީހުނަށް ކަމަށް ކަނޑައަޅާފައިވަނިކޮށް އޭސީސީއަށް ހުށަހެޅު މައްސަލައަކާ ގުޅިގެން އެ މަސައްކަތް މަޑުޖައްސާލަން އެންގި އެވެ.
