ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރަކަށް ހުންނަވައިގެން ހިޔާނާތާއި ރިޝްވަތު ނެންގެވުމުގެ މައްސަލަތަކެއްގައި ތުހުމަތުކުރެވޭ އިބްރާހިމް ފަޒުލް ރަޝީދުގެ މަސްލަހަތު ހިމެނޭ އއ. އަލިކޮއިރަށް ކުއްޔަށް ދޭން ޓޫރިޒަމް މިނިސްޓްރީން ދޫކުރި އެވޯޑު ލެޓާ ބާތިލުކޮށްފި އެވެ.
އަލިކޮއިރަށުގައި ރިސޯޓެއް ތަރައްގީކުރަން ޓޫރިޒަމް މިނިސްޓްރީން އެވޯޑު ލެޓާ ދޫކުރީ މާޒިޔާ ސާވިސަސްއަށެވެ. އެއީ ޓޫރިޒަމް މިނިސްޓްރީން އެ ރަށް ދޫކުރަން އިއުލާނުކުރި އަގު ކަމުގައިވާ 1.2 މިލިއަން ޑޮލަރަށެވެ. މާޒިޔާއަށް މި އެވޯޑު ލެޓާ ދޫކުރީ މި އަހަރުގެ ޖޫން 26, ގަ އެވެ.
މާޒިޔާ ސާވިސަސްއަކީ ފަޒުލްއާ ގާތް ގުޅުމެއް އޮންނަ ކުންފުންޏެކެވެ. މި ކުންފުނީގައި ފަޒުލްގެ ހިއްސާއެއް ނެތް ނަމަވެސް, އިތުބާރު ހުރި މަސްދަރުތަކުން ނަން ނުޖަހާ ގޮތަށް "އަދަދު" އަށް މައުލޫމާތު ދިން ގޮތުގައި ރަށުގެ ލީސް އެކުއިޒިޝަން ކޮސްޓު ފައިސާ ބޮޑު ބަޔެއް ފަންޑުކުރައްވަން ތައްޔާރަށް ހުންނެވީ ފަޒުލް އެވެ.
އަލިކޮއިރަށުގެ އެކުއިޒިޝަން ކޮސްޓު ދައްކަން މާޒިޔާއަށް ދިން މުއްދަތު ޓޫރިޒަމް މިނިސްޓްރީން އައީ އިތުރުކޮށްދެމުންނެވެ. މި ނޫހަށް ލިބިފައިވާ ލިޔެކިޔުންތަކުން ދައްކާ ގޮތުގައި އެންމެ ފަހުން ދިން މުއްދަތު ހަމަވީ މިދިޔަ މަހުގެ 10 ގަ އެވެ. އެ ފަހުން މިނިސްޓްރީން ވަނީ އެ މުއްދަތު އިތުރުނުކޮށް, އެވޯޑު ލެޓޭ ބާތިލުކޮށްފަ އެވެ.
ނަމަވެސް، މާޒިޔާއާ ގުޅުން އޮންނަ މަސްދަރަކުން މި ނޫހަށް މިއަދު ބުނީ އެވޯޑު ލެޓާ ބާތިލުކުރީ، ފައިސާ ދެއްކުމަށް އެންމެ ފަހުން ދިން މުއްދަތު ހަމަ ނުވަނީސް ކަމަށެވެ.
"ނަމަވެސް އަޅުގަނޑުމެން ބޭނުން ނުވީ އެކަންކަމުގެ ތެރެއަށް އިތުރަށް ވަންނަން. ބޮޑު ބޮލުގެ ރިހުމަކަށް ވެސް ވެފައި އޮތީ،" އަދަދު ނޫހާ ވާހަކަ ދެއްކި މީހާ ބުންޏެވެ.
މި މައްސަލައިގައި "އަދަދު" އާ ވާހަކަ ދެއްކި މަސްދަރަކުން ބުނީ އެވޯޑު ލެޓާ ބާތިލުކުރީ ސީދާ ރައީސް އޮފީހުން އަންގައިގެންނެވެ. ޓޫރިޒަމް މިނިސްޓްރީގެ އިސް މީހަކު ވެސް ވަނީ މިކަން މިގޮތަށް ހިނގާފައިވާ ކަން ކަށަވަރުކޮށްދީފަ އެވެ.
ރައީސް އޮފީހުން މި އެންގުން އައީ ބިންވެރިޔާ ގޯތިތައް ވަގަށް ދޫކުރި މައްސަލަ ހިލުމުން ކަމަށް ވެސް އޭނާ ބުންޏެވެ.
ނުރަސްމީކޮށް މިކަން ކަށަވަރުކޮށް ދިން ނަމަވެސް, ޓޫރިޒަމް މިނިސްޓްރީން ވަނީ މިކަމުގައި ރަސްމީ ބަހެއް ދޭން އިންކާރުކޮށްފަ އެވެ. ސަބަބަކަށް ދެއްކީ އިންވެސްޓަރުންނާ އެކީ ކުރާ މުއާމަލާތްތަކުގެ ސިއްރު ހިފެހެއްޓުމެވެ.
