ހަމައެކަނި އިންޓެލިޖެންސް ރިޕޯޓެއްގެ މައްޗަށް ބިނާކޮށް، ކޯޓު އަމުރު ނަގައިގެން މެންދަމު ގޭގެއަށް ވަދެ ބަލައިފާސްކުރުމުގެ އޮޕަރޭޝަންތައް ކުރިއަށް ގެންދާތީ، ކަންބޮޑުވުން ފާޅުކޮށް، ފުލުހުން ޕްރޮފެޝަނަލިޒަމް ހިފަހައްޓަން މާލޭ މޭޔަރު އާދަމް އާޒިމް ގޮވާލައްވައިފި އެވެ.
އާދަމް އާޒިމް މިހެން ވިދާޅުވީ ރޯޑް ޑިވެލޮޕްމެންޓް ކޯޕަރޭޝަން (އާރްޑީސީ)ގެ އެކައުންޓަކުން ބައެއް އާއްމުންގެ އެކައުންޓްތަކަށް ފައިސާ ޖަމާކޮށްފައިވާ ކަމަށް ތުހުމަތު ކުރެވޭ މައްސަލަ ފުލުހުން ބަލަމުންދާތާ އަހަރަކަށް ވުރެ ގިނަ ދުވަސްވީ ފަހުން، ހެކި ހޯދަން ކަމަށް ބުނެ، ބުރާސްފަތި ދުވަހުގެ ރޭ މެންދަމު ހަތަރު ގެއެއް ބަލައި ފާސްކޮށް އިލެކްޓްރޯނިކް ސާމާނުތަކެއް ގެންގޮސްފައި ވަނިކޮށެވެ.
އާރުޑީސީގެ ހިޔާނާތުގެ މައްސަލަ ޕޮލިހަށް ހުށަހެޅީ މީގެ ސެޕްޓެމްބަރު، 2022، ގަ އެވެ. އެ މައްސަލައިގައި ފުލުހުން އާރުޑީސީ ބަލައި ފާސްކުރީ ނޮވެމްބަރު 14، 2023، ގަ އެވެ.
އޭގެ އެއް އަހަރު ފަހުން ފުލުހުން ބުރާސްފަތި ދުވަހުގެ ރޭ ބަލައި ފާސްކުރީ އާރުޑީސީގެ ކުރީގެ މެނޭޖިން ޑިރެކްޓަރު މޫސާ އަލިމަނިކު (މޫކޭ) މާލޭގައި ދިރިއުޅުއްވާ އެޕާޓްމެންޓާއި، އޭނާގެ ކުރީގެ އަނބިކަނބަލުން ހުޅުމާލޭގައި ދިރިއުޅުއްވާ އެޕާޓްމެންޓު އަދި އާރުޑީސީގެ ކުރީގެ ސީއެފްއޯ ޔާސިރު ހަސަން އަށް ނިސްބަތްވާ ދެ ތަނެކެވެ.
މޭޔަރު އާޒިމް ރޭ އެކްސްގައި ކުރެއްވި ޕޯސްޓުގައި ވަކި މައްސަލައެއް ފާހަގަ ކުރައްވާފައި ނެތަސް، އިޝާރާތް އެ ކުރައްވަނީ ބުރާސްފަތި ދުވަހުގެ ރޭގެ އޮޕަރޭޝަނަށް ކަމަށް ބެލެވެ އެވެ.
"މައިންނާއި ޅަދަރީން ރޭގަނޑު އަރާމުކުރާ ވަގުތުގައި ގޭގެއަށް ވަދެ އާއިލާގެ ނިދި ގެއްލުވާލައި ފުލުހުން ރޭޑްތައް ހިންގުމުން، އާއިލާތައް މިވައްޓާލެވެނީ ވަރަށް ބޮޑު ބިރުވެރިކަމެއްގެ ތެރެއަށެވެ. މިއަދު މިފަދަ ކަންކަން ހިނގާތައް، ފެނުމަކީ އަޅުގަނޑަށް ވަރަށް ބޮޑު މާޔޫސް ކަމެއް ލިބޭ ކަމެކެވެ،" އާޒިމް ވިދާޅުވި އެވެ.
އެކަމުން އިހުސާސް ވަނީ އަމާންކަމާއި ރައްކާތެރިކަން ނެތުން ކަމަށް އޭނާ ވިދާޅުވި އެވެ. މިފަދަ އެތައް ކަމެއް މާޒީގައި ތަޖުރިބާ ކުރެވިފައިވާކަން ވެސް ފާހަގަ ކުރައްވައި، އެ ހަނދާން އޭނާ އާކުރެއްވި އެވެ.
"އަމިއްލައަށް އުފަންކުރުވާ އިންޓެލިޖެންސް ރިޕޯޓާއި އަދި ފްރޭމްކުރުމަށް ހެކި ބަހައްޓާގެން ހިންގި ރޭޑުތަކުން އެތައް އާއިލާތަކަކަށް ވަނީ އަނިޔާއި ހިތާމަ ބޭއިންސާފުން ލިބިފަ އެވެ. އަދި މިއަދާ ހަމައަށްވެސް މިފަދަ ބޮޑެތި ޖަރީމާތައް ހިނގި ފަރާތްތައް އިންސާފު ކުރިމަައްޗަށް ގެނެވިފައިނެތެވެ،" އާޒިމް ވިދާޅުވި އެވެ.
ކުރީގެ ރައީސް އަބްދުﷲ ޔާމީންގެ ޑިފެންސް މިނިސްޓަރަކަށް އާޒިމްގެ އެއްބަނޑު އެއްބަފާ ބޭބޭ މުހައްމަދު ނާޒިމްގެ ގެއަށް މެންދަމެއްގައި ފުލުހުން ވަދަ ހިންގި އޮޕަރޭޝަންގައި ފިސްތޯލެއް ފިނިފައިވާ ކަމަށް ބުނެ ކުރި ދައުވާ ސާބިތުކޮށް، 11 އަހަރަށް އޭނާ ޖަލަށްލި އެވެ. އެއީ ފްރޭމުކުރުން ކަމަށް ގިނަ ބަޔަކު ގަބޫލު ކުރެ އެވެ.
މިހާރު މާފަންނު އުތުރު ދާއިރާގެ މެންބަރަކަށް ހުންނެވި ނާޒިމް ޖަލަށް ލީ، އޭނާ ޑިފެންސް މިނިސްޓަރަކަށް ހުންނަވަނިކޮށެވެ. ނާޒިމުގެ ހުކުމް ބާތިލުކޮށް މިނިވަންވީ، ޔާމީންގެ ވެރިކަން 2018 ވަނަ އަހަރު ބަދަލު ވުމަށް ފަހު އެވެ.
"މިފަދަ ހިތާމަވެރިކަންކަން، އަމިއްލައަށް ތަހައްމަލުކޮށްފައިވާ މީހެއްގެ ހައިސިއްޔަތުން ދަންނަވަންއޮތީ، ގާނޫނު ތަންފީޒު ކުރައްވާ ފަރާތްތަކުގެ އަމަލުތަކުގައި ޕްރޮފެޝަނަލިޒަމް ދަމަހައްޓަވައި ދެއްވާށެވެ. މިއަދު ލިބިފައިވާ ބާރު ބަދަލު ހިފުމުގެ ވަސީލަތެއްގެ ގޮތުގައި ބޭނުންކުރެއްވުމުން، ދުރުހެލިވެތިބުމަށް، އަޅުގަނޑު ފުލުންހުންގެ މުއައްސާސާއަށް ހަނދާންކޮށްދެމެވެ،" އާޒިމް ވިދާޅުވި އެވެ.
އާރުޑީސީގެ މައްސަލައިގައި މޫކޭ އާއި ޔާސިރުގެ ގެ ބަލައި ފާސްމިކުރީ މި ފަހަކަށް އައިސް މި ސަރުކާރުގެ ވައްކަމާއި ހިޔާނާތުގެ މައްސަލަތައް ފެންމަތިވެ ރައްޔިތުންގެ ފާޑުކިތުން ގިނަވެފައި ވަނިކޮށެވެ.
