ގަވާއިދާ ހިލާފަށް ރާއްޖޭގެ ސަރަހައްދަށް ވަދެ އުޅުނު ސްރީލަންކާގެ މަސް ބޯޓަކުން 468 ކިލޯގެ މަސްތުވާތަކެއްޗާ އެކު ހައްޔަރުކުރި ލަންކާ މީހުންގެ ބަންދުގެ މުއްދަތު 30 ދުވަހަށް ކްރިމިނަލް ކޯޓުން އިއްޔެ އިތުރުކޮށްފި އެވެ.
އެ ފަސް މީހުންގެ ބަންދު ވެސް އިތުރު ކުރީ ފުލުމުގެ އިހުތިމާލު އޮތުމުންނާއި މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށް ބެލުމަށްފަހު އެވެ.
"ގިނަ އަދަދެއްގެ މަސްތުވާތަކެތި ކަމަށް ބެލެވޭ ތަކެތި މީނާ ހުރި ބޯޓުން ފެނިފައިވުން، މީނާއަކީ މަސްތުވާތަކެތި ވިޔަފާރި ކުރުމުގައި ބައިވެރިވުމެއް އޮތް ފަރާތެއް ކަމަށް ބެލެވޭތީ، މިފަދަ ފަރާތެއް ބަންދުން ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކަލެއް އޮތް ކަމަށް ފެނޭ،" ފަސް މީހުންގެ ބަންދު އަމުރުގައި ބަޔާން ކޮށްފައިވެ އެވެ.
ބަންދުކުރި ފަސް ލަންކާ މީހުން:
- ރާޖްޕަކްޝަ ގެމަގޭ ދެނޫޝަ މަޑުމަލް، 21.
- މުއްތިމާ ޕަޓަބިންދިގޭ އަމިޝްކް ސަންޖީވަ ކުމާރު، 22.
- ތަމޮދް ތިވަންގާ ދިލަކާވަ، 22.
- ލޮރެންސު ހޭވާގީ ސަރަތު، 56.
- ވިޖޭވަރު ގުނަރަތުނާ މަހާވިދޯމާ، 37.
ހދ. މަކުނުދޫ ބޭރުން "އަށެންގުތަ" ނަމަކަށް ކިޔާ އެ ބޯޓު ނޮވެމްބަރު 22، ގައި އަތުލައިގަތީ އެމްއެންޑީއެފްއިންނެވެ. ފުލުހުންނަށް އެ ބޯޓުން މަސްތުވާތަކެތި ފެނުނީ އެމްއެންޑީއެފްއިން މި ބޯޓު އަތުލައިގަތުމަށް ފަހު ކުޅުދުއްފުށީ ބަނދަރަށް ގެންގޮސް ބަލައިފާސްކުރުމުގެ ތެރެއިންނެވެ.
އެ މަސް ބޯޓުން ފެނުނު މަސްތުވާތަކެތީގެ ޕްރިލިމިނަރީ ޓެސްޓު ނަތީޖާތަކުން ދައްކާ ގޮތުގައި އޭގެ ތެރޭގައި ހުރީ 344 ކިލޯގެ ކްރިސްޓަލް މެތާއި 124 ކިލޯގެ ކޮކެއިން ކަމަށާއި އެ ތަކެތީގެ މަގުމަތީ އަގު އެއް ބިލިއަން ރުފިޔާއަށް އަރާ ކަމަށް ފުލުހުން ބުންޏެވެ.
ފުލުހުން ކުރިން ބުނީ އެ މައްސަލައިގެ ތަހުގީގު ކުރަމުން އަންނަ އިރު، މިހާތަނަށް އެ މަސްތުވާތަކެއްޗަކީ ރާއްޖޭގެ ޑްރަގު ނެޓުވޯކަކާ ގުޅިގެން އެތެރެ ކުރަން އުޅުނު ތަކެތި ކަން ކަށަވަރު ނުވާ ކަމަށެވެ.
