އާ އަހަރު ފާހަގަކުރުމާ ދިމާކޮށް މަސްތުވާތަކެތި ވިއްކާ ބޭނުންކުރާ މިންވަރު އިތުރުވާނެ ކަމަށް ލަފާކޮށް، ފުލުހުންގެ ހާއްސަ އޮޕަރޭޝަނެއް ފަށައިފި އެވެ.
ފުލުހުން މިއަދު ސޯޝަލް މީޑިއާގައި ކުރި ޕޯސްޓެއްގައި ބުނީ މި އޮޕަރޭޝަން ފަށާފައިވަނީ އިއްޔެ ކަމަށެވެ. މިހާރުވެސް ފުލުހުންގެ އެކި ޔުނިޓުތަކުން ދަނީ މާލެ ސަރަހައްދުގައި ހަރަކާތްތެރިވަމުންނެވެ.
އާ އަހަރާ ދިމާކޮށް އޮންނަ އެކި ހަރަކާތްތަކުގައި މަސްތުވާ މިންވަރު އިތުރުވާތީ، ފުލުހުން ހިންގާ މި އޮޕަރޭޝަނުގައި ހުޅުމާލެ ފަޅުތެރެ ޕެޓްރޯލުކޮށް ރަށުތެރެއަށް ބަނގުރާ އަރުވާ އުޅަނދުތައް ހޯދާނެ ކަމަށްވެ އެވެ.
އަދި މާލެ ސަރަހައްދުގައި ބަނގުރާ ވިއްކާ ކަމަށް ޝައްކުކުރެވޭ ކެފޭ އަދި ރެސްޓޯރަންޓުތައް މޮނީޓާކޮށް ގާނޫނާ ހިލާފުވާ ފަރާތްތަކާ މެދު ފިޔަވަޅު އާޅާނެ ކަމަށްވެސް ފުލުހުން ބުނެފައިވެ އެވެ. މި އޮޕަރޭޝަނުގައި ފުލުހުންގެ ޑްރަގް އެންފޯސްމަންޓާއި، ހުޅުމާލެ ޕޮލިސް، މެރިން ޕޮލިސް އަދި ކ. އަތޮޅުގެ ޕޮލިސް ސްޓޭޝަންތައް ބައިވެރިވާނެ ކަމަށްވެސް ފުލުހުން ބުންޏެވެ.
